ជាតិ
×![]()
ភ្នំពេញ៖ អង្គការតម្លាភាពអន្តរជាតិ បានបង្ហាញសន្ទស្សន៍នៃការវាយតម្លៃពុករលួយថា កម្ពុជា ទទួលបានពិន្ទុ២១ លើ១០០ ដែលជាប់ចំណាត់ថ្នាក់លេខ១៦០ ក្នុងចំណោម១៨០ប្រទេស។ ការវាយតម្លៃនេះ ក៏បានបង្ហាញថា កម្ពុជាជាប់លេខខ្ពស់ជាងគេដែរ ក្នុងចំណោមប្រទេសតំបន់អាស៊ាន។
របាយការណ៍វាយតម្លៃរបស់អង្គការតម្លាភាពអន្តរជាតិ បានបង្ហាញថា ប្រទេសនានាក្នុងតំបន់អាស៊ាន ទទួលបានពិន្ទុចម្រុះ ដោយក្នុងនោះ សិង្ហបុរី មាន៨៥ពិន្ទុ ជាប់ចំណាត់ថ្នាក់ល្អ នៃប្រទេសស្អាតស្អំជាងគេនៅអាស៊ាន ហើយជាប់ចំណាត់ថ្នាក់លេខ ៣ ស្ទួនជាមួយប្រទេសស៊ុយអែត និងស្វីស នៅលើពិភពលោក។ កាលពីឆ្នាំ២០១៩ សិង្ហបុរី ជាប់ចំណាត់ថ្នាក់លេខ៤។
ដោយឡែកប្រទេសព្រុយណេ ទទួលបានពិន្ទុ៦០ដដែល ដោយឈរលេខ៣៥ នៅឆ្នាំ២០២០ (លេខ៣៥នៅឆ្នាំ២០១៩), ម៉ាឡេស៊ី ទទួលបានពិន្ទុ៥១ ឈរលេខ៥៧ (ពិន្ទុ៥៣ លេខ៥១ ឆ្នាំ២០១៩), វៀតណាម មានពិន្ទុ៣៦ ជាប់ចំណាត់ថ្នាក់១០៤ (ពិន្ទុ៣៧ លេខ៩៦ ឆ្នាំ២០១៩), ឥណ្ឌូណេស៊ី មានពិន្ទុ៣៧ ជាប់លេខ១០១ (ពិន្ទុ៤០ លេខ៨៥ ឆ្នាំ២០១៩) មីយ៉ាន់ម៉ា ពិន្ទុ២៨ ឈរលេខ១៣៧ (ពិន្ទុ ២៩ លេខ១០៣ នៅឆ្នាំ២០១៩)។
ចំណែកប្រទេសមានពិន្ទុថេរដដែលនោះ រួមមាន ថៃ មាន៣៦ពិន្ទុ ឈរលេខ១០៤ (លេខ១០១ ឆ្នាំ២០១៩), ហ្វីលីពីន មាន៣៤ពិន្ទុ ជាប់លេខ១១៥ (លេខ១១៣ នៅឆ្នាំ២០១៩),ឡាវ មាន២៩ពិន្ទុ លេខ១៣៤ (លេខ១៣០ នៅឆ្នាំ២០១៩)។ នេះបើតាមអង្គការតម្លាភាពអន្តរជាតិ។
របាយការវាយតម្លៃរបស់អង្គការតម្លាភាពអន្តរជាតិ បានបន្ថែមថា ប្រទេសកម្ពុជាបន្តស្ថិតក្នុងចំណោមប្រទេសមានពិន្ទុទាបជាងគេទី៣ នៅតំបន់អាស៊ីប៉ាស៊ីហ្វិច គឺនៅលើតែប្រទេសអាហ្វហ្គានីស្ថាន និងកូរ៉េខាងជើងតែប៉ុណ្ណោះ ហើយក៏ជាប្រទេសមានពិន្ទុទាបជាងគេបំផុតក្នុងតំបន់អាស៊ានផងដែរ។
ប្រទេសដែលមានពិន្ទុខ្ពស់ នឹងមានចំណាត់ថ្នាក់ល្អជាងគេនោះ គឺនូវែសេឡង់ និងដាណឺម៉ាក ដែលមានពន្ទុ៨៨ដូចគ្នា និងឈរលេខ១ស្ទួន។ ចំណែកហ្វាំងឡង់ , ស្វីស, សិង្ហបុរី, ស៊ុយអែត មាន៨៥ពិន្ទុ និងជាប់ចំណាត់ថ្នាក់លេខ៣ស្ទួន។ នេះបើតាមរបាយការណ៍អង្គការតម្លាភាពអន្តរជាតិដដែល៕
Tag:
ពុករលួយ
អាស៊ាន
© រក្សាសិទ្ធិដោយ thmeythmey.com
