លោក ថោង ខុន សរសើរសហគមន៍ទេសចរណ៍ជីផាត ក្រោយពលរដ្ឋឈប់កាប់ឈើមកធ្វើអ្នកនាំភ្ញៀវទេសចរ

ជាតិ

លោក ថោង ខុន សរសើរសហគមន៍ទេសចរណ៍ជីផាត ក្រោយពលរដ្ឋឈប់កាប់ឈើមកធ្វើអ្នកនាំភ្ញៀវទេសចរ

31, Jan 2021 , 4:59 pm

រូបភាព

ដោយ:

លោក ថោង ខុន រដ្ឋមន្ត្រីក្រសួងទេសចរណ៍បានសរសើរពីសហគមន៍ទេសចរណ៍ជីផាត ដែលបានផ្លាស់ប្ដូរទម្លាប់ការរស់នៅរបស់ពលរដ្ឋប្រកបរបរកាប់បំផ្លាញព្រៃឈើ បរបាញ់សត្វ ប្ដូរមកធ្វើជាអ្នកនាំទេសចរ ឬលក់ដូរវិញ។ នេះបើតាមការអះអាងរបស់លោក ថោង ខុន ក្នុងឱកាសបើកវេទិកាជាតិអេកូទេសចរណ៍លើកទី២ ឆ្នាំ២០២១ នៅសណ្ឋាគារអង្គរ ខេត្តសៀមរាប កាលពីថ្ងៃទី២៧ មករា ឆ្នាំ២០២១។

រដ្ឋមន្ត្រីរូបនេះ បានលើកឡើងថា សហគមន៍ទេសចរណ៍ជីផាត បានបញ្ចូលសកម្មភាពទេសចរណ៍ទៅក្នុងសហគមន៍មូលដ្ឋាន ដែលធ្វើឲ្យពលរដ្ឋក្នុងសហគមន៍ទទួលបានប្រយោជន៍សេដ្ឋកិច្ចពីសហគមន៍។ ពលរដ្ឋក្នុងសហគមន៍ ឈប់ប្រកបរបរខុសច្បាប់ ឬអាជីវកម្មដែលបំផ្លាញធនធានធម្មជាតិ ដូចជាឈប់បរបាញ់សត្វ និងឈប់កាប់បំផ្លាញព្រៃឈើ ដោយប្ដូរមកធ្វើជាអ្នកនាំភ្ញៀវទេសចរ លក់ម្ហូបអាហារ លក់វត្ថុអនុស្សាវរីយ៍ ដឹកអ្នកទេសចរ បើកផ្ទះសំណាក់ និងចូលរួមសកម្មភាពផ្សេងៗដែលបម្រើដល់ការអភិវឌ្ឍអេកូទេសចរណ៍។

លោក ថោង ខុន បានលើកយ៉ាងដូច្នេះ៖«ផ្ទុយទៅវិញបើផ្នែកឯកជនមិនប្រើប្រាស់សេវារបស់សហគមន៍ ដោយមិននាំភ្ញៀវឆ្លងកាត់សហគមន៍គឺខុសនឹងគោលដៅសហគមន៍ និងផ្ទុយពីគោលការណ៍ជាតិអេកូទេសចរណ៍ ហើយវានឹងធ្វើឲ្យសហគមន៍មិនដំណើរការក្នុងរយៈពេលយូរ ពិសេសធ្វើឲ្យមានការបែកបាក់សាមគ្គីផ្ទៃក្នុងសហគមន៍ជាដើម»។

បន្ទាប់ពីឈប់បរបាញ់សត្វ និងកាប់បំផ្លាញព្រៃឈើ ពលរដ្ឋនៅតំបន់នោះក៏បានចូលរួមធ្វើជាអ្នកល្បាតការពារព្រៃឈើ។ សកម្មភាពទាំងនេះ ជាកត្តានាំឲ្យសេដ្ឋកិច្ចគ្រួសារពលរដ្ឋក្នុងសហគមន៍ទេសចរណ៍ជីផាត មានការកើនឡើងមួយកម្រិតថែមទៀត។

សហគមន៍អេកូទេសចរណ៍ជីផាត ស្ថិតនៅភូមិជីផាត ឃុំជីផាត ស្រុកថ្មបាំង ខេត្តកោះកុងដែលមានចម្ងាយ១២៦ គីឡូម៉ែត្រ ពីក្រុងខេមរភូមិន្ទ។ ភ្ញៀវទេសចរជាតិ និងអន្តរជាតិអាចធ្វើដំណើរទៅកាន់តំបន់នោះតាមផ្លូវជាតិលេខ៤៨ ត្រង់ចំណុចផ្លូវបំបែកហួសស្ពានអណ្តូងទឹកប្រហែល ៥ គីឡូម៉ែត្រ រួចបន្តដំណើរតាមផ្លូវគ្រួសក្រហម រហូតដល់ភូមិ ជីផាតតែម្តង។ សហគមន៍អេកូទេសចរណ៍ជីផាតមាន កន្លែងកម្សាន្តជាង១៥កន្លែងដូចជា តំបន់ពាង៧០ ឬភ្នំពើងនិងមឈូសបុរាណ តំបន់ពាងបុរាណអូរកី តំបន់ពាមតាខាត់ អូរស្ពាត ភ្នំត្រង៉ោល ឆាយអូសគូទ វាលប្រាក់ ឆាយទឹកវេទ ស្ទឹងព្រ័ត ថ្មអណ្តែត ដំណាក់ខូស និងអូរពាមក្រវ៉ាញ។

សហគមន៍អេកូទេសចរណ៍ជីផាត មានចំណុចទាក់ទាញខ្លាំងដូចជា ការជិះទូកកម្សាន្ត ការមើលសត្វព្រៃ ទឹកធ្លាក់ ជិះទូកចាក់បង្កងនៅពេលយប់ និងមើលសម្រស់ថ្ងៃលិចដែលជះលើផ្ទៃទឹក ពេលទេសចរជិះទូកកម្សាន្ត។ នេះបើតាមការឲ្យដឹងរបស់លោក អន សុវណ្ណ ប្រធានសហគមន៍អេកូទេសចរណ៍ជីផាត៕