អន្តរជាតិ
ប្រមុខការទូតអាមេរិកថ្មី៖ ភាពជាសត្រូវ ការប្រកួតប្រជែង និងកិច្ចសហប្រតិបត្តិការជាទំនាក់ទំនងអាមេរិក-ចិន
លោក អាន់តូនី ប្ល៊ីងខិន រដ្ឋមន្រ្តីការបរទេសអាមេរិក។ រូបភាព៖ AFP
×![]()
ភាពជាសត្រូវ ការប្រកួតប្រជែង និងកិច្ចសហប្រតិបត្តិការ ជាទំនាក់ទំនងអាមេរិក-ចិន។ នេះជាការមើលឃើញរបស់លោក អាន់តូនី ប្ល៊ីងខិន (Antony Blinken) រដ្ឋមន្ត្រីការបរទេសអាមេរិកថ្មី។ បើតាមលោក ប្ល៊ីងខិន រដ្ឋបាលអាមេរិកថ្មីរបស់លោក ចូ បៃឌិន មានបំណងសហការជាមួយចិនលើបញ្ហាបម្រែបម្រួលអាកាសធាតុ និងបញ្ហារួមដទៃទៀត តែលើបញ្ហាសិទ្ធិមនុស្ស និងនយោបាយ ភាគីទាំងពីរ នៅតែប្រឈមមុខដាក់គ្នាដដែល។
ក្នុងសន្និសីទកាសែតនៅថ្ងៃដំបូងជាប្រមុខការបរទេសអាមេរិក លោក អាន់តូនី ប្ល៊ីងខិន លើកឡើងថាទំនាក់ទំនងអាមេរិក និងចិន សឹងតែត្រូវចាត់ទុកជាទំនាក់ទំនងមួយយ៉ាងសំខាន់ក្នុងពិភពលោកទៅហើយ។ លោក ប្ល៊ីងខិន និយាយថា មួយផ្នែកនៃទំនាក់ទំនងនេះមានភាពជាសត្រូវ ការប្រកួតប្រជែង ក៏ដូចជាកិច្ចសហប្រតិបត្តិការផងដែរ។ លោកលើកឡើងពីការប្រយុទ្ធប្រឆាំងនឹងបម្រែបម្រួលអាកាសធាតុ ដែលជាផលប្រយោជន៍របស់ប្រទេសទាំងពីរ។
«ក្នុងបរិបទដ៏ទូលំទូលាយនៃគោលនយោបាយការបរទេស មានបញ្ហាជាច្រើនដែលយើងមានជាមួយចិន ហើយជាបញ្ហាដែលយើងត្រូវតែធ្វើការជាមួយគ្នា»។ នេះជាការលើកឡើងរបស់លោកប្ល៊ីងខិន ក្នុងសន្និសីទថ្ងៃទី២៧ ខែមករា។ លោកសង្ឃឹមថា អាមេរិក និងចិន អាចដោះស្រាយបានបញ្ហាដែលមានរួមគ្នា។
យ៉ាងណាមិញ មហាអំណាចទាំងពីរ មានរឿងជាច្រើនដែលមិនត្រូវគ្នា ហើយទាស់គ្នាជារឿយៗផងដូចជាសិទ្ធិមនុស្សជាដើម។ រឿងសិទ្ធិមនុស្សនេះ លោក ប្ល៊ីងខិន ប្រកាន់ជំហរយល់ឃើញការធ្វើទុក្ខបុកម្នេញជនភាគតិចវីហ្គ័រនៅស៊ីនជាំងជាការប្រល័យពូជសាសន៍។ ប្រមុខការទូតអាមេរិកបញ្ជាក់បែបនេះ ជាការឆ្លើយតបទៅនឹងការចោទសួររបស់អ្នកសារព័ត៌មានលើកិច្ចសហប្រតិបត្តិការអាមេរិក-ចិន ក្រោយអតីតរដ្ឋមន្ត្រីការបរទសលោក ម៉ៃ ប៉ុមប៉េអូ និយាយថា ចិនប្រព្រឹត្តអំពើប្រល័យពូជសាសន៍។
ខណៈរដ្ឋបាលលោក បៃឌិន បានសន្យាថា នឹងចាត់វិធានការក្ដៅក្នុងការប្រកួតប្រជែងនឹងចិន អ្នកនយោបាយបក្សសាធារណរដ្ឋដែលមានទំនោរប្រឆាំងចិន បារម្ភថា លោក បៃឌិន អាចនឹងធ្វើសម្បទាន និងបន្ទន់ជំហរប្រឆាំងចិនដើម្បីអាចដោះស្រាយបញ្ហានុយក្លេអ៊ែរកូរ៉េខាងជើង និងការប្រយុទ្ធនឹងបម្រែបម្រួលអាកាសធាតុ។
ជាមួយគ្នានេះ លោក ប្ល៊ីងខិន ក៏លើកឡើងផងដែរថា អាមេរិកសន្យាក្នុងការស្តាទំនាក់ទំនងឡើងវិញជាមួយសម្ព័ន្ធមិត្តដូចជាសហភាពអឺរ៉ុបជាដើម។ លោកក៏បង្ហាញពីបំណងយ៉ាងមុតមាំផងដែរពីការត្រឡប់មកវិញរបស់អាមេរិកក្នុងឆាកអន្តរជាតិ ក្រោយរយៈពេល៤ឆ្នាំនៃការដឹកនាំរបស់អតីតប្រធានាធិបតី ដូណាល់ ត្រាំ ដែលធ្វើសកម្មភាពឯកតោភាគី និងមិនបានគិតគូរពិភាក្សាជាមួយសម្ព័ន្ធមិត្តជាមុន៕
Tag:
អាមេរិក
ចិន
Antony Blinken
© រក្សាសិទ្ធិដោយ thmeythmey.com
