ជាតិ
×![]()
ភ្នំពេញ៖ កម្ពុជា មិនទាន់អាចពឹងផ្អែកលើចំណូលពីប្រេងកាតបាននៅឡើយទេ។ សម្ដេចនាយករដ្ឋមន្ត្រី ហ៊ុន សែន ថ្លែងបែបនេះ នៅក្នុងបើកការដ្ឋានសាងសង់រោងចក្រប្រព្រឹត្តកម្មទឹកស្អាតបាក់ខែង និងសម្ពោធរោងចក្រប្រព្រឹត្តកម្មទឹកស្អាតចំការមន ដែលប្រព្រឹត្តទៅនៅខណ្ឌជ្រោយចង្វា រាជធានីភ្នំពេញ នៅព្រឹកថ្ងៃទី១ កុម្ភៈ។
សម្ដេច ហ៊ុន សែន បានបញ្ជាក់ថា កម្ពុជា អាចបូមប្រេងបាន៧,០០០ ទៅ៧,៥០០បារ៉ែល ក្នុងមួយថ្ងៃ តាមរយៈអណ្ដូងប្រេងទី១ និងទី២ ដែលបានប្រព្រឹត្តទៅអស់រយៈពេលជាង៣០ថ្ងៃនេះ។ បើតាមសម្ដេច ហ៊ុន សែន ប្រេងជាង៧ពាន់បារ៉ែលនេះ កម្ពុជាអាចរកចំណូលបាន៣០លានដុល្លារអាមេរិក ក្នុងតម្លៃ៥០ដុល្លារក្នុងមួយបារ៉ែល។
នាយករដ្ឋមន្ត្រី ចាត់ទុកចំណូលពីប្រេងនេះ ស្ថិតនៅក្នុងតំហំតូច ដែលមិនទាន់អាចឈានដល់ការទ្រទ្រង់សេដ្ឋកិច្ចកម្ពុជា។«យើងមិនទាន់ពឹងផ្អែកលើការផលិតប្រេងបានទេ»។ នេះបើតាមប្រមុខរដ្ឋាភិបាល ដែលបានបន្ថែមថា ចំណូលប្រេង៣០លានដុល្លារនេះ មិនទាន់ស្មើចំណូលសារពើពន្ធ នៃភ្ញៀវទេសចរ១លាននាក់ ដែលមកលេងកម្ពុជានោះឡើយ។
ដ្បិតមិនទាន់អាចទ្រទ្រង់សេដ្ឋកិច្ចក្តី ប៉ុន្តែសម្ដេច ហ៊ុន សែន មើលឃើញថា ចំណូលប្រេងនេះ ក៏វាជាផ្នែកមួយនៃដំណើការរីកចម្រើនឧស្សាហកម្មរ៉ែកម្ពុជា។
កម្ពុជា បានរកឃើញទីតាំងប្រេង នៅក្នុងប្លុក A មួយហើយ ដែលអាចផលិតប្រេងបាន៣០លានបារ៉ែល។ ក្រៅពីប្លុក Aនេះ ប្រេងនៅលើដែនទឹកកម្ពុជា នៅសល់៥ប្លុកទៀត ខណៈនៅលើដែនគោក មាន១៩ប្លុកដែរ។ នេះបើតាមលោក ជៀប សួរ អគ្គនាយកដ្ឋានប្រេងកាត នៃក្រសួងរ៉ែ និងថាមពល។
លោក ជៀប សួរ បានបញ្ជាក់ថា ក្នុងចំណោមទីតាំងប្រេងនៅដែនទឹកកម្ពុជា ចំនួន៥ប្លុកទៀតនោះ គឺមាន ប្លុកD ត្រូវបានក្រុមហ៊ុនបរទេសមួយ ចុះកិច្ចព្រមព្រៀងអភិវឌ្ឍន៍ផលិតប្រេងហើយ។ ដូច្នេះនៅប្លុកប្រេង៤ទៀត ដែលរង់ចាំការបោះទុនវិនិយោគពីបរទេស។
មិនមែនតែដែនទឹកទេ ក្នុងដែនគោកវិញ ក៏មានតំបន់ប្រេងដែរ។ លោក ជៀប សួរ បានបញ្ជាក់ថា ប្រេងនៅដែនគោក មានចំនួន១៩ប្លុកទៀត ដែលត្រូវការក្រុមហ៊ុនសហការវិនិយោគ។
កាលពីចុងឆ្នាំ២០២០សម្ដេចនាយករដ្ឋមន្ត្រី ហ៊ុន សែន បានប្រកាសថា រដ្ឋាភិបាលនឹងយកចំណូលបានពីការលក់ប្រេងនេះ ទៅផ្គត់ផ្គង់លើវិស័យអប់រំ និងសុខាភិបាល។ សម្ដេច ហ៊ុន សែន ចាត់ទុកការផលិតបានប្រេងកាតនេះ នឹងជួយកម្ពុជាបង្កើតបាននូវពិពិធកម្មខឿនឧស្សាហកម្មក្នុងវិស័យប្រេងកាត និងការកសាងសមត្ថភាពជាតិនៅក្នុងវិស័យនេះមួយកម្រិតទៀត៕
Tag:
ហ៊ុន សែន
ប្រេងកាត
© រក្សាសិទ្ធិដោយ thmeythmey.com
