ជាតិ
លេខទូរសព្ទរបស់អ្នកប្រើហ្វេសប៊ុក៥៣៣លានគណនី ត្រូវបានជនខិលខូចដាក់លក់ក្នុងTelegram
×![]()
ភ្នំពេញ៖ អ្នកលេងហ្វេសប៊ុកប្រមាណ៥៣៣លានគណនី ដែលបានបញ្ចូលលេខទូរស័ព្ទក្នុងគណនីខ្លួននោះ ត្រូវបានជនខិលខូចដាក់លក់ក្នុងកម្មវិធី Telegram bot ដែលពួកគេបានលួចទាញយកកាលពីមុនឆ្នាំ២០១៩។ នេះបើតាមនាយកដ្ឋានប្រឆាំងបទល្មើសបច្ចេកវិទ្យា ដែលទទួលបានព័ត៌មានពីក្រុមហ៊ុនស្រាវជ្រាវផ្នែកសុវត្ថិភាពMotherboard កាលពីពេលថ្មីៗនេះ ។
បើតាមនាយកដ្ឋានប្រឆាំងបទល្មើសបច្ចេកវិទ្យា ជនខិលខូចលក់លេខទូរស័ព្ទមួយ ឬឈ្មោះហ្វេសប៊ុកមួយក្នុងតម្លៃ ២០ដុល្លារ។ ប៉ុន្តែ បើសិនមានអ្នកទិញច្រើន ពួកគេក៏មានតម្លៃលក់ដុំ ដោយលក់ក្នុងតម្លៃ ៥, ០០០ដុល្លារសម្រាប់ ១ម៉ឺនលេខទូរសព្ទផងដែរ។
លោក ជា ពៅ ប្រធាននាយកដ្ឋានប្រឆាំងបទល្មើសបច្ចេកវិទ្យា បានប្រាប់សារព័ត៌មានថ្មីៗតាមទូរសព្ទថា ករណីកើតឡើងច្រើនមកហើយក្នុងប្រទេសកម្ពុជា ។ លោកក្រើនរំលឹកដល់អ្នកប្រើប្រាស់ហ្វេសប៊ុក ត្រូវមានការប្រុងប្រយ័ត្នខ្ពស់។ លោកបានប្រាប់យ៉ាងដូច្នេះ៖«ករណីនេះមិនមែនទើបកើតមានទេ ហើយពេលនេះចំនួនករណីបែបនេះក៏ថយចុះដែរព្រោះក្រុមហ៊ុនហ្វេសប៊ុកបានអាប់ដេត ហើយអ្នកប្រើប្រាស់ក៏កាន់តែមានការប្រុងប្រយ័ត្ន»។
ប្រធាននាយកដ្ឋានប្រឆាំងបទល្មើសបច្ចេកវិទ្យា ណែនាំឲ្យអ្នកប្រើប្រាស់ហ្វេសប៊ុកឈប់ភ្ជាប់លេខទូរស័ព្ទ និងមានការប្រុងប្រយ័ត្ន នៅពេលដែលពួកគេទទួលបានសារណាមួយនោះ ព្រោះវាអាចគ្រាន់តែជាសារបោកបញ្ឆោតតែប៉ុណ្ណោះ។ ប្រធាននាយកដ្ឋានរូបនេះ បានណែនាំឲ្យអ្នកប្រើប្រាស់ហ្វេសប៊ុកយ៉ាងដូច្នេះ៖« សូមឲ្យអ្នកប្រើហ្វេសប៊ុកឈប់ប្រើលេខទូរសព្ទក្នុងហ្វេសប៊ុក ឧស្សាហ៍អាប់ដេតហ្វេសប៊ុក ហើយមិនត្រូវចែករំលែកអ្វីផ្ដេសផ្ដាសនោះទេ។
តែយ៉ាងណាប្រធាននាយកដ្ឋានប្រឆាំងបទល្មើសបច្ចេកវិទ្យារូបនេះ មិនទាន់អាចកំណត់តួលេខច្បាស់ថា មានករណីប៉ុន្មានហើយ ក្នុងប្រទេសកម្ពុជានៅឡើយទេ។ «សម្រាប់អ្នកដែលប្រព្រឹត្តបទល្មើសនេះ ត្រូវតែជាប់ពន្ធធានាគារ»។ នេះជាការបញ្ជាក់របស់លោក ជា ពៅ។
មូលហេតុដែលអាចឲ្យក្រុមជនខិលខូចទាញយកទិន្នន័យទាំងនេះបាន គឺកើតឡើងមុនពេលដែលក្រុមហ៊ុនហ្វេសប៊ុក កែសម្រួល ក្នុងខែសីហា ឆ្នាំ២០១៩។ ចំពោះទិន្នន័យភាគច្រើន ដែលជនខិលខូចប្រមូលបាន គឺជាអ្នកប្រើប្រាស់នៅក្នុងប្រទេសធំៗ ដូចជា សហរដ្ឋអាមេរិក អង់គ្លេស កាណាដា និងអូស្ត្រាលី។ នេះបើតាមនាយកដ្ឋានប្រឆាំងបទល្មើសបច្ចេកវិទ្យា៕
Tag:
បទល្មើស
បច្ចេកវិទ្យា
© រក្សាសិទ្ធិដោយ thmeythmey.com
