COVID-19
អន្តរជាតិ
ក្រុមអ្នកជំនាញ WHO ចាប់ផ្ដើមការងារ ក្រោយបញ្ចប់ការធ្វើចត្តាឡីស័កនៅវូហាន
បុគ្គលិកសុខាភិបាលសម្អាតផ្សារនៅក្រុងវូហាន។ រូបភាព៖AFP
×![]()
ក្រុមអ្នកជំនាញរបស់អង្គការសុខភាពពិភពលោក(WHO) បានបញ្ចប់ការធ្វើចត្តាឡីស័ករយៈពេល២សប្តាហ៍ហើយនៅថ្ងៃទី២៨ ខែមករា និងចាប់ផ្តើមបំពេញការងារស្វែងរកជំងឺកូវីដ-១៩ នៅទីក្រុងវូហាន។ ក្រុមអ្នកជំនាញចំនួន១៣រូប ទៅដល់ចិននៅថ្ងៃទី១៤ និងទី១៥ ខែមករា។ ក្រុមកាងារ WHO និងអ្នកជំនាញចិន នឹងរួមគ្នាវិភាគទិន្ន័យ និងសំណាកដែលយកមកពីផ្សារលក់សត្វព្រៃក្នុងក្រុងវូហាន ទីដែលជំងឺកូវីដ-១៩ ផ្ទុះឡើងដំបូង។ 
WHO និងចិនសម្រេចបានកិច្ចព្រមព្រៀងស្តីពីការស្រាវជ្រាវប្រភពជំងឺឆ្លងកូវីដ-១៩ កាលពីខែតុលា ឆ្នាំ២០២០។ ចិន ក៏បានអញ្ជើញអ្នកជំនាញរបស់WHOមកទស្សនកិច្ចនៅចិនចំនួន២ដងដើម្បីសហការក្នុងការស្វែងរកប្រភពជំងឺ និងបានជួបប្រជុំពីចម្ងាយចំនួន៤ដងផងដែរ មុននឹងអនុញ្ញាតឲ្យអ្នកជំនាញចូលមកស៊ើបអង្កេតដោយផ្ទាល់។
ក្រុមអ្នកជំនាញត្រូវបានរំពឹងថា នឹងទៅពិនិត្យផ្សារ Huanan នៅក្រុងវូហាន ទីដែលសង្ស័យថា ជាប្រភពផ្ទុះជំងឺកូវីដ-១៩ដំបូងបង្អស់។ ដូចគ្នានេះដែរ ក្រុងអ្នកជំនាញក៏អាចនឹងទៅទស្សនកិច្ចវិទ្យាស្ថានវីរុសសាស្ត្រវូហានផងដែរ។ អ្នកជំនាញទាំង១៣រូបនេះ នឹងព្យាយាមស្វែងយល់ថា តើវីរុសពិតជាមកពីសត្វប្រចៀវ ដូចជំងឺ SARS ដែលមានប្រភពក្នុងរូងប្រចៀវនៅខេត្តយូណាន ឬយ៉ាងណា?
ចំពោះការស៊ើបអង្កេតនេះ អង្គការសុខភាពពិភពលោក(WHO) សង្កត់ធ្ងន់ថា ការស្រាវជ្រាវនេះ មិនមែនស្វែងរកអ្នកដែលត្រូវបន្ទោសឡើយ ប៉ុន្តែដើម្បីយល់ដឹងពីរបៀបដែលវីរ៉ុសឆ្លងពីសត្វទៅមនុស្ស ក៏ដូចជាស្វែងរកវិធីសាស្ត្រក្នុងការបង្ការមេរោគប្រភេទនេះនាពេលអនាគត។
«ខណៈដែលជំងឺរាតត្បាតបន្តកើតមាន ការយល់ដឹងពីការចាប់ផ្តើមផ្ទុះនៃជំងឺនេះមានសារសំខាន់ក្នុងការបង្ការវីរុស SARS-CoV-2 ក្នុងឆ្លងបន្ត ក៏ដូចជាបង្ការការឆ្លងរបស់វីរុសថ្មីនាពេលអនាគត»។ នេះជាការលើកឡើងក្នុងលក្ខខណ្ឌការងាររបស់ក្រុមអ្នកជំនាញWHO។
ផ្សារ Huanan ដែលជាកន្លែងផ្ទុះជំងឺ និងត្រូវបានបិទដោយអាជ្ញាធារចិន ជាចំណុចស្នូលនៃការត្រួតពិនិត្យរបស់អ្នកជំនាញ។ ករណីជំងឺកូវីដ-១៩ ដំបូងៗជាប់ពាក់ព័ន្ធទៅនឹងផ្សារនេះ ដែលលក់គ្រឿងសមុទ្រ ក៏ដូចជាសត្វព្រៃផងដែរ។ ក្នុងរយៈពេលធ្វើចត្តាឡីស័ក២សប្តាហ៍ក្នុងសណ្ឋាគារ ក្រុមការងារបានពិភាក្សាគ្នាតាមទូរសព្ទពីតួនាទីរបស់ផ្សារនេះក្នុងការបណ្តាលឲ្យមានជំងឺឆ្លង។
គ្រួសាររបស់អ្នកដែលស្លាប់ដោយជំងឺកូវីដ-១៩វិញ ទទូចចង់ជួបពិភាក្សាជាមួយក្រុមអ្នកជំនាញុំ ប៉ុន្តែពុំទាន់មានប្រភពដែលបញ្ជាក់ថា ក្រុមការងារអាចនឹងជួបក្រុមគ្រួសារនោះឬយ៉ាងណាឡើយ។ លោកPeter Daszak សមាជិកមួយរូបនៃក្រុមនេះបញ្ជាក់ថា ក្រុមការងារទទួលបានទិន្ន័យបន្ថែមពីអាជ្ញាធរចិន។ នេះបើយោងតាមសារព័ត៌មាន Al Jazeera ។
មុនពេលក្រុមការងារមកដល់ ចិនត្រូវបានមើលឃើញថា ព្យាយាមកែប្រែដំណើរសាច់រឿងជំងឺកូវីដ-១៩ ។ លោក វ៉ាង យី ប្រមុខការទូតចិន អះអាងថា ការសិក្សាជាច្រើនបង្ហាញថា កូវីដ-១៩ ផ្ទុះឡើងនៅតំបន់ជាច្រើននៅជុំវិញពិភពលោក។ ឯសារព័ត៌មានរដ្ឋចិនធ្លាប់លើកឡើងថា ជំងឺកូវីដ-១៩ មានប្រភពក្រៅទឹកដីចិន ហើយចូលមកទឹកដីខ្លួនតាមរយៈអាហារដែលនាំចូល ឬអត្តពលិកបរទេសដែលចូលរួមកីឡាយោធានៅក្រុងវូហានក្នុងខែតុលា ឆ្នាំ២០១៩៕
Tag:
អាមេរិក
ចិន
កូវីដ-១៩
WHO
© រក្សាសិទ្ធិដោយ thmeythmey.com
