អាជ្ញាធរ ពន្យល់មូលហេតុដែលពលរដ្ឋសង់បានតែសំណង់ស្រាល ក្នុងរមណីយដ្ឋានអង្គរ

ជាតិ

បទសម្ភាសន៍

អាជ្ញាធរ ពន្យល់មូលហេតុដែលពលរដ្ឋសង់បានតែសំណង់ស្រាល ក្នុងរមណីយដ្ឋានអង្គរ

10, Feb 2021 , 4:09 pm

រូបភាព

ដោយ: ផាត ដាណេ

សៀមរាប៖ ប្រជាពលរដ្ឋ ដែលរស់នៅក្នុងរមណីយដ្ឋានអង្គរ មានសិទ្ធិសាងសង់តែសំណង់ធន់ស្រាលប៉ុណ្ណោះ។ លោក ឡុង កុសល អ្នកនាំពាក្យអាជ្ញាធរជាតិអប្សរា ពន្យល់ថា ការធ្វើដូច្នេះ គឺដើម្បីរក្សាទម្រង់ដើមនៃទំនៀមទម្លាប់ប្រពៃណី ការរស់នៅ និងការពារផលប៉ះពាល់ដល់សំណង់ប្រាសាទនានា។

សូមអញ្ជើញលោកអ្នកនាង ទស្សនាបទសម្ភាសរវាងកញ្ញា ផាត ដាណេ អ្នកសារព័ត៌មាន ThmeyThmey25 និងលោក ឡុង កុសល អ្នកនាំពាក្យអាជ្ញាធរជាតិអប្សរា ខាងក្រោមដូចតទៅ៖

ក្រៅពីការសាងសង់សំណង់ក្នុងតំបន់រមណីយដ្ឋានអង្គរ ពលរដ្ឋនៅទីនោះ ក៏បានរក្សារបៀបក្នុងការរស់នៅតាមបែបប្រពៃណី ទំនៀមទម្លាប់ ដូចជា ការធ្វើស្រែចម្ការ ដោយប្រើឧបករណ៍បុរាណ និងប្រកបរបរចិញ្ចឹមជីវិត ជាដើម។ ទោះបីជាពលរដ្ឋក្នុងតំបន់រមណីយដ្ឋានអង្គរបានរក្សាទម្រង់ដើមនៃការរស់នៅ ប៉ុន្តែក៏មានមួយចំនួនតូចបានផ្លាស់ប្ដូរផងដែរ។

លោក ឡុង កុសល អ្នកនាំពាក្យអាជ្ញាធរជាតិអប្សរា ការសាងសង់សំណង់ក្នុងតំបន់រមណីយដ្ឋានអង្គរ ត្រូវបានបែងចែកជា២ប្រភេទ។ ប្រភេទទី១ គឺការសង់សំណង់បម្រើដល់វិស័យសាធារណៈ ដែលអាជ្ញាធរអនុញ្ញាតឲ្យសង់សំណង់ធន់ធ្ងន់ ប៉ុន្តែត្រូវឆ្លងកាត់ពិភាក្សាគ្នា ពាក់ព័ន្ធនឹងរចនាបទ និងទំហំនៃសំណង់ ហើយបុរាណវិទូ ក៏ត្រូវសិក្សាយ៉ាងលំអិតលើការធ្វើកំណាយក្រោមដី ដើម្បីឲ្យប្រាកដថាសំណង់ធន់ធ្ងន់នោះ មិនផ្ដល់ប៉ះពាល់ដល់បុរាណវត្ថុដែលអាចមានវត្តមាននៅទីនោះ។

ទី២ គឺការសាងសង់ ឬជួសជុលសំណង់គេហដ្ឋាន ដែលអាជ្ញាធរអនុញ្ញាតឲ្យពលរដ្ឋសាងសង់ ឬជួសជុលដំបូលផ្ទះ ជញ្ជាំងផ្ទះ ជណ្ដើរ ការធ្វើរបង តសំយាបផ្ទះ ចង្ក្រានបាយ បន្ទប់ទឹក និងកន្លែងចិញ្ចឹមសត្វជាដើម។ ប៉ុន្តែការសង់ ឬជួសជុល គឺមានក្រុមការងារនៃអាជ្ញាធរជាតិអប្សរា ផ្ដល់សេវាកម្មជូន។ អ្នកនាំពាក្យរូបនេះ ឆ្លើយប្រាប់ ThmeyThmey25 ដូច្នេះថា៖«ចំពោះកិច្ចការងារដែលត្រូវការស្នើសុំជួលជុលបន្តិចបន្តួច តាមក្រុមសហគមន៍នៃអាជ្ញាធរជាតិអប្សរា ត្រូវធ្វើឡើងដោយឆ្លងការដឹងឮ ពីអាជ្ញាធរមូលដ្ឋាន បានន័យថា ភូមិ ឃុំ ឬក៏សង្កាត់»។

ចំពោះការរើរុះផ្ទះចាស់ទាំងស្រុង ឬក៏កសាងផ្ទះថ្មីជំនួស ពលរដ្ឋដែលជាម្ចាស់ផ្ទះ ត្រូវយកសំណើររបស់ខ្លួន ជាមួយនឹងការជួសជុល ឬសាងសង់ ទៅដាក់នៅមជ្ឈមណ្ឌលសេវាកម្ម នៃអាជ្ញាធរជាតិអប្សរា នៅភូមិសាស្ត្រដែលខ្លួនរស់នៅ៕