កីឡាអន្តរជាតិ
អន្តរជាតិ
អាមេរិក មិនរារាំងអត្តពលិកខ្លួនចូលរួមអូឡាំពិករដូវរងារក្រុងប៉េកាំង
× រដ្ឋបាលរបស់ប្រធានាធិបតីអាមេរិក ចូ បៃឌិន គ្មានផែនការរារាំងអត្តពលិកអាមេរិកចូលរួមក្នុងព្រឹត្តិការណ៍កីឡាអូឡាំពិករដូវរងារក្រុងប៉េកាំងឆ្នាំ២០២២ នោះទេ បើទោះចិនកំពុងទទួលការរិះគន់យ៉ាងខ្លាំងជុំវិញបញ្ហាសិទ្ធិមនុស្សក្នុងប្រទេសក៏ដោយ។
ក្រុមអ្នកតស៊ូមតិពាក់ព័ន្ធបញ្ហាសិទិ្ធមនុស្ស ថ្មីៗនេះបានការទាមទារឱ្យគណៈកម្មាធិការអូឡាំពិកអន្តរជាតិ (IOC) ដកព្រឹត្តិការណ៍កីឡាអូឡាំរដូវរងារដែលនឹងធ្វើនៅខែកុម្ភៈ ឆ្នាំ ២០២២ ចេញពីប្រទេសចិន។
ស្របពេលគ្នានេះដែរ សមាជិកព្រឹទ្ធសភាគណបក្សសាធារណរដ្ឋមួយក្រុមនៅថ្ងៃទី៣ ខែកុម្ភៈក៏បានអំពាវនាវឱ្យមានការផ្លាស់ប្តូរព្រឹត្តិការណ៍កីឡានេះបន្ទាប់ពីអាមេរិកបានអះអាងថា រដ្ឋាភិបាលចិនប្រព្រឹត្តអំពើប្រល័យពូជសាសន៍ប្រឆាំងនឹងជនជាតិមូស្លីមវីហ្គ័រនៅក្នុងតំបន់ស៊ីនជាំង។ នេះបើតាមបើតាមការផ្សាយរបស់ទីភ្នាក់ងារព័ត៌មាន Reuters។
ជុំវិញករណីខាងលើ អ្នកនាំពាក្យសេតវិមានលោកស្រី Jen Psaki អះអាងថា អាមេរិកនឹងមិនហាមអត្តពលិកខ្លួនក្នុងការចូលរួមព្រឹត្តិការណ៍កីឡានេះឡើយ។ អ្នកនាំពាក្យរូបនេះ បានប្រាប់ក្នុងសន្និសីទសារព័ត៌មានមួយនៅថ្ងៃទី៤ កុម្ភៈនេះថា៖ «ឥឡូវនេះយើងមិននិយាយអំពីការផ្លាស់ប្តូរឥរិយាបថ ឬផែនការរបស់យើងឡើយ ទោះវាទាក់ទងនឹងព្រឹត្តិការណ៍អូឡាំពិកទីក្រុងប៉េកាំង»។
លោកស្រី Psaki បន្ថែមថា រដ្ឋបាលរបស់ប្រធានាធិបតីអាមេរិក ចូ បៃឌិន បានពិគ្រោះយោបល់ជាមួយសម្ព័ន្ធមិត្ត និងដៃគូគ្រប់ជាន់ថ្នាក់អំពីការធ្វើទុក្ខបុកម្និញលើជនជាតិភាគតិចវីហ្គ័រពីសំណាក់ចិន ប៉ុន្តែគ្មានការពិភាក្សាណាមួយអំពីការធ្វើពហិការមិនចូលរួមអូឡាំពិករដូវរងារឆ្នាំ២០២២ ឡើយ។
បើមិនមានការប្រែប្រួលទេ ព្រឹត្តិការណ៍កីឡាអូឡាំពិករដូវរងារក្រុងប៉េកាំងឆ្នាំ២០២២ និងជាលើកទី២៤ នឹងចាប់ផ្តើមការប្រកួតផ្លូវការពីថ្ងៃទី៤ ខែកុម្ភៈ រហូតដល់ថ្ងៃទី២០ ខែកុម្ភៈ៕
Tag:
Olympic Winter
វីហ្គ័រ
© រក្សាសិទ្ធិដោយ thmeythmey.com