ជាតិ
ពលរដ្ឋជាង៥០០គ្រួសារ ក្នុងសហគមន៍ព្រៃឈើព្រៃហ៊ុំពឹងលើកសិកម្ម និងអនុផលព្រៃឈើ
× ពលរដ្ឋ៥១៧គ្រួសារ ក្នុងសហគមន៍ព្រៃឈើព្រៃហ៊ុំ ស្ថិតនៅភូមិសង្គម ឃុំដំរីស្លាប់ ស្រុកកំពង់ស្វាយ ខេត្តកំពង់ធំ ពឹងលើការងារកសិកម្ម និងអនុផលព្រៃឈើ មានដូចជាផ្លែគុយ ផ្សិត ដំឡូង វល្លិ និងរពាក់ជាដើម។ ការបង្កើតសហគមន៍ព្រៃឈើ ក្នុងន័យអភិរក្សព្រៃឈើ សត្វព្រៃ និងជីវចម្រុះ ដើម្បីរក្សានិរន្តរភាពបរិស្ថាន។
លោក វេង សាខុន រដ្ឋមន្ត្រីក្រសួងកសិកម្ម នាឱកាសចុះសហគមន៍ផ្ទាល់ នៅថ្ងៃទី២៦ ខែមករា បានលើកឡើងថា ការរៀបចំបង្កើតសហគមន៍ព្រៃឈើ ដោយយកគម្រោងមកអនុវត្តក្នុងសហគមន៍ផ្ទាល់ ដើម្បីជាប្រយោជន៍ក្នុងការបង្កើតគម្របព្រៃឈើឡើងវិញ អភិវឌ្ឍ និងអភិរក្សព្រៃឈើ សត្វព្រៃ ជីវ:ចម្រុះ ធានាបាននូវនិរន្តរភាពនៃការអាស្រ័យផល និងអនុផលព្រៃឈើ និងចូលរួមថែរក្សា ការពារធនធានធម្មជាតិ សម្រាប់កូនចៅជំនាន់ក្រោយ ពិសេសកែប្រែ ឬលើកកម្ពស់កម្រិតជីវភាព ធានាបានការអភិវឌ្ឍសហគមន៍ព្រៃឈើប្រកបដោយចីរភាព។
នាឱកាសនោះលោករដ្ឋមន្ត្រីកសិកម្ម បានណែនាំឲ្យមន្ទីរកសិកម្ម និងរដ្ឋបាលព្រៃឈើ កៀរគរគម្រោងថ្មីៗ ដោយជ្រើសរើសសហគមន៍ព្រៃឈើទូទាំងប្រទេស ធ្វើជាគោលដៅនៃចលនាជំរុញនិងបង្កើនផលិតកម្មស្បៀង តាមរយ:ការចិញ្ចឹមសត្វ ត្រី សាកវប្បកម្ម និងដំណាំរួមផ្សំ ដើម្បីបន្តការអភិវឌ្ឍសហគមន៍ឲ្យកាន់តែរីកចម្រើន ឈានទៅប្រែក្លាយជាសហគមន៍គំរូ និងសហគមន៍អេកូទេសចរណ៍។
លោករដ្ឋមន្ត្រី បន្ថែមថា ដើម្បីទាញយកប្រយោជន៍បន្ថែមពីធនធានព្រៃឈើ និងបង្កើនប្រភពចំណូល ពលរដ្ឋក្នុងសហគមន៍ត្រូវបង្កើតរបរបន្ថែម ដូចជាការចិញ្ចិមឃ្មុំ ដាំឫស្សី ចិញ្ចឹមសត្វ និងដាំដំណាំ រួមទាំងរៀបចំរចនាសម្ព័ន្ធផ្លូវថ្នល់ក្នុងសហគមន៍ឲ្យបានល្អ ដើម្បីពង្រីកវិស័យអេកូទេសចរណ៍ ធ្វើផ្លូវ ការពារភ្លើងឆេះព្រៃ ត្រូវបោះបង្គោលព្រំដីសហគមន៍ និងធ្វើប្លង់ដីកម្មសិទ្ធិចៀសវាងការទន្ទ្រានដីព្រៃឈើរដ្ឋធ្វើជាកម្មសិទ្ធិ។
រូបភាពលោកវេងសាខុន
សហគមន៍ព្រៃឈើព្រៃហ៊ុំ បង្កើតឡើងក្នុងឆ្នាំ២០០៦ មានផ្ទៃដីទំហំ៤០៨ហិកតា និងមានសមាជិកសរុបចំនួន៥១៧គ្រួសារ។ បច្ចុប្បន្ន ពលរដ្ឋក្នុងសហគមន៍ ប្រកបរបរដាំដុះដាំណាំ បន្លែ ចិញ្ចឹមសត្វ និងអាស្រ័យលើអនុផលព្រៃឈើ៕
លោក វេង សាខុន នាឱកាសចុះសហមន៍ព្រៃឈើព្រៃហ៊ុំ
© រក្សាសិទ្ធិដោយ thmeythmey.com