ព្រឹទ្ធសភាអាមេរិកនៅថ្ងៃទី១៣ ខែកុម្ភៈ ពុំអាចរកសំឡេងគ្រប់គ្រាន់ដើម្បីចោទប្រកាន់លោកអតីតប្រធានាធិបតី ដូណាល់ ត្រាំ ពីបទញុះញង់បះបោរប្រឆាំងរដ្ឋាភិបាលឡើយ ដោយសមាជិកបក្សសាធារណរដ្ឋភាគច្រើន បោះឆ្នោតជំទាស់ ដែលធ្វើឱ្យលោករួចខ្លួនជាលើកទីពីរ។ ប៉ុន្តែជីវិតនយោបាយរបស់លោក ត្រាំ ក៏ទំនងជាមិនល្អដែរក្រោយជាប់ឈ្មោះក្នុងប្រវត្តិសាស្ត្រទៅហើយនោះ។
សវនាការកាត់ក្តីអតីតប្រធានាធិបតី ដូណាល់ ត្រាំ លើសំណុំរឿងញុះញង់ ធ្វើឡើងត្រឹម៥ថ្ងៃប៉ុណ្ណោះ។ ព្រឹទ្ធសភាអាមេរិកដែលគ្រប់គ្រងដោយបក្សប្រជាធិបតេយ្យ ពុំអាចរកសំឡេងគាំទ្រ២ភាគ៣ ឬ៦៧សំឡេងដើម្បីដាក់កំហុសលើលោក ត្រាំ ឡើយ។ សមាជិកព្រឹទ្ធសភា៥៧រូប ដែលក្នុងនោះមាន៧រូបមកពីបក្សសាធារណរដ្ឋបោះឆ្នោតចោទប្រកាន់ ខណៈ៤៣ទៀតជំទាស់។
លោក ត្រាំ ជាប្រធានាធិបតីអាមេរិកតែមួយគត់ដែលត្រូវសភាតំណាងដកតំណែងចំនួនពីរដងពេលកំពុងកាន់អំណាច។ ក្នុងប្រវត្តិនយោបាយអាមេរិក សភាតំណាង និងព្រឹទ្ធសភាអាមេរិកធ្លាប់បានដកតំណែង និងកាត់ក្តីប្រធានាធិបតីត្រឹមតែ៤ដងប៉ុណ្ណោះ ហើយមកទល់ពេលនេះពុំមានប្រធានាធិបតីរូបណាត្រូវបានចោទប្រកាន់ និងបណ្តេញចេញពីអំណាចឡើយ។
«ប្រធានាធិបតី ត្រាំ ត្រូវតែរងការចោទប្រកាន់ដើម្បីសុវត្ថិភាព និងប្រជាធិបតេយ្យនៃពលរដ្ឋ»។ នេះជាការលើកឡើងរបស់សមាជិកសភាតំណាង Jaime Raskin ដែលមាននាទីជារដ្ឋអាជ្ញានាំមុខ។ លោកRaskin អះអាងថា បើអ្វីដែលលោក ត្រាំ បានប្រព្រឹត្តមិនត្រូវបានចាត់ទុកជាបទល្មើស នោះគ្មានអ្វីអាចត្រូវចាត់ទុកជាបទល្មើសឡើយ។ លោកព្រមានថា បើលោក ត្រាំ កាន់តំណែងម្តងទៀត នោះសមាជិកព្រឹទ្ធសភាគ្មានអ្នកណាត្រូវបន្ទោសក្រៅតែពីខ្លួនឯងឡើយ។
បើទោះជារួចខ្លួនមែន ជីវភាពនយោបាយរបស់លោក ត្រាំ ក្នុងបក្សសាធារណរដ្ឋប្រហែលជាអាចដល់ទីបញ្ចប់។ បន្ថែមពីនេះ លោកក៏អាចរងការចោទប្រកាន់ផ្សេងទៀតចំពោះហេតុការណ៍អុកឡុកវិមានសភាកាលពីថ្ងៃទី៦ មករាផងដែ។
