អង្គការសុខភាពពិភពលោក (WHO) សម្រេចបញ្ចូលវ៉ាក់សាំងកូវីដ-១៩ ដែលអភិវឌ្ឍរួមដោយក្រុមហ៊ុន AstraZeneca និងសាកលវិទ្យាល័យ Oxford ក្នុងបញ្ជីប្រើប្រាស់បន្ទាន់(EUL) នៅថ្ងៃទី១៥ កុម្ភៈ។ WHO បញ្ជាក់ថា វ៉ាក់សាំងAstraZeneca/Oxford បំពេញគ្រប់លក្ខខណ្ឌចាំបាច់ផ្នែកប្រសិទ្ធភាព និងសុវត្ថិភាព ដោយផលប្រយោជន៍មានច្រើនជាងបញ្ហាប្រឈម។
វ៉ាក់សាំងរបស់ AstraZeneca/Oxford ជាវ៉ាក់សាំងទីពីរដែលត្រូវបានចុះឈ្មោះក្នុងបញ្ជីប្រើប្រាស់បន្ទាន់ (EUL) របស់អង្គការសុខភាពពិភពលោក ។ WHO ចាប់ផ្តើមពិនិត្យលើសំណើសុំប្រើប្រាស់នៅថ្ងៃទី៨ ខែកុម្ភៈ។ វ៉ាក់សាំង Pfizer/BioNTech ជាវ៉ាក់សាំងដែលទទួលបានការអនុញ្ញាតសម្រាប់ប្រើប្រាស់បន្ទាន់ទីមួយ កាលពីថ្ងៃទី៣១ ខែធ្នូ។ ចំណែកវ៉ាក់សាំងរបស់ក្រុមហ៊ុន Moderna ក៏កំពុងស្ថិតក្នុងការត្រួតពិនិត្យផងដែរ។
ការអនុញ្ញាតឱ្យប្រើប្រាស់វ៉ាក់សាំងនេះក្នុងស្ថានការណ៍បន្ទាន់ ធ្វើឡើងក្រោយក្រុមអ្នកជំនាញ SAGE ដែលទទួលបន្ទុកផ្ដល់អនុសាសន៍លើការប្រើវ៉ាក់សាំងរបស់ WHO ណែនាំឱ្យប្រើវ៉ាក់សាំងនេះចំនួន២ដូសក្នុងរយៈពេលពី៨ ទៅ១២សប្តាហ៍។ វ៉ាក់សាំងនេះ អាចត្រូវបានផ្តល់ដល់មនុស្សចាប់ពី១៨ឆ្នាំឡើងទៅ ហើយក៏អាចប្រើប្រាស់បានដែរសម្រាប់ប្រទេសដែលមានមេរោគកូវីដ-១៩ បំប្លែងខ្លួនមកពីអាហ្វ្រិកខាងត្បូងទៀតផង។
«យើងមានរបស់គ្រប់បែបយ៉ាងដើម្បីចែកចាយវ៉ាក់សាំងដោយលឿនរហ័ស។ ប៉ុន្តែយើងចាំបាច់ត្រូវបង្កើនល្បឿនផលិតកម្ម»។ នេះជាការថ្លែងរបស់លោកTedros Adhanom Ghebreyesus អគ្គនាយកWHOក្នុងសន្និសីទសារព័ត៌មានថ្ងៃទី១៥ ខែកុម្ភៈ។ លោក Tedros ទទូចឱ្យក្រុមហ៊ុនផលិតឱសថបញ្ជូនឯកសារស្តីពីវ៉ាក់សាំងមក WHO ឱ្យត្រួតពិនិត្យ ដូចដែលខ្លួនបានផ្តល់ទៅនិយ័តករសុខាភិបាលប្រទេសអ្នកមានដែរ។
វ៉ាក់សាំងAstraZeneca/Oxford ដែលទទួលបានការអនុញ្ញាតនេះ ផលិតដោយក្រុមហ៊ុន AstraZeneca-SKBio របស់កូរ៉េខាងត្បូង និងវិទ្យាស្ថានSerum របស់ឥណ្ឌា។
វ៉ាក់សាំងAstraZeneca ផលិតនៅឥណ្ឌា និងកូរ៉េខាងត្បូងមានប្រសិទ្ធភាព៦៣,០៩ភាគរយ។ វ៉ាក់សាំងនេះ បង្កើតភាពស៊ាំដោយដោយយក DNA របស់មេរោគកូវីដ-១៩ ទៅចាក់បញ្ចូលក្នុងមេរោគមួយផ្សេងទៀតដែលមិនបង្កជំងឺ រួចចាក់បញ្ចូលទៅក្នុងរាងកាយដើម្បីឱ្យប្រព័ន្ធភាពស៊ាំស្គាល់ DNA នៃមេរោគឆ្លង។ វិធីសាស្ត្រនេះត្រូវបានគេឱ្យឈ្មោះថា Viral Vectored និងប្រើប្រាស់សារធាតុ Recombinant ChAdOx1-S ។
ជាមួយនឹងការផ្ដល់ការអនុញ្ញាតនេះ ការដឹកជញ្ជូនវ៉ាក់សាំង AstraZeneca តាមរយៈ COVAX ក៏អាចចាប់ផ្ដើមដែរ។ ប្រទេសជាច្រើនពឹងផ្អែកលើវ៉ាក់សាំងនេះដោយសារមានតម្លៃថោក ងាយស្រួលក្នុងការដឹកជញ្ជូន និងមិនចាំបាច់ដាក់ក្នុងសីតុណ្ហភាពត្រជាក់ខ្លាំង។ ក្រុមហ៊ុននេះ ក៏បានសន្យាផ្តល់វ៉ាក់សាំងចំនួន៣០០លានដូសដល់យន្តការ COVAX ដែរ។ COVAX វិញអះអាងថា វ៉ាក់សាំងប្រមាណ៣៣០លានដូស នឹងត្រូវចែកចាយដល់ប្រទេសកំពុងអភិវឌ្ឍនៅចុងខែកុម្ភៈ។
AstraZeneca ដែលជាក្រុមហ៊ុនកូនកាត់អង់គ្លេស-ស៊ុយអែត សង្ឃឹមថា ខ្លួនអាចនឹងផ្តល់វ៉ាក់សាំងចំនួន៣០០លានដូសដល់ប្រទេសចំនួន១៤៥ ត្រឹមពាក់កណ្តាលឆ្នាំ២០២១ តាមរយៈយន្តការCOVAX។ នេះយោងតាមសេចក្តីថ្លែងការណ៍របស់ក្រុមហ៊ុន។ ចំនួន៣០០លានដូសនេះ អាចផ្តល់ដល់ប្រជាជនចំនួន៣, ៣ភាគរយប៉ុណ្ណោះ ក្នុងប្រទេសចំនួន១៤៥៕