នាយករដ្ឋមន្ត្រី បញ្ជាឲ្យបង្កើនប្រាក់ពិន័យលើសពី១លានរៀល លើអ្នកបំពានវិធានការចត្តាឡីស័ក

COVID-19

ជាតិ

នាយករដ្ឋមន្ត្រី បញ្ជាឲ្យបង្កើនប្រាក់ពិន័យលើសពី១លានរៀល លើអ្នកបំពានវិធានការចត្តាឡីស័ក

15, Feb 2021 , 12:59 pm

រូបភាព

កន្លែងធ្វើចត្តាឡីស័កមួយ នៅខេត្តបន្ទាយមានជ័យ (រូបពីទំព័រហ្វេសប៊ុករដ្ឋបាលខេត្តបន្ទាយមានជ័យ)

ដោយ: សារព័ត៌មានថ្មីៗ

សម្តេចនាយករដ្ឋមន្ត្រី ហ៊ុន សែន ប្រាប់ទៅលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និង លោក កើត រិទ្ធ រដ្ឋមន្ត្រីយុត្តិធម៌ ឲ្យសិក្សារួមគ្នាពីការកែតម្រូវអនុក្រឹត្យមួយ ពាក់ព័ន្ធនឹងការពិន័យប្រាក់លើជន ដែលល្មើសនឹងវិធានការចត្តាឡីស័ក។ បំណងរបស់សម្តេចនាយករដ្ឋមន្ត្រី គឺចង់ឲ្យបង្កើនប្រាក់ពិន័យឲ្យលើសពី១លានរៀល លើជន ដែលល្មើសនឹងវិធានការចត្តាឡីស័ក ខណៈអនុក្រឹត្យបច្ចុប្បន្ន ពិន័យត្រឹមតែ២សែនរៀល ដល់១លានរៀល។

បញ្ជារបស់សម្តេចនាយករដ្ឋមន្ត្រី ធ្វើឡើងតាមរយៈសារជាសំឡេងប្រមាណកន្លះម៉ោង បញ្ជូនទៅកាន់មន្ត្រីពាក់ព័ន្ធទាំងអស់ ដោយណែនាំឲ្យបន្តពង្រឹងវិធានការធ្វើចត្តាឡីស័ក ចំពោះអ្នកដែលចូលមកកម្ពុជា ជាពិសេសសំដៅលើប្រជាពលរដ្ឋ ដែលឆ្លងដែនពីថៃ វៀតណាម និង ឡាវ ចូលមកកម្ពុជា ដើម្បីទប់ស្កាត់ការរាលដាលជំងឺកូវីដ-១៩។ សំឡេងរបស់សម្តេច ត្រូវបានចែករំលែកតៗគ្នានៅតាមបណ្តាញទំនាក់ទំនាក់ទំនងតេឡេក្រាម នៅព្រឹកថ្ងៃទី១៥ ខែកុម្ភៈ ឆ្នាំ២០២១។

សម្តេចប្រមុខរដ្ឋាភិបាល សង្កេតឃើញថា នៅតែមានអ្នកឆ្លងដែនចូលមកកម្ពុជា បំពានវិធានការចត្តាឡីស័ក ដោយអ្នកខ្លះ បានរត់គេចមិនព្រមធ្វើចត្តាឡីស័ក។ សម្តេច យល់ថា ការពិន័យពី២សែនរៀលទៅ១លាន គឺច្រើនសម្រាប់អ្នកមានជីវភាពខ្វះខាត តែមិនសូវច្រើនប៉ុន្មានឡើយសម្រាប់អ្នកមានជីវភាពធូរធា ដូច្នេះ វា ជាហេតុមួយ ដែលធ្វើឲ្យអ្នកមានជីវភាពធូរធាខ្លះ មិនខ្លាចនឹងការបង់ប្រាក់ពិន័យ ពេលពួកគេ បំពានវិធានការចត្តាឡីស័ក។

ប្រមុខរដ្ឋាភិបាល សង្កត់ធ្ងន់ថា៖«យើង ត្រូវតែធ្វើ ដើម្បីពង្រឹងអនុវត្តវិធានការ សម្រាប់ការពារសុខភាពរបស់ប្រជាជនយើង»។

យ៉ាងណា ប្រមុខរដ្ឋាភិបាល ពុំបានណែនាំទៅរដ្ឋមន្ត្រីទាំង២ ឲ្យកំណត់ទំហំប្រាក់ពិន័យខ្ពស់បំផុតចំនួនប៉ុន្មាននោះទេ ចំពោះអ្នកបំពានវិធានការចត្តាឡីស័ក។

កន្លងមក រដ្ឋមន្ត្រីក្រសួងសុខាភិបាល បានចេញសេចក្តីជូនណឹងរួចហើយ ថា អ្នកបំពាន់វិធានការចត្តាឡីស័ក នឹងត្រូវពិន័យពី២សែនរៀល ទៅ១លានរៀល ហើយក៏ធ្លាប់មានអ្នក ដែលត្រូវពិន័យប្រាក់ដែរ ដោយសារតែការបំពានវិធានការចត្តាឡីស័ក។ ជាក់ស្តែង កាលពីខែកក្កដា ឆ្នាំ២០២០ មានស្ត្រីខ្មែរ-អាមេរិកម្នាក់ ត្រូវពិន័យប្រាក់១លានរៀល ដោយសារតែលួចរត់ចេញពីបន្ទប់ចត្តាឡីស័ក ខណៈស្ត្រីរូបនោះ ស្ថិតក្នុងអំឡុងពេលនៃការធ្វើចត្តាឡីស័ក៕