ជាតិ
សេដ្ឋកិច្ច
ក្រសួងអប់រំ ទទួលបានថវិកាជាតិជាង៨០០លានដុល្លារ សម្រាប់ចំណាយឆ្នាំ២០២១ លោក ហង់ ជួន ណារ៉ុន រដ្ឋមន្ត្រីក្រសួងអប់រំ ដឹកនាំកិច្ចប្រជុំ កន្លងមក។
× ភ្នំពេញ៖ សម្រាប់ឆ្នាំ២០២១ ក្រសួងអប់រំ យុវជន និងកីឡា ទទួលបានថវិកាជាតិជាង៨០០លានដុល្លារ ដើម្បីធានាការអនុវត្តសកម្មភាពអប់រំ ឲ្យមានគុណភាព សមធម៌ និង បរិយាប័ន្ន រួមទាំងលើកកម្ពស់ឱកាសក្នុងការសិក្សាពេញមួយជីវិតសម្រាប់ទាំងអស់គ្នា។ នេះបើតាមសៀវភៅថវិកាសង្ខេបរបស់ក្រសួងសេដ្ឋកិច្ច និងហិរញ្ញវត្ថុ។
លើសពីនេះ ការប្រើប្រាស់កញ្ចប់ថវិកាទាំងនេះ ក៏ដើម្បីធានាភាពជាអ្នកដឹកនាំ និងការគ្រប់គ្រងរបស់មន្ត្រីអប់រំគ្រប់លំដាប់ថ្នាក់ ផងដែរ។ ដើម្បីសម្រេចនូវគោលដៅទាំងនេះ ក្រសួងអប់រំបានរៀបចំកម្មវិធីអភិវឌ្ឍចំនួន៥ ក្នុងការអនុវត្តសកម្មភាពការងារប្រចាំ២០២១។
ក្នុងចំណោមកញ្ចប់ថវិកាជាង៨០០លានដុល្លារ ជាង៧០លានដុល្លារ គឺសម្រាប់អនុវត្តកម្មវិធីអភិវឌ្ឍអប់រំក្នុង-ក្រៅប្រព័ន្ធ និងមិនផ្លូវការ, ជាង៧,៥លានដុល្លារ សម្រាប់កម្មវីធីអភិវឌ្ឍឧត្តមសិក្សា និងការស្រាវជ្រាវ និងជាង១៧,៥លានដុល្លារ សម្រាប់អនុវត្តកម្មវិធីអភិវឌ្ឍវិស័យអប់រំកាយ និងកីឡា។ រីឯ ថវិកាជិត៣,៩លានដុល្លារ សម្រាប់កម្មវីធីអភិវឌ្ឍជំនាញបច្ចេកទេស ជំនាញទន់ និងសហគ្រិនភាពសម្រាប់យុវជន និង ជាង៦៥៨លានដុល្លារទៀត សម្រាប់ការគាំទ្រសេវាអប់រំ និងអភិបាលកិច្ចល្អ។
សូមជម្រាបថា សម្រាប់ឆ្នាំ២០២១នេះ ក្រសួងអប់រំ យុវជន និងកីឡា ទទួលបានថវិកាជាតិច្រើនជាងគេ ក្នុងចំណោមក្រសួង-ស្ថាប័នចំនួន៣៧របស់កម្ពុជា។ បន្ទាប់មក ក្រសួងការពារជាតិទទួលបានថវិកាជាតិ ជាង៦៤០លានដុល្លារ, ក្រសួងសុខាភិបាលទទួលបានជាង៤៣០លានដុល្លារ, ក្រសួងមហាផ្ទៃទទួលបានជាង៤២០លានដុល្លារ និង ក្រសួងសង្គមកិច្ចអតីតយុទ្ធជននិងយុវនិតីសម្បទា ទទួលបានថវិកាជាតិបានជិត៣២២លានដុល្លារ៕
© រក្សាសិទ្ធិដោយ thmeythmey.com