ក្រសួងវប្បធម៌ សង្កេតឃើញថា ពលរដ្ឋខ្មែរមួយចំនួនបានប្រារព្ធទិវានៃសេចក្តីស្រឡាញ់ដោយភ័ន្តច្រឡំកន្លងមក ដែលនាំឲ្យប៉ះពាល់ដល់កិត្តិយស វប្បធម៌ ទំនៀមទម្លាប់ និងប្រពៃណីជាតិខ្មែរ។ 

 

ដើម្បីឲ្យយុវជនអាចជៀសវាងកុំឲ្យប្រព្រឹត្តអំពើប្រក្រតីណាមួយដែលប៉ះពាល់ដល់កិត្តិយសខ្លួន និងក្រុមគ្រួសារ ក្រសួងវប្បធម៌បានណែនាំឲ្យយុវជនត្រូវសិក្សាចំពោះវប្បធម៌ ប្រពៃណីរបស់ដូនតា និងសិក្សាឈ្វេងយល់ពីឥទ្ធិពលនៃវប្បធម៌ និងទំនៀមទម្លាប់បរទេសឲ្យបានត្រឹមត្រូវ។ 

 

ក្រសួងវប្បធម៌បានណែនាំដល់យុវជនយកថ្ងៃនៃសេចក្តីស្រឡាញ់១៤កុម្ភៈ ជាឱកាសចែករំលែក បង្ហាញក្តីស្រឡាញ់ បង្ហាញសន្តានចិត្តស្មោះសរចំពោះមនុស្សដែលនៅជុំវិញខ្លួន ដូចជាក្រុមគ្រួសារ ឪពុកម្តាយ ជាពិសេសចំពោះជនពិការ កុមារកំព្រា និងជនក្រីក្រ។ 

 

ជាមួយគ្នានេះក្រសួងវប្បធម៌ណែនាំឲ្យពលរដ្ឋ សរសេរលិខិតជូនពរ ឬជូនជាអំណោយផ្សេងៗ ដើម្បីបញ្ជាក់ពីក្តីស្រឡាញ់ ភាពកតញ្ញុតាធម៌ និងការយកចិត្តទុកដាក់ចំពោះអ្នកមានគុណ បុព្វការីជន និងចំពោះសង្គមជាតិ។

 

ក្រសួងវប្បធម៌ក៏បានណែនាំដល់ឪពុកម្តាយ អាណាព្យាបាល សមត្ថកិច្ចពាក់ព័ន្ធគ្រប់លំដាប់ថ្នាក់បន្តអប់រំ ផ្សព្វផ្សាយ និងណែនាំដល់កូនចៅអំពីអត្ថន័យនៃថ្ងៃទិវាបុណ្យនៃសេចក្តីស្រឡាញ់ ដើម្បីឲ្យពួកគេប្រារព្ធទិវានេះប្រកបដោយភាពថ្លៃថ្នូរ និងកិត្តិយស និងកិត្យានុភាពនៃសង្គមជាតិ។ 

 

សូមបញ្ជាក់ថា ថ្ងៃទី១៤ កុម្ភៈ ឬថ្ងៃទិវានៃក្តីស្រឡាញ់ (Valentine’s Day ដែលជាភាសាអង់គ្លេស ឬ Saint-Valentin ជាភាសាបារាំង) បានចាប់ផ្តើមប្រារព្ធឡើងពីបណ្តាប្រទេសក្នុងទ្វីបអឺរ៉ុប ពោលគឺនៅក្នុងទីក្រុងរ៉ូម ប្រទេសអ៊ីតាលី ហើយបន្តរាលដាលពាសពេញពិភពលោក៕