រដ្ឋបាលលោកប្រធានាធិបតីចូ បៃឌិន បញ្ជាក់នៅថ្ងៃទី៣ ខែកុម្ភៈ ថា អាមេរិកបន្តទទួលស្គាល់អតីតប្រធានសភាវេណេស៊ុយអេឡា លោក ហ័ន ក្វៃឌូ ជាប្រធានាធិបតីស្តីទីស្របច្បាប់ដដែល ហើយបដិសេធការចរចាជាមួយរដ្ឋាភិបាលរបស់លោកប្រធានាធិបតី នីកូឡាស់ ម៉ាឌុយរ៉ូ។ រដ្ឋបាលអាមេរិកថ្មី ក៏បន្តហៅលោក ម៉ាឌុយរ៉ូ ជាមនុស្សផ្តាច់ការ ហើយបន្តដាក់ទណ្ឌកម្មលើថ្នាក់ដឹកនាំប្រទេសនេះ មិនខុសអ្វីពីរដ្ឋបាលរបស់អតីតប្រធានាធិបតី ដូណាល់ ត្រាំ ឡើយ។
រដ្ឋបាលប្រធានាធិបតី ចូ បៃឌិន បានបង្ហាញគោលនយោបាយការបរទេសដ៏លម្អិតរបស់ខ្លួនទាក់ទងនឹងវ៉េណេស៊ុយអេឡានៅថ្ងៃទី៣ ខែកុម្ភៈ។ លោក Ned Price អ្នកនាំពាក្យក្រសួងការបរទេសអាមេរិក និយាយថា អាមេរិកនឹងដាក់ទណ្ឌកម្មមន្ត្រី និងមនុស្សពាក់ព័ន្ធក្នុងអំពើពុករលួយ និងរំលោភសិទ្ធិមនុស្សនៅប្រទេសនេះ។
«គោលដៅរបស់រដ្ឋបាល បៃឌិន-ហារីស គឺគាំទ្រអន្តរកាលប្រជាធិបតេយ្យដោយសន្តិវិធី តាមរយៈការបោះឆ្នោតប្រធានាធិបតី និងសភាដោយសេរី និងយុត្តិធម៌»។ នេះជាការលើកឡើងរបស់លោក Price ក្នុងសន្និសីទសារព័ត៌មានថ្ងៃទី៣ កុម្ភៈ ដោយបន្តហៅប្រធានាធិបតី នីកូឡាស់ ម៉ាឌុយរ៉ូ ជាបុគ្គលផ្តាច់ការ។
អាមេរិក នៅតែបន្តទទួលស្គាល់លោក ហ័ន ក្វៃដូ ជាប្រធានាធិបតីស្តីទីដដែលដោយមិនមានការផ្លាស់ប្ដូរឡើយ។ ប្រទេសលោកខាងលិច រួមមានសហភាពអឺរ៉ុបផងដែរ បានទទួលស្គាល់លោក ក្វៃដូ ជាប្រធានាធិបតីស្តីទីវ៉េណេស៊ុយអេឡា ក្រោយពេលបណ្តារប្រទេសទាំងនោះមិនទទួលស្គាល់ការបោះឆ្នោតក្នុងឆ្នាំ២០១៨ ដែលរៀបចំដោយលោក ម៉ាឌុយរ៉ូ ។
ចំពោះលទ្ធភាពក្នុងការចរចានាពេលអនាគតជាមួយរដ្ឋាភិបាលប្រធានាធិបតី ម៉ាឌុយរ៉ូ វិញ លោកPrince បញ្ជាក់ថា អាមេរិក មិនរំពឹងនឹងមានការចចារណាមួយនាពេលខាងមុខឡើយ។ លោក ម៉ាឌុយរ៉ូ បន្តកាន់អំណាចនៅវ៉េណេស៊ុយអេឡាបានដោយសារមានជំនួយពីអ៊ីរ៉ង់ ចិន រុស្ស៊ី និងគុយបា។ បច្ចុប្បន្ននេះ វេណេស៊ុយអេឡារងទណ្ឌកម្មសេដ្ឋកិច្ចពីអាមេរិក និងសហភាពអឺរ៉ុប ចំណែកសេដ្ឋកិច្ចប្រទេសនេះវិញរលំដោយសារការធ្លាក់ចុះនៃតម្លៃប្រេងឆៅ។
ប៉ុន្តែកាលពីសប្តាហ៍មុន សហភាពអឺរ៉ុបបញ្ជាក់ថា ខ្លួនលែងទទួលស្គាល់លោក ក្វៃដូ ជាប្រធានាធិបតីស្តីទីទៀតហើយ។ នេះដោយសារតែលោក ក្វៃដូ បាត់បង់តំណែងជាប្រធានរដ្ឋសភា ក្រោយការបោះឆ្នោតរដ្ឋសភានីតិកាលថ្មី នៅចុងឆ្នាំ២០២០ ដែលក្រុមបក្សប្រឆាំងពហិការ។ សហភាពអឺរ៉ុប និងអាមេរិក ក៏ពុំទទួលស្គាល់ការបោះឆ្នោតរដ្ឋសភាឆ្នាំ២០២០ នេះដែរ។
ការបោះឆ្នោតរដ្ឋសភាវ៉េណេស៊ុយអេឡាឆ្នាំ២០២០ នាំឱ្យបក្សកាន់អំណាចរបស់លោក នីកូឡាស ម៉ាឌុយរ៉ូ គ្រប់គ្រងស្ថាប័ននីតិបញ្ញត្តិ ដែលជាស្ថាប័នចុងក្រោយគ្រប់គ្រងដោយបក្សប្រឆាំងក្នុងការបោះឆ្នោតរដ្ឋសភាកាលពីឆ្នាំ២០១៥ ដែលគ្រានោះលោក ក្វៃដូ ត្រូវបានតែងតាំងជាប្រធានរដ្ឋសភា។
ចំពោះរឿងទណ្ឌកម្មវិញ លោក Prince អះអាងថា រដ្ឋបាលលោកបៃឌិន នឹងសម្របសម្រួលជាមួយសម្ព័ន្ធមិត្ត និងដៃគូដើម្បីជំរុញដំណើការនៃលទ្ធិប្រជាធិបតេយ្យក្នុងប្រទេសនេះ។ យ៉ាងណាក្តី លោកPrince ពុំបានទាមទារឱ្យទម្លាក់លោក ម៉ាឌុយរ៉ូ ចេញពីតំណែង ដូចអ្វីដែលមន្ត្រីអាមេរិកក្រោមការដឹកនាំរបស់លោក ត្រាំ បានទាមទារឡើយ៕