COVID-19
អន្តរជាតិ
ថៃ ពិន័យអ្នកចូលរួមពិធីជប់លៀងលើកោះដ៏មានប្រជាប្រិយភាព ព្រោះបំពានវិធានការកូវីដ-១៩
រូបថត AP
×![]()
ដោយ ឈួន ឈីវអ៊ីង
តុលាការថៃ នៅថ្ងៃទី២៨ ខែមករា បានកាត់ទោស និងដាក់ពិន័យមនុស្សជាងមួយរយនាក់ដែលចូលរួមពិធីជប់លៀងជាងមួយរយនាក់នៅក្នុងបារមួយកន្លែងលើកោះ Phangan ។ ពួកគេល្មើសវិធានការរឹតបន្តឹងនៅក្នុងអំឡុងពេលមានការរីករាលដាលកូវីដ-១៩ ។ 
ប៉ូលិសថៃ បានចាប់ខ្លួនមនុស្សយ៉ាងហោចណាស់ ១០៩នាក់ ក្នុងនោះមានជនបរទេស៨៩នាក់ មកពីអាមេរិក អង់គ្លេស រុស្ស៊ី ស្វ៊ីស និងដាណឺម៉ាកជាដើមនៅថ្ងៃទី២៦ ខែមករាកន្លងទៅ។ ពួកគេ ជាអ្នកចូលរួមពិធីជប់លៀងមួយលើកោះ Phangan ស្ថិតនៅភាគខាងត្បូងប្រទេស។ កោះ Phangan នៃខេត្តសូរ៉ាត់ថានី គឺជាទីតាំងរមណីយដ្ឋានដ៏មានប្រជាប្រិយភាពសម្រាប់ក្រុមយុវវ័យទៅលេងកំសាន្ត ពិសេសការជប់លៀងទល់ភ្លឺនៅលើឆ្នេរខ្សាច់ជាដើម។
បើតាមទីភ្នាក់ងារពត៌មាន AP ប៉ូលិសថៃបានតាមដានការធ្វើពិធីជប់លៀងនេះតាមបណ្តាញសង្គម ខណៈបារឈ្មោះ Three Sixty បានផ្សព្វផ្សាយពីកម្មវិធីអបអរគម្រប់ខួប៥ឆ្នាំរបស់ខ្លួន។
ក្នុងសវនាការពីចម្ងាយថ្ងៃទី២៨ ខែមករា តុលាការថៃបានទោសជនជាប់ចោទម្នាក់ៗឱ្យទទួលទោសជាប់ពន្ធនាគារមួយខែ តែព្យួរមួយឆ្នាំ ប្រសិនបើពួកគេបង្ហាញអត្តចរិតត្រឹមត្រូវ។ ពួកគេ ក៏ត្រូវផាកពិន័យក្នុងម្នាក់៤ពាន់បាត ស្មើនឹង ១៣០ដុល្លារផងដែរ។ ចំណែកអ្នកគ្រប់គ្រងបារ និងអ្នកលក់ស្រា២នាក់ទៀត ត្រូវបានផាកពិន័យមួយម៉ឺនបាតដែលស្មើនឹង៣៣០ដុល្លារ។ តុលាការកាត់ទោសពួកគេឱ្យជាប់ពន្ធនាគារ២ឆ្នាំ និងព្យួរទោសរយៈពេលមួយឆ្នាំ។
អ្នករៀបចំពិធីជប់លៀងនេះឈ្មោះ Pongdaran Limochakul បានទទួលស្គាល់កំហុសរបស់ខ្លួន។ លោកគិតថា ខេត្តសូរ៉ាត់ថានី មិនស្ថិតក្នុងតំបន់គ្រោះថ្នាក់ ព្រោះមិនមានករណីវិជ្ជមានថ្មី ១៤ថ្ងៃមកហើយ។ ដូច្នេះហើយលោកក៏គិតថាអាចរៀបចំធ្វើពិធីនេះបាន។
សូមបញ្ជាក់ថា ថៃបានហាមការធ្វើដំណើររបស់ភ្ញៀវទេសចរទាំងអស់ ដែលចូលប្រទេសចាប់តាំងពីខែ មេសា ឆ្នាំ២០២០ ដើម្បីការពារការរីករាលដាលជំងឺកូវីដ-១៩។ ចាប់តាំងពីចុងខែធ្នូ អាជ្ញាធរក៏រឹតបន្តឹងវិធានការកាន់តែខ្លាំងទៀតក្រោយផ្ទុះករណីឆ្លងនៅខេត្តសមុទ្រសាគរ។ គិតត្រឹមថ្ងៃទី២៨ ខែមករា ថៃមានករណីវិជ្ជមានសរុប ១៦,២២១ករណី និងមានអ្នកស្លាប់ចំនួន ៧៦នាក់៕
Tag:
ថៃ
កូវីដ-១៩
© រក្សាសិទ្ធិដោយ thmeythmey.com
