លោក Jurgen Klopp ដាក់គោលដៅយក Top 4 ក្រោយ Liverpool ចាញ់ Manchester City ក្នុងដីខ្លួនឯងដោយលទ្ធផល ៤-១ ក្នុងការប្រកួត Premier League នៅរាត្រីថ្ងៃទី៧ កុម្ភៈ។ Klopp សោកស្តាយសម្រាប់បរាជ័យដែលអះអាងថាបង្កឡើយដោយកំហុសរបស់អ្នកចាំទី Alisson។
ក្រុមម្ចាស់ការពារតំណែងជើងឯកបានរងបរាជ័យនៅ Anfield ជាប់គ្នាពីរលើកចុងក្រោយក្នុងការប្រកួតលីគសប្តាហ៍ទី២៣ ដែលធ្វើឱ្យពួកគេមានគម្លាតពិន្ទុកាន់តែដាច់ឆ្ងាយពីក្រុមកំពូលតារាង Man City។
ចំណោមគ្រាប់បាល់ស៊ុតបញ្ចូលទី៤គ្រាប់របស់ក្រុមមេឃខៀវ ២គ្រាប់ដំបូងដែលសម្រេចបានដោយ Ilkay Gundogan កើតឡើងដោយសារកំហុសរបស់អ្នកចាំទី Alisson បើទោះសញ្ជាតិប្រេស៊ីលរូបនេះសង្គ្រោះបាល់ប៉េណាល់ទីពីសំណាក់ខ្សែបម្រើសញ្ជាតិអាល្លឺម៉ង់នេះក្តី។ Raheem Sterling និង Phil Foden រកបានគ្រាប់ទី៣ និងទី៤ ខណៈ Mohamed Salah រកបាន១គ្រាប់សម្រាប់ក្រុមហង្សក្រហម។
ជ័យជម្នះនេះ បានជួយក្រុមលោក Pep Guardiola កើនដល់៥០ពិន្ទុ ពោលគឺមាន៥ពិន្ទុដាច់គូប្រជែង Manchester United ដែលឈរលេខ២ ប៉ុន្តែលើសក្រុមលោក Klopp ដល់ទៅ១០ពិន្ទុឯណោះ ហើយសល់មួយប្រកួតក្នុងដៃថែមទៀត។
ផ្ទុយទៅវិញ បរាជ័យនេះបានធ្វើឱ្យលោក Klopp អស់សង្ឃឹមក្នុងការជួយ Liverpool រក្សាតំណែងជើងឯកនៅរដូវកាលនេះ ២០២០-២១នេះទៅហើយ។ អ្នកចាត់ការសញ្ជាតិអាល្លឺម៉ង់បានប្រាប់ទូរទស្សន៍ Sky Sports ថា៖ «យើងបានបង្កកំហុសធំៗពីរលើក្នុការប្រកួតនេះ។ ប្រសិនបើយើងលេងបានល្អនៅជំនួបមុនៗនោះយើងនឹងមិនដាច់ឆ្ងាយដល់ ១០ពិន្ទុទេ»។
ដោយមានគម្លាតពិន្ទុឆ្ងាយបែបនេះលោក Klopp បានបញ្ជាក់បន្ថែមថាហង្សក្រហមផ្តោតលើការដណ្តើមចំណាត់ថ្នាក់ Top 4 ប៉ុណ្ណោះសម្រាប់កៅអី Champions League នៅរដូវកាលក្រោយ។
Liverpool នឹងត្រូវធ្វើដំណើរទៅជួបក្រុមកំពុងឡើងជើង Leicester City ដែលសព្វថ្ងៃស្ថិតនៅចំណាត់ថ្នាក់ទី៣ក្នុងតារាង ក្នុងការប្រកួតលីគកំពូលអង់គ្លេសនៅសប្តាហ៍ក្រោយ។
សម្រាប់គូដទៃទៀត Tottenham Hotspur បានយកឈ្នះ West Bromwich Albion ២-០។ Harry Kane ដែលត្រឡប់ពីការរងរបួសជើងរកបាន១គ្រាប់ ខណៈគ្រាប់ទី២ធ្វើបានដោយ Heung-Min Son។
Chelsea បន្តរកបានជ័យជម្នះក្រោមការដឹកនាំរបស់លោក Thomas Tuchel តាមរយៈការយកឈ្នះ Sheffield United ២-១។ ក្រោយទទួលបាន៣ពិន្ទុបន្ថែមតោខៀវរម្កិលខ្លួនឡើងទៅលេខ៥ វិញ ខណៈមាន់ខ្នាយមាសស្ថិតនៅចំណាត់ថ្នាក់ទី៨។ Fulham, West Brom និង Sheffield United នៅបាតតារាងដដែល៕