ជាតិ
បទសម្ភាសន៍
វីដេអូ
ទៅពោធិ៍សាត់ កុំភ្លេចចូលភ្លក់រសជាតិទឹកគ្រឿងជ័យលាភីលេខ១ របស់អ្នកស្រី ង៉ោ ឡាង!
× ពោធិ៍សាត់៖ ទឹកគ្រឿង គឺជាម្ហូបមួយមុខ ក្នុងចំណោមម្ហូបជាច្រើន របស់អ្នកស្រី ង៉ោ ឡាង សម្រាប់ភោជនីយដ្ឋាន ខ្លាឃ្មុំ ដែលទទួលបានជ័យលាភីលេខ១ ប្រចាំខេត្តពោធិ៍សាត់ ពីការប្រកួតប្រជែងមុខម្ហូបខ្មែរទូទាំងប្រទេស របស់ក្រសួងវប្បធម៌ឆ្នាំ២០១៥។ ក្រៅពីទឹកគ្រឿង អ្នកស្រី ង៉ោ ឡាង ក៏ធ្លាប់ទទួលបានជ័យលាភីលេខ១ លើមុខម្ហូប២ផ្សេងទៀតផងដែរ គឺសម្លម្ជូរដើមចេក និងសម្លប្រហើរត្រពាំង ក្នុងកម្មវិធីដដែលនេះ។
ដើម្បីជ្រាបកាន់តែច្បាស់ សូមអញ្ជើញលោក អ្នកនាង ទស្សនាបទសម្ភាសរវាងកញ្ញា ផាត ដាណេ អ្នកសារព័ត៌មាន ThmeyThmey25 និងអ្នកស្រី ង៉ោ ឡាង ម្ចាស់ហាងខ្លាឃ្មុំ ខាងក្រោមដូចតទៅ៖
កម្មវិធីប្រកួតប្រជែងមុខម្ហូបខ្មែរ របស់ក្រសួងវប្បធម៌ ដែលធ្វើឡើងជារៀងរាល់ឆ្នាំនេះ ជាឱកាសសម្រាប់អ្នកស្រី ង៉ោ ឡាង អាចបញ្ចេញស្នាដៃធ្វើម្ហូបខ្លួន រហូតទទួលបានជ័យលាភី និងនាំឲ្យមានភាពល្បីល្បាញមកកាន់ភោជនីយដ្ឋាន។ ស្ថិតក្នុងភូមិឈើទាលខ្ពស់ ឃុំក្បាលត្រាច់ ស្រុកក្រគ ខេត្តពោធិ៍សាត់ ភោជនីយដ្ឋានខ្លាឃ្មុំ របស់អ្នកស្រី ង៉ោ ឡាង ទទួលបានការពេញនិយមខ្លាំង លើមុខម្ហូប៣មុខ ដែលទទួលបានជ័យលាភី ពិសេសបំផុតនោះគឺ ទឹកគ្រឿង។
ក្នុងបទសម្ភាសជាមួយអ្នកសារព័ត៌មាន ThmeyThmey25 ស្ត្រីវ័យ៤៧ឆ្នាំរូបនេះ លើកឡើងដូច្នេះថា៖«ទឹកគ្រឿងនេះមិនពិបាកធ្វើទេ ព្រោះមុខម្ហូបខ្មែរ មានត្រី ត្រប់ពុតលំញងជាមួយខ្ទឹមស យើងលីង បុកធ្វើម៉េចសាច់ត្រប់ជាមួយខ្ទឹមឲ្យស្មើជាមួយសាច់ត្រី ដើម្បីកាត់សាច់ត្រីកុំឲ្យឆ្អាប»។ អ្នកស្រីបន្តថា មិនមែនតែរសជាតិទឹកគ្រឿងមួយទេ តែម្ហូបនេះសំខាន់លើ អន្លក់ ច្រើនប្រភេទ ទៅតាមរដូវកាលនៃបន្លែ។
ក្រោយការប្រកួត អ្នកស្រី បានយកមុខម្ហូបវិញ្ញាសាទាំងជាប់ជ័យលាភី មកលក់ក្នុងហាងអ្នកស្រី ដែលធ្វើឲ្យមានការគាំទ្រខ្លាំងពីសំណាក់ភ្ញៀវ អំពីរសជាតិ ក៏ដូចជាសេវាកម្មផងដែរ។ អ្នកស្រី ង៉ោ ឡាង សប្បាយចិត្តណាស់ដែលខ្លួនអាចធ្វើម្ហូបប្រពៃណីខ្មែរ រហូតជាប់ចំណាត់ថ្នាក់លេខ១ទូទាំងប្រទេស នឹងអាចទាក់ទាញចិត្តភ្ញៀវជាច្រើនឲ្យមកពិសារនៅហាងរបស់ខ្លួន។
អ្នកស្រី ង៉ោ ឡាង បញ្ជាក់បន្ថែមថា ទោះបីជាខ្លួនធ្លាប់ទទួលបានជ័យលាភី លើមុខម្ហូប ៣លើកក៏ពិតមែន តែអ្នកស្រី នឹងចូលរួមប្រកួតទៀតបើសិនជាមានឱកាស ដើម្បីទទួលយកបទពិសោធល្អៗ និងពង្រឹងសមត្ថភាពខ្លួនថែមទៀតផង៕
Tag:
ពោធិ៍សាត់
ទឹកគ្រឿង
ង៉ោ ឡាង
© រក្សាសិទ្ធិដោយ thmeythmey.com