បង់ក្លាដែស សង្ឃឹមមីយ៉ាន់ម៉ារក្សាផែនការមាតុភូមិនិវត្តន៍ជនជាតិរ៉ូហ៊ីងយ៉ា ទោះមានរដ្ឋប្រហារក្ដី

អន្តរជាតិ

បង់ក្លាដែស សង្ឃឹមមីយ៉ាន់ម៉ារក្សាផែនការមាតុភូមិនិវត្តន៍ជនជាតិរ៉ូហ៊ីងយ៉ា ទោះមានរដ្ឋប្រហារក្ដី

01, Feb 2021 , 6:19 pm

រូបភាព

ដោយ ឈួន ឈីវអ៊ីង

បង់ក្លាដែស អំពាវនាវឱ្យមានសន្តិភាព និងស្ថិរភាពនៅមីយ៉ាន់ម៉ាឡើងវិញបន្ទាប់ពីការធ្វើរដ្ឋប្រហារយោធានៅថ្ងៃទី០១ ខែកុម្ភៈ។ បង់ក្លាដែស ក៏សង្ឃឹមថាមីយ៉ាន់ម៉ារក្សាការប្ដេជ្ញាចិត្តរបស់ខ្លួនក្នុងការធ្វើមាតុភូមិនិវត្តន៍របស់ក្រុមជនជាតិភាគតិចរ៉ូហ៊ីងយ៉ា។

«យើងបានប្រឹងប្រែងក្នុងការអភិវឌ្ឍទំនាក់ទំនងដែលផ្ដល់ប្រយោជន៍ទៅមកជាមួយមីយ៉ាន់ម៉ា និងបានធ្វើការជាមួយគ្នាដើម្បីការធ្វើមាតុភូមិនិវត្តន៍ក្រុមជនជាតិភាគតិចរ៉ូហ៊ីងយ៉ាចេញពីបង់ក្លាដែសដោយឈរលើគោលការណ៍ស្ម័គ្រចិត្ត សុវត្ថិភាព និងនិរន្តរភាព។ យើងសង្ឃឺមថា ដំណើរការទាំងនេះនឹងបន្តទៅមុខទៀតដោយភាពស្មោះត្រង់។» នេះជាការលើកឡើងរបស់ក្រសួងការបរទេសបង់ក្លាដែសក្នុងសេចក្តីថ្លែងការណ៍មួយថ្ងៃទី១ ខែកុម្ភៈ ក្រោយរដ្ឋប្រហារយោធានៅមីយ៉ាន់ម៉ា។

យោធាមីយ៉ាន់ម៉ា បានឃាត់លោកស្រី អ៊ុងសាន ស៊ូជី ជាមួយនឹងមេដឹកនាំដទៃទៀតក្នុងជួរបក្សសម្ព័ន្ធជាតិដើម្បីប្រជាធិបតេយ្យ។ មីយ៉ាន់ម៉ា ក៏ស្ថិតក្នុងភាពអាសន្នមួយឆ្នាំទៀតផង។

សេចក្ដីថ្លែងការណ៍ក្រសួងការបរទេសបង់ក្លាដែសបន្តថា បង់ក្លាដែស សង្ឃឹមថា ដំណើរការប្រជាធិបតេយ្យ និងការរៀបចំរដ្ឋធម្មនុញ្ញ នឹងត្រូវប្រកាន់ខ្ជាប់ដដែល ហើយក្នុងនាមជាមិត្តជិតខាងគ្នា បង់ក្លាដែសក៏ចង់ឃើញមីយ៉ាន់ម៉ាមានសន្តិភាព និងស្ថិរភាពឡើងវិញផងដែរ។ នេះបើតាមការផ្សាយរបស់ទីភ្នាក់ងារព័ត៌មាន Reuters ។

សូមបញ្ជាក់ថា បង់ក្លាដែស បានផ្តល់ជាជម្រកឱ្យក្រុមជនជាតិភាគតិចរ៉ូហ៊ីងយ៉ាប្រមាណ១លាននាក់ ដែលបានភៀសខ្លួនពីការធ្វើទុក្ខបុកម្នេញនៅមីយ៉ាន់ម៉ា។ កេរ្តិ៍ឈ្មោះរបស់លោកស្រី ស៊ូជី ក៏ខូចខាតដោយសាររឿងនេះដែរ ព្រោះលោកស្រីមិនអាចបញ្ឈប់ការបណ្ដេញជនជាតិភាគតិចរ៉ូហ៊ីងយ៉ា រាប់ពាន់នាក់ចេញពីភាគខាងលិចប្រទេសឆ្នាំ២០១៧ មក៕