លោកស្រី ឱ វណ្ណឌីន ប្រកាសចាក់វ៉ាក់សាំងពីចិន ដើម្បីបង្កើនទំនុកចិត្តពលរដ្ឋ

COVID-19

ជាតិ

លោកស្រី ឱ វណ្ណឌីន ប្រកាសចាក់វ៉ាក់សាំងពីចិន ដើម្បីបង្កើនទំនុកចិត្តពលរដ្ឋ

08, Feb 2021 , 6:10 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ រដ្ឋលេខាធិការក្រសួងសុខាភិបាល លោកស្រី ឱ វណ្ណឌីន ប្រកាសវ៉ាក់សាំងCOVID-19 របស់ចិន ដើម្បីបង្កើនទំនុកចិត្តដល់ប្រជាពលរដ្ឋ។ លោកស្រី វណ្ណឌីន ប្រកាសបែបនេះ នៅក្នុងកិច្ចសម្ភាសពិសេសស្តីពី «ការដាក់ឱ្យប្រើប្រាស់វ៉ាក់សាំងកូវីដ-១៩» នៅថ្ងៃទី៨ កុម្ភៈ។

«ខ្ញុំនឹងចាក់វ៉ាក់សាំងស៊ីណូហ្វាម ដែលជាជំនួយដ៏ថ្លៃថ្លារបស់ចិន»។ នេះជាការអះអាងរបស់លោកស្រី ឱ វណ្ណឌីន ដែលឆ្លើយតបនឹងការសង្ស័យរបស់សាធារណជន លើមន្ត្រីសុខាភិបាលថា មិនហ៊ានចាក់វ៉ាក់សាំងចិននេះ។

លោកស្រី ឱ វណ្ណឌីន ដែលស្ថិតនៅក្នុងជួរមន្ត្រីចាក់វ៉ាក់សាំងកូវីដ-១៩នេះ បានបង្ហាញជំហរមុតមាំថា វ៉ាក់សាំង Sinopharm របស់ចិននេះ គឺមានគុណភាពប្រហាក់ប្រហែលនឹងវ៉ាក់សាំងដទៃទៀត របស់អាមេរិក Pfizer ជាដើម។

រដ្ឋលេខាធិការ និងជាអ្នកនាំពាក្យក្រសួងសុខាភិបាលរូបនេះ រំពឹងថា ក្រោយពីលោកស្រីចាក់វ៉ាក់សាំងចិននេះហើយ នឹងធ្វើឱ្យពលរដ្ឋអស់មន្ទិលសង្ស័យលើគុណភាពវ៉ាក់សាំង។ ត្រង់ចំណុចនេះលោកស្រី វណ្ណឌីន សង្កត់ធ្ងន់ថា បើពលរដ្ឋគិតវិជ្ជមានលើវ៉ាក់សាំងចិន នោះការឱ្យតម្លៃក៏វិជ្ជមាន ប៉ុន្តែបើគិតអវិជ្ជមាន នោះការឱ្យតម្លៃក៏អវិជ្ជមាន។

កាលពីថ្ងៃទី៧ កុម្ភៈ សម្ដេច ហ៊ុន សែន បានបញ្ជាឱ្យកូនប្រុសបង្កើតទាំង៣ និងកូនប្រសារប្រុស២នាក់ ចាក់វ៉ាក់សាំងកូវីដ-១៩ ពីចិន ដើម្បីផ្ដល់ទំនុកចិត្ត ដល់ប្រជាពលរដ្ឋផងដែរ ខណៈដែលសម្ដេច មិនអាចចាក់បានដោយសារលើសអាយុកំណត់។ សម្ដេច ហ៊ុន សែន មានអាយុ៦៨ឆ្នាំ ខណៈដែលវ៉ាក់សាំងចិន អាចចាក់លើមនុស្សអាយុចាប់ពី១៨ ឆ្នាំទៅ៥៩ឆ្នាំប៉ុណ្ណោះ។មិនតែប៉ុណ្ណោះសម្ដេច ក៏បញ្ជាឱ្យមន្ត្រីជាន់ខ្ពស់នៅជួរកងទ័ព និងរដ្ឋាភិបាល រួមទាំងរដ្ឋមន្ត្រីវ័យក្មេង និងកូនអ្នកធំរបស់មន្ត្រីរដ្ឋាភិបាលទាំងអស់ ចាក់វ៉ាក់សាំងនេះផងដែរ។សម្រាប់ទីតាំងចាក់វ៉ាក់សាំងនោះ គឺនៅមន្ទីរពេទ្យកាល់ម៉ែត្រ នាថ្ងៃទី១០ កុម្ភៈ ៕

អត្ថបទទាក់ទង

សម្ដេច ហ៊ុន សែន បញ្ជាកូនប្រុសបង្កើតទាំង៣ និងកូនអ្នកធំ ចាក់វ៉ាក់សាំងពីចិន