ជាតិ
ក្រុមហ៊ុនដំណាប់ផ្លែឈើ មិសុតា កំពុងសម្លឹងឱកាសនាំចេញទៅទីផ្សារអាមេរិក
× បាត់ដំបង៖ ក្រុមហ៊ុនផលិតដំណាប់ផ្លែឈើ មិសុតា ដែលមានមូលដ្ឋានក្នុងខេត្តបាត់ដំបង កំពុងសម្លឹងមើលឱកាសដើម្បីនាំចេញទៅលក់លើទីផ្សារសហរដ្ឋអាមេរិក។ បច្ចុប្បន្នរោងចក្រនេះកំពុងរៀបចំស្ដង់ដាផលិតរបស់ខ្លួនឱ្យស្របតាមតម្រូវការទីផ្សារអន្ដរជាតិ ដើម្បីងាយស្រួលក្នុងការនាំចេញទៅលើទីផ្សារសហរដ្ឋអាមេរិក ក៏ដូចជាបណ្ដាប្រទេសមួយចំនួន។
លោក តាន់ មីសស្សែល នាយកប្រតិបត្តិក្រុមហ៊ុន មិសុតា ឱ្យដឹងថា បច្ចុប្បន្នក្រុមហ៊ុនរបស់លោកកំពុងរៀបចំស្ដង់ដាក្នុងការផលិត និងស្វែងរកដៃគូដើម្បីត្រៀមប្រកួតប្រជែងការនាំចេញទៅទីផ្សារសហរដ្ឋអាមេរិក។ លោកបន្ថែមថា ទីផ្សារសហរដ្ឋអាមេរិកគឺទូលំទូលាយ ហើយប្រជាជនមានកម្រិតជីវភាពល្អប្រសើរ ដែលជាឱកាសសម្រាប់ទីផ្សារពាណិជ្ជកម្មរបស់ក្រុមហ៊ុនដំណាប់ផ្លែឈើ មិសុតា។
យ៉ាងណាក៏ដោយ លោក តាន់ មីលស្សែល ទទួលស្គាល់ថា ក្នុងកាលៈទេសៈវិបត្តិជំងឺកូវីដ១៩នេះ ធ្វើឱ្យរាំងស្ទះដំណើរការផលិតកម្ម និងទីផ្សាររបស់ក្រុមហ៊ុនជាខ្លាំង ហើយការស្វែងរកដៃគូសម្រាប់ការនាំចេញ ក៏ត្រូវបានពន្យារពេលផងដែរ។ លោកបន្ថែមថា៖« ក្រុមហ៊ុនយើងថ្មី ធម្មតាមុនការនាំចេញទៅក្រៅប្រទេស គេត្រូវការចុះមកពិនិត្យដោយផ្ទាល់ពីសង្វាក់ផលិតកម្ម ការតាំងពិព័រណ៍ដើម្បីឱ្យគេស្គាល់ផលិតផលយើងជាដើម តែកូវីដធ្វើឱ្យការងារទាំងនោះមិនអាចធ្វើទៅបាន»។
នៅថ្ងៃទី១៩ ខែមករា ឯកអគ្គរដ្ឋទូតសហរដ្ឋអាមេរិក លោក W. Patrick Murply បានទៅទស្សនកិច្ចនៅក្រុមហ៊ុន មិសុតា។ ទីភ្នាក់ងារជំនួយសហរដ្ឋអាមេរិក តាមរយៈគម្រោង Harvest II បានផ្តល់ជំនួយមួយផ្នែកលើគ្រឿងម៉ាស៊ីន ជួយលើផ្នែកទីផ្សារ និងជួយភ្ជាប់ទំនាក់ទំនងជាមួយកសិករ ដើម្បីផ្គត់ផ្គង់ផលិតកម្មឱ្យក្រុមហ៊ុនជាដើម។ ក្នុងទស្សនកិច្ចនៅពេលនោះ លោកឯកអគ្គរដ្ឋទូតសហរដ្ឋអាមេរិក បញ្ជាក់ថា កន្លងមកកសិករខ្មែរមានការលំបាកក្នុងការស្វែងរកទីផ្សារនាំចេញ ដូច្នេះតាមរយៈកិច្ចការងារនេះ វាជាឱកាសរបស់សហរដ្ឋអាមេរិក ក្នុងការជួយជំរុញនូវការនាំចេញនូវផលិតផលទាំងនោះ ទៅកាន់ទីផ្សារក្រៅប្រទេស។
បច្ចុប្បន្ន ក្រុមហ៊ុន មិសុតា មានទីផ្សារក្នុងស្រុកខ្លះ ដូចជានៅតាមទីផ្សារទំនើបក្នុងរាជធានី និងតាមបណ្ដាខេត្តមួយចំនួន។ យ៉ាងណា លោក តាន់ មីលស្សែល ទទួលស្គាល់ថា ការគាំទ្រទីផ្សារក្នុងស្រុកនៅមានតិចតួចនៅឡើយ ដោយសារប្រជាជនមិនសូវពិសារប្រភេទផ្លៃឈើស្ងួត (ដំណាប់) ប៉ុន្មានទេ ព្រោះសម្បូរផ្លៃឈើស្រស់ច្រើន។ សម្រាប់ទីផ្សារក្រៅប្រទេស ក្រុមហ៊ុននេះបាននាំចេញទៅទីផ្សារប្រទេសជប៉ុនក្នុងកម្រិតសាកល្បងតិចតួចនៅឡើយ តែរំពឹងថា នឹងអាចពង្រីកការនាំចេញបន្ថែមទៀតក្រោយស្ងប់ស្ងាត់ជំងឺកូវីដ-១៩៕
Tag:
ពាណិជ្ជកម្ម
ដំណាប់ស្វាយ
មិសុតា
© រក្សាសិទ្ធិដោយ thmeythmey.com