ក្រុមអ្នកជំនាញអង្គការសុខភាពពិភពលោក (WHO) ចាប់ផ្តើមការងារស្វែងរកប្រភពជំងឺកូវីដ-១៩ ដោយជួបជាមួយមន្ត្រីចិន និងទស្សនកិច្ចមន្ទីរពេទ្យដែលព្យាបាលអ្នកជំងឺកូវីដ-១៩ នៅដំណាក់កាលដំបូង។ ក្រុមអ្នកជំនាញ ក្រោយធ្វើចត្តាឡីស័ករយៈពេល២សប្តាហ៍ គ្រោងនឹងជួបផងដែរអ្នកវិទ្យាសាស្ត្រចិន បុគ្គលិកសុខាភិបាល និងអ្នកជំងឺដែលឆ្លងវីរុសនេះនៅគ្រាដំបូង។
នៅមន្ទីរពេទ្យវូហាន ក្រុមការងារ WHO ជួបជាមួយលោកវេជ្ជបណ្ឌិត Zhang Jixian ប្រធានផ្នែកជំងឺផ្លូវដង្ហើមដែលកាសែតរដ្ឋចិនអះអាងថា ជាអ្នករាយការណ៍ពីជំងឺនេះដំបូងគេ។ លោក Zhang បានព្យាបាលមនុស្សវ័យចំណាស់ចំនួនពីរនាក់នាចុងឆ្នាំ២០១៩ ក្រោយពេលលទ្ធផលស្កេនបង្ហាញថា អ្នកជំងឺទាំងពីរមានអាការៈជំងឺរលាកសួតខុសពីធម្មតា។
បន្ថែមពីនេះ ក្រុមអ្នកជំនាញក៏នឹងទៅពិនិត្យទីតាំងចំនួនបីដែលជាប់ពាក់ព័ន្ធទៅនឹងការផ្ទុះជំងឺឆ្លងនេះ ដោយរួមមានវិទ្យាស្ថានវីរុសវូហាន ផ្សារលក់សត្វ Huanan និងមន្ទីរពិសោធន៍នៃមជ្ឈមណ្ឌលប្រយុទ្ធនឹងជំងឺឆ្លងវូហាន។ នេះយោងតាមសំណេរលើបណ្តាញសង្គម Twitter នៅថ្ងៃទី២៨មករា របស់អ្នកជំនាញ WHO ។
ផ្សារលក់សត្វHuanan នៅតែត្រូវគេជឿថា ជាកន្លែងនៃការឆ្លងជាចង្កោមនៃជំងឺមួយនេះ។ ចំណែកវិទ្យាស្ថានវីរុសវូហាន ដែលជាកន្លែងធ្វើតេស្តមេរោគ ត្រូវបានអតីតប្រធានាធិបតីអាមេរិក ដូណាល់ ត្រាំ និយាយដោយគ្មានភស្តុតាងថា វីរុសនេះផ្ទុះចេញពីទីនោះ។
«វាជារឿងសំខាន់ដែលត្រូវចាំថាជោគជ័យនៃបេសកកម្ម និងប្រភពនៃជំងឺ អាស្រ័យ១០០ភាគរយលើការទទួលបានព័ត៌មាន»។ នេះជាការលើកឡើងរបស់លោកស្រី Thea Fischer អ្នកជំនាញដាណឺម៉ាក។ លោកស្រីបន្តថា បើទោះបីជាក្រុមអ្នកជំនាញមានសមត្ថភាពយ៉ាងណា និងធ្វើការខ្លាំងយ៉ាងណា ការសម្រេចបានលទ្ធផលអាស្រ័យលើការគាំទ្ររបស់ចិន។
បេសកកម្មរបស់ WHO នេះ ក្លាយជារឿងរសើបសម្រាប់ចិន ក៏ដូចជាការឆ្លើយឆ្លងពាក្យសម្តីរវាងចិន និងអាមេរិក។ អាមេរិក កាលពីពាក់កណ្តាលខែមករាទាមទារឲ្យការស៊ើបអង្កេតនេះមានភាពច្បាស់លាស់ និងតម្លាភាព។ ចិន វិញតបទៅអាមេរិកនៅថ្ងៃទី២៨ មករាថា ខ្លួនប្រឆាំងដាច់ខាតការយកបេសកកម្មនេះធ្វើជារឿងនយោបាយ និងសង្កត់ធ្ងន់ថា បេសកកម្មនេះជារឿងវិទ្យាសាស្ត្រទាំងស្រុង។
លោក Tedros Adhanom Ghebreyesus អគ្គនាយកWHO វិញអះអាងថា លោកបានពិភាក្សាត្រង់ទៅត្រង់មកជាមួយលោក Ma Xiaowei រដ្ឋមន្ត្រីក្រសួងសុខាភិបាលចិន។ ក្នុងសារលើបណ្តាញសង្គមTwitter នៅថ្ងៃទី២៨ មករា លោកនិយាយថា លោកបានអំពាវនាវឲ្យចិនផ្តល់ការគាំទ្រ ការទទួលទិន្ន័យ និងការជួបជាមួយអ្នកវិទ្យាសាស្ត្រចិន តាមការតម្រូវការរបស់ក្រុមអ្នកជំនាញអន្តរជាតិ។
បេសកកម្មស្រាវជ្រាវរបស់ក្រុមអ្នកជំនាញWHO ត្រូវបានហ៊ុមព័ទ្ធដោយការពន្យារពេលដោយអាជ្ញាធរចិន ការទាស់សម្តីគ្នារវាងចិន-អាមេរិក ការចោទចិនពីការបិទបាំងការផ្ទុះនៅដំណាក់កាលដំបូង និងជាពិសេសការរិះគន់ពីអាមេរិកចំពោះការដែល WHO អនុញ្ញាតឲ្យអ្នកវិទ្យាសាស្ត្រចិនចូលរួមស្រាវជ្រាវ និងប្រមូលទិន្ន័យនៅដំណាក់កាលបឋម ។
កាលពីថ្ងៃទី២៨ ខែមករា គ្រួសាររបស់អ្នកដែលស្លាប់ដោយជំងឺកូវីដ-១៩វិញ ទទូចចង់ជួបពិភាក្សាជាមួយក្រុមអ្នកជំនាញ ប៉ុន្តែពុំទាន់មានប្រភពដែលបញ្ជាក់ថា ក្រុមការងារអាចនឹងជួបក្រុមគ្រួសារនោះឬយ៉ាងណាឡើយ៕