កីឡាអន្តរជាតិ
អន្តរជាតិ
×![]()
ដោយ: ទេព ពិទូរ្យ
លោក Jose Mourinho បង្ហាញការមិនសប្បាយចិត្តឡើយដែលក្រុម Tottenham Hotspur ចាញ់ក្លិបចាស់ Chelsea ១-០ ដោយការផ្តល់បាល់ប៉េណាល់ទីដែលមិនសមហេតុផល នាជំនួប Premier League រាត្រីថ្ងៃទី៤ កុម្ភៈ។ លោក Mourinho អះអាងថា ខ្លួនពិតជាពិបាកទទួលយកមែនទែនដែលអាជ្ញាកណ្តាលឱ្យបាល់ពិន័យនេះ។
មិនមានការតវ៉ាអ្វីឡើយពីសំណាក់ Eric Dier ខ្សែការពារ Spurs បន្ទាប់ពីធ្វើឱ្យ Timo Werner ដួលក្នុងប្រអប់ទី ហើយត្រូវអាជ្ញាកណ្តាលលោក Andre Marriner ភ្លុំកញ្ចែផ្តល់បាល់ពិន័យ១១ម៉ែត្រ។ ខ្សែបម្រើ Jorginho រ៉ាប់រងការទាត់បាល់ពិន័យនេះ និងធ្វើបានសម្រេចនៅនាទី២៤ ដើម្បីផ្តល់ជ័យជម្នះដល់ Chelsea ដែលមានលោក Thomas Tuchel ជាអ្នកចាត់ការទូទៅ។
ក្រោមការដឹនាំរបស់ Tuchel ៣ប្រកួត បន្ទាប់ពីឡើងទៅជំនួសលោក Frank Lampard ក្រុមរហស្សនាមតោខៀវរកបាន៧ពិន្ទុបន្ថែម និងឡើងទៅចំណាត់ថ្នាក់ទី៦ក្នុងតារាងលីគកំពូលអង់គ្លេសពីលើ Spurs ដែលធ្លាក់ទៅលេខ៨វិញ។
ក្រុមរហស្សនាមមាន់ខ្នាយមាសចាញ់៣ប្រកួតជាប់គ្នាចុងក្រោយ ដោយគ្មានវត្តមានប្រធានក្រុម Harry Kane ដែលរងរបួស។ យ៉ាងណា Mourinho ទទួលស្គាល់ថាក្រុមរបស់លោកធ្វើការយ៉ាងលំបាកហើយ។
អ្នកចាត់ការសញ្ជាតិព័រទុយហ្គាល់បានប្រាប់ទូរទស្សន៍ BT Sport ថា៖ «វាជាការតស៊ូ ប៉ុន្តែតើពួកគេមានឱកាសប៉ុន្មាន? យើងមិនបានបង្កើតឱកាសដូចគ្នានៅតង់ទី១ ប៉ុន្តែការតស៊ូគឺជាការពិន័យប៉េណាល់ទី។ ការប្រកួតត្រូវបញ្ចប់ដោយសារការពិន័យនេះ។ ពួកគេស៊ុតបាល់ប៉េណាល់ទីដែលមិនសមនឹងពិន័យដែលបង្កដោយស្ថានភាពគ្រោះថ្នាក់ ៥០-៥០ ប៉ុណ្ណោះ។ នេះជាការពិន័យដែលពិបាកទទួលយក ហើយបរាជ័យបែបនេះគឺឈឺចាប់ណាស់»។
ក្រោយចាញ់៣ប្រកួតជាប់គ្នា Spurs បានធ្លាក់ទៅលេខ៨ក្នុងតារាងដោយរកបាន៣៣ពិន្ទុ ពីការប្រកួត២១លើក ខណៈ Chelsea ដែលប្រកួត២២លើកមាន៣៦ពិន្ទុ តាមពីក្រោយតំបន់ Top4 តែ៤ពិន្ទុប៉ុណ្ណោះ៕
Tag:
Premier League
Jose Mourinho
© រក្សាសិទ្ធិដោយ thmeythmey.com
