ជាតិ
×![]()
សៀមរាប៖ លោកតា ស៊ឹម អៃ ជាអ្នកជួសជុលប្រាសាទដែលមានវ័យចំណាស់ជាងគេ ក្នុងចំណោមអ្នកជួសជុលប្រាសាទលលៃទាំង១៧នាក់។ ដ្បិតមានវ័យ៧៦ឆ្នាំទៅហើយ ប៉ុន្តែលោក ស៊ឹម អៃ នៅតែមិនបោះបង់ការងារជួសជុលប្រាសាទនោះឡើយ ព្រោះតែលោកក្តីស្រឡាញ់ និងចង់ឲ្យប្រាសាទខ្មែរ មានវត្តមានយូរអង្វែងទៀតសម្រាប់កូនចៅខ្មែរជំនាន់ក្រោយ។
«ខ្ញុំស្រលាញ់ណាស់ប្រាសាទ បើកុំស្រលាញ់អាយុប៉ុណ្ណេះហើយមិនគួរណាមកធ្វើទេ»។ នេះជាប្រសាសន៍របស់លោកតា ស៊ឹម អៃ ដែលបច្ចុប្បន្នមានវ័យ៧៨ឆ្នាំទៅហើយ ប៉ុន្តែបុរសចំណាស់រូបនេះ នៅតែបន្តការងារ ជាអ្នកជួសជុលប្រាសាទបុរាណ នៅក្នុងខេត្តសៀមរាប។ លោក ស៊ឹម អៃ គឺជាអ្នកជួសជុលប្រាសាទមានវ័យចំណាស់ជាងគេ ក្នុងចំណោមក្រុមការងារសរុប១៧នាក់ ដែលត្រូវបានចាត់ឲ្យបំពេញការងារជួសជុល និងថែរក្សាប្រាសាទលលៃ ដែលស្ថិតក្នុងភូមិលលៃ ឃុំប្រាសាទបាគង ស្រុកប្រាសាទបាគង ខេត្តសៀមរាប។
នៅក្នុងបទសម្ភាសជាមួយសារព័ត៌មាន Thmeythmey25 លោក អៃ បានឲ្យដឹងថា លោកចាប់ផ្តើមការងារ ជាអ្នកជួសជុលប្រាសាទបុរាណ តាំងពីអំឡុងឆ្នាំ១៩៩៣មកម្ល៉េះ ក្នុងតួនាទីជាអ្នករៀបចំឥដ្ឋប្រាសាទ និងកម្ចាត់ស្មៅ ឬឫសឈើ ដែលបង្កហានិភ័យដល់ប្រាង្គប្រាសាទ។ លោក អៃ បញ្ជាក់ទៀតថា លោកមិនមែនបានជួសជុលនៅប្រាសាទលលៃនោះទេ ពោលគឺលោក ក៏ដូចជាអ្នកផ្សេងទៀត ត្រូវផ្លាស់ប្ដូរពីកន្លែងមួយ ទៅកន្លែងមួយ តាមការចាំបាច់។ លោកតា ស៊ឹម អៃ មានប្រសាសន៍ ក្នុងសម្ដីមួយៗយ៉ាងដូច្នេះ៖ «តិចគេបញ្ជូនទៅនេះ តិចគេបញ្ជូនទៅណោះ អត់ទៀង តែឥលូវនៅជាប់នឹងលលៃ»។
ឈានចូលដល់វ័យ៧៦ឆ្នាំទៅហើយ ព្រឹទ្ធិចារ្យរូបនេះ នៅតែមិនបោះបង់ការងារជួសជុលប្រាសាទនោះឡើយ បើទោះការងារនេះ លំបាកបន្តិចសម្រាប់មនុស្សវ័យចាស់ក៏ដោយ។ មូលហេតុដែល បុរសដែលមានស្រុកកំណើត នៅស្រុកប្រាសាទបាគង ខេត្តសៀមរាបនេះ មិនព្រមឈប់ព្រោះលោក ចង់ឲ្យប្រាសាទខ្មែរ វត្តមានយូរអង្វែងទៀតសម្រាប់កូនចៅខ្មែរ។ មានប្រសាសន៍លាយឡំសំណើចផង នឹងទាំងទឹកមុខញញឹម និងបង្ហាញអារម្មណ៍រំភើបលោកតា ស៊ឹម អៃ បានបន្តថា៖«ខ្ញុំស្រលាញ់ណាស់ប្រាសាទ បើកុំស្រលាញ់អាយុប៉ុណ្ណេះហើយមិនគួរណាមកធ្វើទេ តែដោយសារកិត្តិយស តម្លៃប្រាសាទខ្ពស់សម្រាប់កូនចៅទៅថ្ងៃអនាគត»។
សម្រាប់បុរសវ័យ៧៦ឆ្នាំរូបនេះ ការងារជួសជុល និងថែទាំប្រាសាទ ប្រៀបដូចការថែទាំមនុស្សចាស់ជរាដូច្នោះដែរ ដែលទាមទារការយកចិត្តទុកដាក់ អត់ធ្មត់ខ្ពស់ ពោលគឺមិនងាយស្រួលប៉ុន្មានទេ។ លោកតា អៃ មានប្រសាសន៍ដូច្នេះ៖«បើថាពិបាកដូចជាមិនពិបាកនោះទេ តែបើថាស្រួលក៏មិនស្រួលពេកដែរ ដោយត្រូវការភាពអត់ធ្មត់ និងយកចិត្តទុកដាក់ខ្ពស់។ ការងារជួសជុលប្រាសាទមានភាពលំបាកខ្លះ ដូចជាមានឫសឈើចាក់ចូលប្រាសាទដែលនាំឲ្យប៉ះពាល់ដល់សំណង់ប្រាសាទ ហើយនេះជាអ្វីដែលអ្នកជួសជុលត្រូវយកចិត្តទុកដាក់»។
ក្នុងនាមជាបុគ្គលមួយរូប ដែលបានចូលរួមជួសជុលប្រាសាទជាច្រើននៅក្នុងខេត្តសៀមរាបនេះ លោកតា ស៊ឹម អៃ អះអាងប្រាប់សារព័ត៌មានThmeythmey25 លោកពិតជាមានកិត្តិយសដែលបានជួយថែវត្តមាន និងតម្លៃប្រាសាទសម្រាប់កូនចៅជំនាន់ក្រោយ។ លោក ស៊ឹម អៃ បានផ្តល់ក្តីសង្ឃឹមទៅលើយុវជនជំនាន់ក្រោយ ក្នុងការបន្តកិច្ចការជួសជុល ថែរក្សា និងអភិរក្សប្រាសាទបុរាណ ឲ្យនៅបន្តមានវត្តមានយូរអង្វែងទៀត សម្រាប់អ្នកជំនាន់ក្រោយខណៈដែលខ្លួនកាន់តែចាស់ មិនអាចធ្វើការពេញដៃពេញជើងដូចមុន៕
Tag:
ស៊ឹមអៃ
អ្នកជួសជុលប្រាសាទ
លលៃ
សៀមរាប
© រក្សាសិទ្ធិដោយ thmeythmey.com
