កម្ពុជាសល់អ្នកជំងឺ៩នាក់ ក្រោយពលករខ្មែរមកពីថៃម្នាក់ទៀត បានជាពីកូវីដ-១៩

COVID-19

ជាតិ

សុខភាព

កម្ពុជាសល់អ្នកជំងឺ៩នាក់ ក្រោយពលករខ្មែរមកពីថៃម្នាក់ទៀត បានជាពីកូវីដ-១៩

17, Feb 2021 , 10:38 am

រូបភាព

ដោយ: អ៊ូ សុខមាន (OU Sokmean)

ភ្នំពេញ៖ នាព្រឹកថ្ងៃទី១៧កុម្ភៈនេះ ក្រសួងសុខាភិបាលប្រកាសដំណឹងល្អចំពោះស្ត្រីខ្មែរម្នាក់ជាពលករ ធ្វើដំណើរមកពីប្រទេសថៃ បានជាសះស្បើយពីជំងឺកូវីដ-១៩(COVID-19)។ ការជាសះស្បើយរបស់ស្ត្រីរូបនេះ បានធ្វើឱ្យកម្ពុជាមានអ្នកជាពីជំងឺកូវីដ-១៩សរុប៤៧០នាក់ ខណៈ៩នាក់ទៀត កំពុងសម្រាកព្យាបាលនៅតាមមន្ទីរពេទ្យនានា។

ក្រសួងសុខាភិបាលបានបញ្ជាក់ថា ស្ត្រីដែលជាពីកូវីដ-១៩ខាងលើនោះ មានវ័យ៤០ឆ្នាំ មានអាសយដ្ឋាននៅភូមិព្រៃតាប ឃុំរោងគោ ស្រុកក្រឡាញ់ ខេត្តសៀមរាប។ ពលកររូបនេះ បានធ្វើដំណើរពីប្រទេសថៃមកដល់កម្ពុជា កាលពីថ្ងៃទី២៧មករា ឆ្នាំ២០២១។

ស្របពេលដែលកម្ពុជាមានអ្នកជាសះស្បើយពីជំងឺកូវីដ-១៩ ជាបន្តបន្ទាប់នោះ ក៏មានពលរដ្ឋខ្មែរចំនួន២,៦១១នាក់ហើយបានចាក់វ៉ាក់សាំងការពារជំងឺនេះ។ បើតាមសេចក្តីជូនដំណឹងរបស់ក្រសួងសុខាភិបាល ចំនួនមនុស្សដែលបានចាក់វ៉ាក់សាំងកូវីដ-១៩នេះ គឺគិតត្រឹមរយៈពេល៦ថ្ងៃពោលពីថ្ងៃទី១០-១៦កុម្ភៈ នៃការបើកយុទ្ធនាការចាក់វ៉ាក់សាំងកូវីដ-១៩។

សូមជម្រាប ចំពោះចំនួនពលរដ្ឋខ្មែរសរុបខាងលើ ដែលបានចាក់វ៉ាក់កូវីដ-១៩នេះ គឺមិនបានរាប់បញ្ចូលនូវចំនួនកងកម្លាំងទ័ពនានា ដែលបានចាក់វ៉ាក់សាំងនេះឡើយ។ វ៉ាក់សាំងកូវីដ-១៩ប្រភេទស៊ីណូហ្វាម ចំនួន៦០ម៉ឺនដូសរបស់ចិន បានដឹកមកដល់កម្ពុជាកាលពីថ្ងៃទី៧កុម្ភៈ ឆ្នាំ២០២១ ដោយមាន៣០ម៉ឺនដូស ប្រគល់ឱ្យក្រសួងសុខាភិបាល និង៣០ម៉ឺនដូសទៀត ប្រគល់ឱ្យក្រសួងការពារជាតិ៕