ប្រធានាធិបតីអាមេរិកចូ បៃឌិន បានបញ្ជូនលិខិតមួយទៅសភាតំណាង ជូនដំណឹងពីការលុបចោលបញ្ជាសាងសង់ជញ្ជាំងតាមព្រំដែនអាមេរិក-ម៉ិកស៊ិក ដែលដាក់ចេញដោយអតីតប្រធានាធិបតី ដូណាល់ ត្រាំ ។ នៅឆ្នាំ២០១៩ លោក ត្រាំ បានប្រកាសអាសន្នជាតិចំពោះបញ្ហាព្រំដែនជាមួយម៉ិកស៊ិក និងបង្វែរប្រាក់រាប់ពាន់លានដុល្លារពីថវិកាបម្រុងនៃក្រសួងការពារជាតិទៅសាងសងជញ្ជាំងតាមព្រំដែនដើម្បីទប់ស្កាត់លំហូរជនភៀសខ្លួន។
ក្នុងលិខិតទៅប្រធានសភាតំណាងនៅថ្ងៃទី១១ កុម្ភៈ លោក ចូ បៃឌិននិយាយថា ការប្រកាសអាសន្នរបស់លោក ដូណាល់ ត្រាំ ជារឿងមិនចាំបាច់ ហើយប្រាក់បង់ពន្ធដោយពលរដ្ឋអាមេរិកនឹងមិនត្រូវប្រើប្រាស់ដើម្បីសាងសង់ជញ្ជាំងឡើយ។ លោកសន្យាថា នឹងពិនិត្យឡើងវិញនូវប្រាក់ដែលបានចំណាយ ឬបង្វែរដើម្បីសាងសង់ជញ្ជាំងទាំងនោះ។ តាំងពីនៅជាបេក្ខជនប្រធានាធិបតី និងបន្ទាប់មកជាប្រធានាធិបតី លោក ត្រាំ លើកឡើងថា ម៉ិកស៊ិកជាអ្នកចេញថ្លៃសាងសង់របង។
Relate
«ខ្ញុំបានកំណត់ថា សេចក្តីប្រកាសអាសន្ននៅព្រំដែនភាគខាងត្បូង(អាមេរិក-ម៉ិកស៊ិក) មិនត្រឹមត្រូវ»។ នេះជាសំណេរក្នុងលិខិតរបស់លោក បៃឌិន ដោយបន្ថែមថា ការប្រកាសអាសន្ននៅព្រំដែនភាគខាងត្បូងត្រូវបានបញ្ចប់ ហើយអំណាចដែលផ្តល់ក្នុងសេចក្តីប្រកាសនោះ នឹងមិនត្រូវប្រើប្រាស់ទៀតឡើយ។
សេចក្តីប្រកាសអាសន្នរបស់លោក ត្រាំ ក្នុង២០១៩ តម្រូវឱ្យក្រសួងរតនាគារបង្វែរទឹកប្រាក់៦០០លានដុល្លារ និងទឹកប្រាក់៦,១ពាន់លានដុល្លារពីក្រសួងការពារជាតិទៅក្រសួងសន្តិសុខមាតុភូមិ ដើម្បីចេញថ្លៃសាងសង់ជញ្ជាំង។ ក្នុងខែកុម្ភៈ ឆ្នាំ២០២០ លោក ត្រាំ បានបន្តសេចក្តីប្រកាសនេះ ដោយបង្វែរប្រាក់៣,៨ពាន់លានដុល្លារទៀតដែលបានពីការបង់ពន្ធ ទៅកាន់គម្រោងសាងសង់ជញ្ជាំង។
ក្នុងរយៈពេល៤ឆ្នាំនៃការកាន់អំណាច លោក ត្រាំ សាងសង់ជញ្ជាំងបានប្រវែង១២៨,៧ គីឡូម៉ែត្រ និងបានជួសជុលជញ្ជាំងចាស់ប្រវែង៦៤៣,៧ គីឡូម៉ែត្រ។ មុនលោក ត្រាំ កាន់តំណែង អាមេរិកបានសាងសង់ជញ្ជាំងប្រវែង១,០០០គីឡូម៉ែត្ររួចទៅហើយ។
លោក បៃឌិន បានបង្ហាញពីចេតនាក្នុងការលុបចោលគោលនយោបាយអន្តោប្រវេសន៍របស់លោកត្រាំ នៅថ្ងៃកាន់តំណែងប្រធានាធិបតីដំបូង។ នាដើមខែកុម្ភៈ លោក បៃឌិន បានចេញផែនការបង្កើតក្រុមការងារដើម្បីជួយកុមារឱ្យបានជួបជុំជាមួយក្រុមគ្រួសារវិញ។ នៅឆ្នាំ២០១៧ លោក ត្រាំ ដាក់ចេញគោលនយោបាយគ្មានការអត់អោន ដោយបំបែកកុមារពីគ្រួសារពេលមកដល់ទឹកដីអាមេរិក។ លោក បៃឌិន ក៏ចេញបញ្ជាប្រតិបត្តិកំណត់ទទួលជនភៀសខ្លួនជាង១២ម៉ឺននាក់ក្នុងមួយឆ្នាំផងដែរ។ ចំនួននេះ ច្រើនជាងចំនួនជនភៀសខ្លួនដែលលោក ត្រាំ អនុញ្ញាតទទួលដល់ទៅ៨ដង។
យ៉ាងណាក្តី រដ្ឋបាលលោកបៃឌិន នៅតែបន្តបញ្ជូនជនស្វែងរកសិទ្ធិជ្រកកោនទៅប្រទេសកំណើតវិញ ដោយសារជំងឺឆ្លងកូវីដ-១៩ ។ ក្នុងសន្និសីទសារព័ត៌មាននៅថ្ងៃទី១០ កុម្ភៈលោកស្រី Jen Psaki និយាយថា រដ្ឋបាលអាមេរិកពុំមានពេលវេលាគ្រប់គ្រាន់ក្នុងការត្រួតពិនិត្យឯកសាររបស់ជនទាំងនោះឡើយ។ លោកស្រីបន្ថែមថា អាជ្ញាធរព្រំដែនមានសិទ្ធិក្នុងការបណ្តេញជនទាំងនោះ រហូតដល់ពេលមួយដែលអាមេរិកមានលទ្ធភាពក្នុងការបង្កើតប្រព័ន្ធពិនិត្យលើបុគ្គលម្នាក់ៗយ៉ាងលម្អិត និងប្រកបដោយមនុស្សធម៌៕