លោក Mitch McConnell មេដឹកនាំសំឡេងភាគតិចព្រឹទ្ធសភា និយាយថាលោក ត្រាំ នៅតែត្រូវទទួលខុសត្រូវចំពោះអ្វីដែលលោកបានធ្វើនៅពេលកាន់អំណាច ហើយលោកមិនទាន់រួចខ្លួននៅឡើយទេ។ មេដឹកនាំសំឡេងភាគតិចដែលបោះឆ្នោតជំទាស់ការចោទប្រកាន់អះអាងថា ព្រឹទ្ធសភាដែលជាកន្លែងកាត់ក្តីលោកត្រាំ មិនមែនជាអង្គជំនុំជម្រះផ្នែកសីលធម៌ឡើយ តែអតីតប្រធានាធិបតីរូបនេះនៅអាចត្រូវកាត់ទោសព្រហ្មទណ្ឌបាន។
នាខែមករា លោក McConnell ធ្លាប់បាននិយាយថា ការកាត់ទោសក្នុងព្រឹទ្ធសភា នឹងធ្វើឱ្យបក្សរបស់លោកកាន់តែមានភាពងាយស្រួលក្នុងការដកអតីតប្រធានាធិបតីរូបនេះចេញពីបក្ស។ សមាជិកព្រឹទ្ធសភាឯទៀតរបស់បក្សសាធារណរដ្ឋ ក៏យល់ស្រប់ទៅនឹងការលើកឡើងបែបនេះដែរ។
បើតាមសារព័ត៌មាន The Hill សមាជិកព្រឹទ្ធសភាបក្សសាធារណរដ្ឋម្នាក់និយាយថា ចង់ឬមិនចង់បក្សប្រជាធិបតេយ្យជួយបក្សសាធារណរដ្ឋក្នុងការធ្វើឱ្យលោកត្រាំលែងអាចឈរឈ្មោះជាប្រធានាធិបតីទៀតបាន។ ចំណែកសមាជិកព្រឹទ្ធសភាមួយរូបទៀត និយាយថា ការកាត់ក្តីនេះនឹងនាំឱ្យបក្សសាធារណរដ្ឋដកខ្លួនឈប់ពាក់ព័ន្ធជាមួយលោក ត្រាំ ទៀត។ ប៉ុន្តែសមាជិកព្រឹទ្ធសភាបក្សនេះមួយរូបផ្សេងទៀត ទទួលស្គាល់ថាលោក ត្រាំ ជាបញ្ហាដ៏ធំមួយសម្រាប់បក្ស ព្រោះអ្នកគាំទ្របក្សនេះមួយភាគធំនៅបន្តគាំទ្រលោកដដែល។
រួចខ្លួនរឿងនយោបាយមែន លោក ត្រាំ ក៏អាចនឹងរងការកាត់ទោសលើរឿងក្តីទាក់ទងនឹងជំនួញរបស់លោកផងដែរ ព្រោះលែងទទួលបានអភ័យឯកសិទ្ធិទៀតហើយ។ លោក ត្រាំ កំពុងជំពាក់ជំពិនក្នុងសំណុំរឿងគេចពន្ធ បន្លំប្រាក់ធនាគារ អំពើពុករលួយ បំពានផ្លូវភេទ និងបំពានច្បាប់យុទ្ធនាការឃោសនាបោះឆ្នោត។ សំណុំរឿងទាំងនេះ សុទ្ធសឹងតែស្ថិតក្នុងដៃតុលាការរដ្ឋនានា ក៏ដូចជាតុលាការសហព័ន្ធ។
បន្ថែមពីនេះ លោក ត្រាំ ក៏អាចនឹងត្រូវបានកាត់ទោសចំពោះការរារាំងដល់ដំណើរការយុត្តិធម៌តាមរយៈការជ្រែតជ្រែកក្នុងការស៊ើបអង្កេតរបស់រដ្ឋអាជ្ញាពិសេស Robert Muller ផងដែរ។ សំណុំរឿងលោកMuller អាចជាភស្តុតាងមានប្រសិទ្ធិភាពក្នុងការកាត់ក្តីលោក ត្រាំ ។
