ក្រុមអភិរក្សលែងអណ្ដើកហ្លួងជិតផុតពូជ១០ក្បាលបន្ថែមទៀតក្នុងតំបន់ធម្មជាតិព្រែកស្រែអំបិល

ជាតិ

ក្រុមអភិរក្សលែងអណ្ដើកហ្លួងជិតផុតពូជ១០ក្បាលបន្ថែមទៀតក្នុងតំបន់ធម្មជាតិព្រែកស្រែអំបិល

30, Jan 2021 , 8:29 pm

រូបភាព

រូបភាពពី WCS

ដោយ:

អង្គការសមាគមអភិរក្សសត្វព្រៃប្រចាំកម្ពុជា(WCS) និងនាយកដ្ឋានអភិរក្សជលផលនៃរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ សហការជាមួយឧទ្យានសត្វព្រៃសឹង្ហបុរី បានលែងអណ្ដើកហ្លួងចំនួន ១០ក្បាលបន្ថែមឲ្យរស់នៅក្នុងតំបន់ធម្មជាតិព្រែកស្រែអំបិល ស្ថិតក្នុងឃុំចំការហ្លួង ស្រុកកំពង់សីលា ក្នុងខេត្តព្រះសីហនុ។

បើតាមលោក សោម ស៊ីថា ប្រធានគម្រោងអភិរក្សខេត្តកោះកុងនៃអង្គ WCS បានប្រាប់សារព័ត៌មានThmeyThmey25 តាមទូរសព្ទថា នៅតំបន់ប្រព័ន្ធព្រែកស្រែអំបិលដែលជាប់ខេត្តកោះកុង និងខេត្តព្រះសីហនុ ជាជម្រកតែមួយគត់របស់អណ្ដើកហ្លួង។ លោកបានបញ្ជាក់យ៉ាងដូច្នេះ៖«អណ្ដើកហ្លួងចូលចិត្តរស់នៅក្នុងទឹកសាបនិងទឹកភ្លាវ មានចំណីគ្រប់គ្រាន់ និងមានខ្សាច់ដើម្បីបន្តពូជ។ ហើយនៅព្រែកស្រែអំបិលមានដើមកោងកាង ប្រភពចំណីគ្រប់គ្រាន់ និងមានខ្សាច់ដើម្បីឲ្យអណ្ដើកហ្លួងពេញវ័យអាចបន្តពូជបាន»។

«អណ្ដើកហ្លួងដែលពេញវ័យអាចបន្តពូជបានមានអាយុចាប់ពី២០ឆ្នាំទៅ២៥ឆ្នាំ ហើយសម្រាប់អាយុកាលរបស់សត្វអណ្ដើកហ្លួងមិនត្រូវបានអ្នកសិក្សាស្រាវជ្រាវរកឃើញនោះគ្រាន់តែធ្លាប់សិក្សាដឹងថាអណ្ដើកអាយុ៥០ឆ្នាំនៅមានសុខភាពល្អអាចបន្តពូជបាន»។ នេះជាលើកឡើងរបស់លោក សោម ស៊ីថា។

ប្រធានគម្រោងអភិរក្សរូបនេះ បន្ថែមថា បញ្ហាប្រឈមសម្រាប់អណ្ដើកហ្លួង កើតឡើងពីការកាប់បំផ្លាញព្រៃឈើ ការបូមខ្សាច់ និងការនេសាទខុសច្បាប់របស់ប្រជាពលរដ្ឋ។ កត្តាទាំងនេះជាមូលហេតុដែលអង្គការ WCS បង្កើតគម្រោងអភិរក្សសត្វអណ្ដើកហ្លួង ហើយសង្ឃឹមថាវត្តមានសត្វអណ្ដើកហ្លួងនឹងឆាប់កើនឡើងក្នុងប្រទេសកម្ពុជា។

អណ្ដើកហ្លួង មានរស់នៅតែក្នុងប្រទេសកម្ពុជា ឥណ្ឌូណេស៊ី ម៉ាឡេស៊ី និងថៃ ប៉ុណ្ណោះ ហើយកម្ពុជាស្ថិតក្នុងលំដាប់ទី២ បន្ទាប់ពីប្រទេសម៉ាឡេស៊ី។ នៅកម្ពុជាមិនទាន់មានការសិក្សាពីចំនួនសត្វអណ្ដើកហ្លួងឡើយ តែតាមការប៉ាន់ប្រមាណកម្ពុជាមានប្រមាណ៣០០ក្បាល។

ក្រុមអភិរក្សបានលែងអណ្ដើកហ្លួងដែលជាសត្វជិតផុតពូជចូលក្នុងប្រព័ន្ធព្រែកស្រែអំបិល បន្ទាប់ពីការលែងលើកទី១ក្នុងឆ្នាំ២០១៥។ បន្ទាប់មកការលែងអណ្ដើកហ្លួងលើកទី២ក្នុងឆ្នាំ២០១៧ ខណៈលែងលើកទី៣ក្នុងឆ្នាំ២០១៩។ ហើយក្នុងឆ្នាំ២០២០ ក្រុមអភិរក្សបានលែងជាលើកទី៤ និងនៅថ្ងៃទី២៨ មករា ឆ្នាំ២០២១ ជាលើកទី៥ក្នុងការងារអភិរក្សអណ្ដើកហ្លួងដែលសរុបមានចំនួន ៩៦ក្បាល៕