អន្តរជាតិ
លោក បៃឌិន ថា អាមេរិកនឹងប្រកៀកស្មាជាមួយសម្ពន្ធមិត្តវិញ តែប្រកាន់ជំហរតឹងដាក់ចិននិងរុស្ស៊ី លោកប្រធានាធិបតីអាមេរិកចូ បៃឌិន។ រូបភាព៖ AFP
× ប្រធានាធិបតីអាមេរិក ចូ បៃឌិន នៅថ្ងៃទី៤ កុម្ភៈ សន្យាបង្កើតគោលនយោបាយការបរទេសថ្មីក្រោមការដឹកនាំរបស់លោក។ ក្នុងសុន្ទរកថាលើកដំបូងស្តីពីគោលនយោបាយការបរទេស លោក បៃឌិន ប្រកាសថាអាមេរិកត្រឡប់មកវិញក្នុងឆាកអន្តរជាតិ ដោយវិស័យការទូត ជាអាទិភាពនៃទំនាក់ទំនងការបរទេសពិសេសជាមួយសម្ពន្ធមិត្តដែលស្រងាកចិត្តបួនឆ្នាំមកនោះ។ ប៉ុន្តែជាមួយចិន និងរុស្ស៊ី លោក បៃឌិន នឹងមិនប្រើគោលនយោបាយការបរទេសទន់ភ្លន់ឡើយ។
«អាមេរិកក្នុងនាមជាអ្នកដឹកនាំ ត្រូវប្រឈមទៅនឹងការកើនឡើងរបបផ្តាច់ការ រួមមានការកើនឡើងមហិច្ឆតារបស់ចិនដែលប្រឆាំងជាមួយអាមេរិក ក៏ដូចជាការប្រឹងប្រែងរបស់រុស្ស៊ីក្នុងការរំខាន និងកម្ទេចលទ្ធិប្រជាធិបតេយ្យ»។ នេះជាការលើកឡើងរបស់លោក ចូ បៃឌិន ក្នុងសុន្ទរកថានៅក្រសួងការបរទេសនៅថ្ងៃទី៤ ខែកុម្ភៈ។ អាមេរិកនឹងពន្លឿនកិច្ចខំប្រឹងប្រែងក្នុងការប្រឈមនឹងបញ្ហាផ្សេងទៀត រាប់ចាប់តាំងពីបញ្ហាជំងឺឆ្លង បម្រែបម្រួលអាកាសធាតុ រហូតដល់ការសាយភាយអាវុធនុយក្លេអ៊ែរ។
លោកបៃឌិន ក៏មិនភ្លេចលើកឡើងពីការធ្វើការជាមួយសម្ពន្ធមិត្តក្នុងការដោះស្រាយបញ្ហាឡើយ។ ប្រធានាធិបតីអាមេរិក និយាយចាត់ទុកសម្ពន្ធភាពជាមួយដៃគូ ជាទ្រព្យដ៏ធំធេង។ លោកសង្កត់ធ្ងន់ថា ការដឹកនាំលើឆាកអន្តរជាតិដោយយកវិស័យការទូតជាអាទិភាព មានន័យថាអាមេរិកប្រកៀកស្មាជាមួយសម្ព័ន្ធមិត្ត និងដៃគូរជាថ្មីម្តងទៀត។ សម្រាប់លោកបៃឌិន ការវិនិយោគលើវិស័យការទូត មិនមែនត្រឹមតែជារឿងត្រឹមត្រូវដែលត្រូវធ្វើប៉ុណ្ណោះទេ តែអាមេរិកអាចរស់ក្នុងសន្តិភាព សុវត្ថិភាព និងវិបុលភាព។
ទន់ភ្លន់ជាមួយដៃគូមែន អាមេរិកមិនធ្វើដូចគ្នានេះជាមួយចិន និងរុស្ស៊ីឡើយ។ ចំពោះទំនាក់ទំនងជាមួយរុស្ស៊ី លោក បៃឌិនថា អាមេរិក នឹងមិនឱ្យរុស្ស៊ីរួចខ្លួនទៀតឡើយចំពោះការជ្រែតជ្រែកក្នុងការបោះឆ្នោត សកម្មភាពឈ្លានពាន ការវាយប្រហារប្រព័ន្ធអ៊ីនធឺណិត និងការបំពុលពលរដ្ឋរបស់ខ្លួននោះ។
ចំណែក ចិន ដែលមានទំនាក់ទំនងការទូតដុនដាបជាមួយអាមេរិកបួនឆ្នាំកន្លងមក ក៏មិនអាចរំពឹងថានឹងមានភាពប្រសើរឡើងក្នុងរដ្ឋបាលលោក បៃឌិន ដែរ។
លោក បៃឌិន ថាអាមេរិក នឹងតទល់ជាមួយចិនចំពោះការបំពានក្នុងវិស័យសេដ្ឋកិច្ច កម្មសិទ្ធិបញ្ញា សិទ្ធិមនុស្ស និងអភិបាលកិច្ចសាកលផងដែរ។ ប្រធានាធិបតី បៃឌិន ចាត់ទុកចិនជាអ្នកប្រកួតប្រជែងរបស់អាមេរិកដ៏ធំផុត។ ក្នុងន័យនេះ លោកសំដៅទៅលើការពង្រឹងវិស័យយោធា និងការពង្រីកឥទ្ធិពលលើឆាកអន្តរជាតិរបស់មហាអំណាចអាស៊ីមួយនេះ។ ប៉ុន្តែលោកទទួលស្គាល់ថាអាមេរិក ក៏ត្រៀមខ្លួនធ្វើការជាមួយចិនផងដែរ បើសិនជាកិច្ចការនោះផ្តល់ប្រយោជន៍ឱ្យអាមេរិក។
សូមរំឭកថា អាមេរិក ក្រោមការដឹកនាំរបស់ប្រធានាធិបតីដូណាល់ ត្រាំ ធ្វើឱ្យសម្ពន្ធមិត្តស្រងាកចិត្តដោយដាក់ពន្ធលើទំនិញរបស់សម្ព័ន្ធមិត្តអឺរ៉ុប និងអាស៊ី។ លោក ត្រាំ ក៏គំរាមដកទ័ពពីប្រទេសមួយចំនួនដូចជាអាល្លឺម៉ង់ ជប៉ុន និងកូរ៉េខាងត្បូងជាដើម បើម្ចាស់ប្រទេសមិនគិតជួយចេញថ្លៃចំណាយដល់អាមេរិក។ សម្ពន្ធមិត្តអឺរ៉ុបវិញ អន់ចិត្តនឹងលោក ត្រាំ ដែលធ្វើពុំដឹងពុំឮពីការកើនឡើងនៃរបបផ្តាច់ការ និងថែមទាំងសសើរមេដឹកនាំផ្តាច់ការមួយចំនួនថែមទៀតផង៕
Tag:
អាមេរិក
ចិន
រុស្ស៊ី
អ៊ីរ៉ង់
© រក្សាសិទ្ធិដោយ thmeythmey.com