ជាតិ
វីដេអូ
ឃឹម សុប៉ុច ឆ្លងកាត់បទពិសោធន៍ហាត់ការជិត១ឆ្នាំលើបច្ចេកទេសកសិកម្មទំនើបនៅអ៊ីស្រាអែល
×![]()
ភ្នំពេញ៖ ជានិស្សិតឆ្នាំទី៤ សិក្សាជំនាញវិទ្យាសាស្ត្រកសិកម្ម យុវជន ឃឹម សុប៉ុច បានជាប់ការហាត់ការរយៈពេល១១ខែ នៅប្រទេសអ៊ីស្រាអែល កាលពីឆ្នាំ២០១៩។ យុវជន ឃឹម សុប៉ុច អះអាងថា ការហាត់ការនៅប្រទេសអ៊ឹស្រាអែលមានសារសំខាន់សម្រាប់និស្សិតកម្ពុជា ពិសេសជួយឲ្យនិស្សិតកសិកម្មយល់ដឹងពីបច្ចេកទេសកសិកម្មទំនើប។ 
សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មាននៃ Thmey Thmey 25 ជាមួយលោក ឃឹម សុប៉ុច និស្សិតវិទ្យាសាស្ត្រកសិកម្មឆ្នាំទី៤ នៃសាកលវិទ្យាល័យភូមិន្ទកសិកម្មដូចតទៅ៖
ការស្រឡាញ់ និងចំណង់ចំណូលចិត្តលើការដាំដុះ ជំរុញឲ្យយុវជន ឃឹម សុប៉ុច សិក្សាជំនាញវិទ្យាសាស្ត្រកសិកម្ម និងបានប្រឡងជាប់ទៅហាត់ការរយៈពេល ១១ខែ នៅប្រទេសអ៊ីស្រាអែល។ ដើម្បីជាប់ជានិស្សិតហាត់ការនៅប្រទេសអ៊ីស្រាអែល សុប៉ុច ត្រូវឆ្លងកាត់ការប្រឡង និងត្រូវពឹងផ្អែកលើកម្រិតពិន្ទុ GPA រួមទាំងភាសាអង់គ្លេស។
និស្សិតកសិកម្មឆ្នាំទី៤រូបនេះ ប្រាប់ឲ្យដឹងថា៖ «ខ្ញុំមានគោលដៅថាទៅហាត់ការនៅប្រទេសអ៊ីស្រាអែល តាំងពីផ្ដើមចូលរៀននៅសាកលវិទ្យាល័យភូមិន្ទកសិកម្ម ហើយពេលខ្ញុំរៀនឆ្នាំទី៣ ខ្ញុំក៏ដាក់ពាក្យប្រឡង ដើម្បីទៅហាត់ការនៅប្រទេសអ៊ីស្រាអែល»។
ក្នុងបទសម្ភាសរវាងសារព័ត៌មាន Thmey Thmey 25 យុវជន ឃឹម សុប៉ុច លើកឡើងថា រយៈពេល១១ខែនៃការហាត់ការនេះ ធ្វើឲ្យរូបលោក ទទួលបានចំណេះដឹងកសិកម្មជាច្រើន ដូចជា បច្ចេកទេសកសិកម្ម ការស្រោចស្រព និងការប្រើប្រាស់គ្រឿងចក្រជាដើម។ លើសពីការហាត់ការដែលបានទទួលចំណេះដឹង សុប៉ុច ក៏បានយល់ដឹងពីរបៀបរបបនៃការរស់នៅក្នុងប្រទេសអ៊ីស្រាអែល ពិសេសការធ្វើកសិកម្មដ៏ទំនើប របស់ប្រទេសស្ដេចកសិកម្មមួយនេះ។
និស្សិតកសិកម្មវ័យ២៤ឆ្នាំរូបនេះ បន្តថា ការហាត់ការនេះ មានផលល្អសម្រាប់និស្សិត ហើយក៏មានផលលំបាកសម្រាប់លោកផងដែរ។ សុប៉ុច និយាយថា ការរស់នៅ និងវប្បធម៌របស់ប្រទេសគេ អាចជាការលំបាកសម្រាប់លោក។
ទោះជាមានផលលំបាកមួយផ្នែកក៏ដោយ តែសុប៉ុច នៅតែតស៊ូរហូតដល់បញ្ចប់ការហាត់ការដោយជោគជ័យ។ ជាមួយគ្នានេះ បច្ចេកវិទ្យាកសិកម្មទំនើបរបស់ប្រទេសអ៊ីស្រាអែល បានធ្វើឲ្យយុវជន សុប៉ុច ដក់ចិត្តចំពោះការធ្វើកសិកម្ម។ កូនអ្នកខេត្តពោធិ៍សាត់រូបនេះ ជំរុញឲ្យនិស្សិតកម្ពុជា ដែលសិក្សាជំនាញកសិកម្ម គួរទៅហាត់ការនៅប្រទេសអ៊ីស្រាអែល។
យុវជន ឃឹម សុប៉ុច បញ្ជាក់ថា៖ «និស្សិតកសិកម្ម គួរចូលរួមការហាត់ការនៅប្រទេសអ៊ីស្រាអែល ព្រោះថាវាជាមេរៀនមួយដ៏ល្អបំផុត មិនត្រឹមតែរៀនពីមេរៀនទេ ប៉ុន្តែរៀនពីមេរៀនជីវិតផងដែរ។ បន្ទាប់ពីចូលរួមហាត់ការហើយ ធ្វើឲ្យដឹងថាវិស័យកសិកម្មនេះ គេធ្វើរបៀបម៉េច ហើយត្រូវមានភាពអត់ធ្មត់ម៉េច»។ បើតាមយុវជន ឃឹម សុប៉ុច ការហាត់ការមួយនេះជំរុញឲ្យស្រឡាញ់ និងចូលចិត្តវិស័យកសិកម្មកាន់តែខ្លាំង ព្រមទាំងចង់ចូលរួមចំណែកជួយដល់កសិករ តាមរយៈមេរៀន និងបទពិសោធន៍កសិកម្ម ដែលបានជួប។
សូមបញ្ជាក់ថា តាមរយៈការសហប្រតិបត្តិការរបស់សាកលវិទ្យាល័យភូមិន្ទកសិកម្ម ជាមួយក្រុមហ៊ុន Agrostudies ផ្ដោតលើការបណ្ដុះបណ្ដាលធនធានមនុស្សផ្នែកកសិកម្ម ចាប់តាំងពីឆ្នាំ ២០០៨ ក្នុងគោលបំណងលើកម្ពស់ការអប់រំទាំងផ្នែកទ្រឹស្ដី និងការអនុវត្តសមត្ថភាពនិស្សិតបន្ថែម។ រហូត មកទល់ពេលនេះ កម្ពុជា បានបញ្ជូននិស្សិតចំនួន ១២៧១នាក់ទៅហាត់ការ នៅប្រទេសអ៊ីស្រាអែល៕
Tag:
កសិកម្ម
អ៊ីស្រាអែល
© រក្សាសិទ្ធិដោយ thmeythmey.com
