អន្តរជាតិ
ចិន ផ្ដល់ម៉ាស់ ដែលមានតម្លៃជាង៧០ម៉ឺនដុល្លារ ដល់កម្ពុជា រូបពីក្រសួងការបរទេស និងសហប្រតិបត្តិការអន្តរជាតិ
× ភ្នំពេញ៖ ចិន ផ្ដល់ម៉ាសជាង១លានម៉ាស់ ដែលមានតម្លៃ៧១៥,២០៨ ដុល្លារអាមេរិក ដល់ក្រសួងការបរទេស និងសហប្រតិបត្តិការអន្តរជាតិកម្ពុជា ដើម្បីប្រយុទ្ធប្រឆាំងជំងឺកូវីដ-១៩ ។
ក្រសួងការបរទេស បានបញ្ជាក់ថា ម៉ាសដែលភាគីចិនប្រគល់មកកម្ពុជា ចំនួន១ ,៤៣២ ,៥០០ ម៉ាស់។ ក្នុងនោះ រួមមាន Protective Mask ចំនួន ៤៥០.០០០ម៉ាស់, Surgical Mask ចំនួន ៩០០.០០០ម៉ាស់ និង Single-use Medical Face Mask ចំនួន ៨២.៥០០ ម៉ាស់។
«កាយវិការនេះគឺជាការចូលរួមចំណែកជាមួយរដ្ឋាភិបាលនៃប្រទេសទាំងពីរក្នុងការពង្រឹង និងពង្រីកទំនាក់ទំនងកម្ពុជាចិន ដែលបាននឹងកំពុងរីកចំរើនលើគ្រប់វិស័យ »។ នេះជាការលើកឡើងរបស់ក្រសួងការបរទេស ដែលបានបញ្ជាក់ថា ក្រុមហ៊ុន Baoji Taidakang Medical Technology Co.,Ltd ជាអ្នកផ្តល់អំណោយម៉ាស់នេះ។
គួរបញ្ជាក់ថា ចាប់តាំងពីផ្ទុះកូវីដ-១៩មក ភាគីចិន តែងតែផ្ដល់ជំនួយជាម៉ាស់ និងសម្ភារៈបរិក្ខាជាបន្តបន្ទាប់មកកម្ពុជា។ មិនតែប៉ុណ្ណោះចិន ក៏បានសន្យាវ៉ាក់សាំង១លានដូស សម្រាប់ការពារប្រជាជនកម្ពុជាផងដែរ។ បើតាមគម្រោងនោះ ចិន នឹងផ្ដល់វ៉ាក់សាំងកូវីដ-១៩ ចំនួន៣០ម៉ឺនដូស មកកម្ពុជាសិន នៅខែកុម្ភៈ៕
© រក្សាសិទ្ធិដោយ thmeythmey.com