ជាតិ
សេដ្ឋកិច្ច
សម្តេច ហ៊ុន សែន សម្រេចបញ្ចុះអត្រាពន្ធពិសេសលើមុខទំនិញរថយន្តពី១០ទៅ២០ភាគរយ
×![]()
ភ្នំពេញ៖ រដ្ឋាភិបាលកម្ពុជា បានសម្រេចបញ្ចុះអត្រាអាករពិសេស ពី១០ទៅ២០ភាគរយ លើមុខទំនិញរថយន្ត។ បើតាម អនុក្រឹត្យស្តីពី«ការកែសម្រួលអត្រាអាករពិសេសលើមុខទំនិញរថយន្តមួយចំនួន» ដែលចុះហត្ថលេខាដោយសម្តេច ហ៊ុន សែន កាលពីថ្ងៃទី៩កុម្ភៈ ការបន្ថយអត្រាពន្ធលើរថយន្តនេះ នឹងចាប់ផ្តើមអនុវត្ត ពីថ្ងៃទី១មីនា ឆ្នាំ២០២១ តទៅ។ 
បើតាមអនុក្រឹត្យរដ្ឋាភិបាល ប្រភេទរថយន្តនីមួយៗដែលបានបញ្ចុះអាត្រាអាករពិសេស រួមមាន រថយន្តគ្រួសារទំហំស៊ីឡាំងលើសពី១០០០cc ដែលដំណើរការដោយសាំងសុទ្ធ ឬប្រភេទHybrid គឺបញ្ចុះអត្រាអាករពី៣០ភាគរយ មកត្រឹម២០ភាគរយ ខណៈរថយន្តគ្រួសារដំណើរការដោយម៉ាស៊ូតសុទ្ធ ទម្លាក់អត្រាពន្ធពី៦០មកត្រឹម៥០ភាគរយវិញ។ សម្រាប់ រថយន្តគ្រួសារទំហំស៊ីឡាំងលើសពី១០០០ccដល់២៥០០cc ទាំងដំណើរការដោយសាំងសុទ្ធ ម៉ាស៊ូតសុទ្ធ ឬប្រភេទHybrid បានទម្លាក់អត្រាពន្ធពី៦០ មក៥០ភាគរយ។
រថយន្តគ្រួសារទំហំស៊ីឡាំងលើសពី៣០០០cc ដំណើរការដោយសាំងសុទ្ធ ឬម៉ាស៊ូតសុទ្ធ រដ្ឋាភិបាលបានបញ្ចុះអត្រាអាករពី៧០មក៥៥ភាគរយវិញ ស្របពេលដែលរថយន្តប្រភេទ Hybrid បានបញ្ចុះពី៦៥មកត្រឹម៥០វិញ ផងដែរ។
ប្រភេទរថយន្តគ្រួសារ និងរថយន្តដឹកអ្នកដំណើរ ដោយថាមពលអគ្គិសនីសុទ្ធវិញ សម្តេច ហ៊ុន សែន បានទម្លាក់អត្រាអាករពិសេសពី៣០ភាគរយ នៅមកត្រឹមតែ១០ភាគរយ ប៉ុណ្ណោះ។ ចំពោះ រថយន្តដឹកទំនិញ ប្រភេទរថយន្តសណ្តោងសម្រាប់សឺមីរ៉ឺម៉ក បានបញ្ចុះអត្រាអាករពី៤០មកត្រឹម២៥ភាគរយ ។
ដោយឡែក ចំពោះប្រភេទរថយន្តដឹកទំនិញដែលមានទម្ងន់ក្រោម៥តោន(ទម្ងន់រថយន្ត+ ទម្ងន់ផ្ទុក), រថយន្តបែន រថយន្តស្ទួច និងរថយន្តឯកទេសផ្សេងៗទៀត ដូចជា៖ រថយន្តខួង , រថយន្តលាយបេតុង, រថយន្តផលិតគ្រឿងរំសេវផ្ទុះចល័ត និងប្រភេទប្រហាក់ប្រហែល គឺមានទម្លាក់អត្រាពន្ធពិសេសពី៤០មកត្រឹម៣០ភាគរយ វិញ៕
Tag:
ពន្ធដារ
រថយន្ត
© រក្សាសិទ្ធិដោយ thmeythmey.com
