កីឡាអន្តរជាតិ
អន្តរជាតិ
Bayern Munich ឈ្នះ Tigres លើកពាន Club World Cup និងជាពានទី៦ក្រោមការដឹកនាំរបស់ Flick
× Bayern Munich បានក្លាយជាជើងឯកពានរង្វាន់ FIFA Club World Cup ឆ្នាំ២០២១ ក្រោយឈ្នះ Tigres ក្នុងលទ្ធផល ១-០ ក្នុងការប្រកួតផ្តាច់ព្រ័ត្រដែលរៀបចំនៅប្រទេសកាតា។ នេះជាពានទី៦ហើយដែលក្រុមយក្សអាល្លឺម៉ង់ទទួលបានត្រឹមរយៈពេល៩ខែ។
នាជំនួបវគ្គផ្តាច់ព្រ័ត្រនៅយប់ថ្ងៃទី១១ ខែកុម្ភៈដែលធ្វើឡើងក្នុងកីឡដ្ឋាន Education City ខ្សែការពារ Benjamin Pavard ជាអ្នកបញ្ចប់ទីជ័យជម្នះសម្រាប់ក្រុម Bayern Munich ដែលម្ចាស់ជើងឯក Champions League នៅនាទី៥៩ដើម្បីយកឈ្នះក្រុមរបស់ម៉ិកស៊ិក Tigres។ Tigres ជាក្រុមមកពីតំបន់អាមេរិកកណ្តាលដំបូងបំផុតដែលអាចឈានដល់វគ្គផ្តាច់ព្រ័ត្រ FIFA Club World Cup។
នេះជាការលើកពាន FIFA Club World Cup លើកទី២របស់ Bayern Munich បន្ទាប់ពីពួកគេឈ្នះលើកដំបូងនៅឆ្នាំ២០១៣។ នេះក៏ជាការលើកពានទី៦របស់ក្រុមយក្សអាល្លឺម៉ង់ក្រោមការដឹកនាំរបស់លោក Hansi Flick ផងដែរ។
Flick ដែលឡើងដឹកនាំនៅឆ្នាំ២០១៩ បានជួយក្រុមឈ្នះពាន Bundesliga, UEFA Super Cup, German Surper Cup, DFB Pokal, Champions League និង FIFA Club World Cup។ FIFA Club World Cup តម្រូវឱ្យក្លិបដែលជាម្ចាស់ជើងឯកតាមទ្វីបនីមួយៗកាលពីរដូវកាលមុន ឡើងទៅប៉ះគ្នាដើម្បីយកមួយក្រុមជាជើងឯក។
Real Madrid ឈ្នះពាននេះច្រើនជាងគេចំនួន៤លើក តាមពីក្រោយដោយ Barcelona ៣លើក Corinthians របស់ប្រេស៊ីល Bayern Munich ២លើក។ Liverpool, Manchester United, Inter Milan, AC Milan, Internacional និង Sao Paulo ឈ្នះ១លើកដូចៗគ្នា៕
© រក្សាសិទ្ធិដោយ thmeythmey.com