លោក Muller ត្រូវបានសភាផ្តល់សិទ្ធិឱ្យស៊ើបអង្កេតលើការជ្រែតជ្រែករបស់រុស្ស៊ីក្នុងការបោះឆ្នោតប្រធានាធិបតីឆ្នាំ២០១៦។ ក្នុងរបាយការណ៍បញ្ចប់ការស៊ើបអង្កេតលោក Muller លើកឡើងពីសកម្មភាពរបស់លោកត្រាំចំនួន១០ចំណុចដែលអាចចាត់ទុកជាការរារាំងដំណើការយុត្តិធម៌។ លោកត្រាំ ក៏ធ្លាប់បានបញ្ជាឱ្យដកលោក Muller ចេញពីតំណែងផងដែរ ប៉ុន្តែដកថយវិញក្រោយរងសម្ពាធពីសាធារណជន និងបក្សសាធារណរដ្ឋ។
លោកប្រធានាធិបតី ចូ បៃឌិន ធ្លាប់បញ្ជាក់យ៉ាងច្បាស់ថា លោកនឹងមិនសើរើដោយផ្ទាល់លើអ្វីដែលលោក ត្រាំ បានធ្វើនៅពេលកាន់អំណចឡើយ ដោយផ្តល់សិទ្ធិនេះទៅរដ្ឋមន្ត្រីយុត្តិធម៌វិញ។ ក្នុងជួរបក្សប្រជាធិបតេយ្យវិញ សមាជិកព្រឹទ្ធសភា Elizabeth Warren ទាមទារឱ្យបង្កើតក្រុមការងារឯករាជ្យដើម្បីស៊ើបអង្កេតអំពើពុករលួយ និងបទល្មើសរបស់លោក ត្រាំ នៅពេលកាន់អំណាច។ បើក្រុមការងារនេះត្រូវបានបង្កើតមែន នោះការស៊ើបអង្កេតអាចមានអំណាចចូលពិនិត្យឯកសារសម្ងាត់ទាំងឡាយនៅពេលលោក ត្រាំ កាន់តំណែង។
បន្ថែមពីនេះ ការស៊ើបអង្កេតមួយទៀត ដែលអាចធ្វើឡើង គឺអំពើពុករលួយនៅពេលកាន់អំណាចទាក់ទងការទទួលសំណូកដើម្បីទទួលបានការលើកលែង ឬបន្ធូរបន្ថយទោស។ រដ្ឋធម្មនុញ្ញអាមេរិកផ្តល់អំណាចយ៉ាងទូលំទូលាយដល់ប្រធានាធិបតីក្នុងការលើកលែង ឬបន្ធូរបន្ថយទោស។ ប៉ុន្តែលោក ត្រាំ អាចនឹងត្រូវចោទប្រកាន់ពីអំពើពុករលួយ បើសិនជាលោកទទួលសំណូកដើម្បីឱ្យបុគ្គលទាំងនោះរួចខ្លួន។
ក្នុងប្រវត្តិសាស្ត្រអាមរិក ប្រធានាធិបតីចប់អាណត្តិពុំដែលត្រូវបានកាត់ទោសឡើយ។ អតីតប្រធានាធិបតី Richard Nixon ដែលត្រូវសភាចោទប្រកាន់ក្នុងរឿងអាស្រូវ Watergate បានលាលែងពីតំណែងមុនការកាត់ក្តីបណ្តេញចេញពីតំណែងដោយព្រឹទ្ធសភា។ លោក Gerald Ford អនុប្រធានាធិបតីរបស់លោក Nixon និងបន្ទាប់មកកាន់តំណែងជាប្រធានាធិបតី បានលើកលែងទោសដល់លោក Nixon ចំពោះបទល្មើសដែលអាចមានអំឡុងពេលកាន់អំណាច ក៏ដូចជារារាំងការកាត់ទោសទាំងឡាយណាក្រោយលោក Nixon បញ្ចប់តំណែងប្រធានាធិបតី៕