កីឡាអន្តរជាតិ
អន្តរជាតិ
Klopp សារភាពថា Liverpool មិនអាចការពារជើងឯក EPL បានទេ ក្រោយចាញ់ Brighton
× បន្ទាប់ពី Liverpool រងបរាជ័យក្រោមថ្វីជើង Brighton & Hove Albion ១-០ លោក Jurgen Klopp សារភាពថាក្រុមរបស់លោកមិនអាចការពារតំណែងជើងឯក Premier League រដូវកាលនេះបានឡើយ។ ហង្សក្រហមឈ្នះតែ២លើកប៉ុណ្ណោះ ចំណោម៧ប្រកួតចុងក្រោយ ក្នុងនោះចាញ់២លើកនៅទឹកដី Anfield តែម្ដង។
ខ្សែប្រយុទ្ធ Steven Alzate ជាអ្នកបំប៉ោងសំណាញ់ទីរបស់ Liverpool នៅនាទី៥៦នៃវគ្គទី២ ដើម្បីជួយ Brighton ទទួលបាន៣ពិន្ទុបន្ថែមពីការប្រកួតលីគសប្តាហ៍ទី២២ នៅរាត្រីថ្ងៃទី៣ ខែកុម្ភៈ។ ជ័យជម្នះដ៏គាប់ប្រសើរក្នុងលទ្ធផល ១-០ លើក្រុមខ្លាំងនេះគ្រប់គ្រាន់ក្នុងការជួយ Brighton គេចឆ្ងាយពីតំបន់ត្រូវកាត់ចោលទៅលីគទី២ផងដែរ។
ផ្ទុយទៅវិញ បរាជ័យក្នុងដីដ៏អាម៉ាស់របស់ក្រុមរហស្សនាមហង្សក្រហម បានធ្វើឱ្យពួកគេតាមពីក្រោយពិន្ទុក្រុមកំពូលតារាង Manchester City ចំនួន៧ពិន្ទុ និងសល់១ប្រកួតក្នុងដៃថែមទៀត។
ដោយមើលឃើញពីស្ថានភាព និងកម្រិតក្រុមបច្ចុប្បន្ន អ្នកចាត់ការទូទៅ Jurgen Klopp សារភាពថាក្រុមរបស់លោកប្រហែលជាមិនអាចមានលទ្ធភាពក្នុងការដណ្តើមតំណែងជើងឯក ឬការពារជើងឯកលីគកំពូលអង់គ្លេសរដូវកាលបាននោះទេ។
ក្រោយបញ្ចប់ការប្រកួតជាមួយលទ្ធផលខកចិត្តនៅ Anfield លោក Klopp បានប្រាប់អ្នកកាសែតថា៖ «យើងមានគម្លាតពិន្ទុឆ្ងាយពី Man City …ខ្ញុំជាអ្នកចាត់ការទូទៅ Liverpool ដូច្នេះខ្ញុំត្រូវតែនិយាយថាយើងចង់ក្លាយជាម្ចាស់ជើងឯក។ ពិតណាស់យើងអាចធ្វើបាន ប៉ុន្តែអ្នកត្រូវការការប្រកួតសម្រាប់ទទួលបានវា ប៉ុន្តែពេលនេះយើងមិនមាននោះទេ»។
ដោយឡែក Man City បានបន្តជ័យជម្នះរបស់ខ្លួនក្រោយឈ្នះ Burnley ២-០។ ៣ពិន្ទុបន្ថែមនេះ បានធ្វើឱក្រុមលោក Pep Guardiola កើនដល់៤៧ពិន្ទុ នាំមុខក្រុមលេខ២ Manchester United ចំនួន៣ពិន្ទុ ហើយសល់មួយប្រកួតក្នុងដៃផង។
ក្រុមរហស្សនាមមេឃខៀវ នឹងត្រូវធ្វើដំណើរទៅ Anfield ដើម្បីតតាំងជាមួយម្ចាស់ការពារជើងឯក Liverpool នៅសប្តាហ៍ក្រោយ។ ប្រសិនបើ Man City អាចរកបាន៣ពិន្ទុក្នុងជំនួបនេះ មានន័យថាការសារភាពរបស់លោក Klopp ពិតជាមិនខុសឡើយ។
ជំនួបដទៃទៀតមាន Fulham ចាញ់ Leicester City ២-០, Leeds United ចាញ់ Everton ២-១ និង Aston Villa ចាញ់ West Ham United ៣-១៕
Tag:
Premier League
Jurgen Klopp
© រក្សាសិទ្ធិដោយ thmeythmey.com