COVID-19
អន្តរជាតិ
ជប៉ុន ចាប់ផ្ដើមយុទ្ធនាការចាក់វ៉ាក់សាំងកូវីដ-១៩ ស្របពេលជួបវិបត្តិខ្វះសឺរ៉ាំង
រូបថត AFP
×![]()
ដោយ: តន ចាន់រិទ្ធារ៉ា
ជប៉ុនដែលរងគ្រោះខ្លាំងគួរសមដោយសារការរាលដាលជំងឺកូវីដ-១៩ បានចាប់ផ្ដើមយុទ្ធនាការចាក់វ៉ាក់សាំងរបស់ខ្លួនហើយនៅថ្ងៃទី១៧ ខែកុម្ភៈ ស្របពេលគ្នានឹងក្ដីបារម្ភលើកង្វះសឺរ៉ាំងដើម្បីចាក់។ បុគ្គលិកសុខាភិបាលមន្ទីរពេទ្យក្នុងក្រុងតូក្យូ ទទួលបានវ៉ាក់សាំងមុនគេ។ រដ្ឋាភិបាលក្រុងតូក្យូ ដាក់គោលដៅចាក់វ៉ាក់សាំងឱ្យច្រើនដើម្បីបញ្ចប់វិបត្តិសុខាភិបាលមួយនេះផង និងត្រៀមរៀបចំព្រឹត្តការណ៍អូឡាំពិករដូវក្ដៅខាងមុខផង។ 
បុគ្គលិកសុខាភិបាលនៅមជ្ឈមណ្ឌលវេជ្ជសាស្ត្រតូក្យូ ស្ថិតក្នុងចំណោមបុគ្គលិកសុខាភិបាលជាងបួនម៉ឺននាក់ ដែលនឹងទទួលបានវ៉ាក់សាំងកូវីដ-១៩ ។ ជប៉ុនប្រើប្រាស់វ៉ាក់សាំងរបស់ក្រុមហ៊ុន Pfizer សម្រាប់ការចាក់ឱ្យក្រុមអាទិភាពរបស់ខ្លួន។ ជំហានបន្ទាប់ ជប៉ុននឹងចាក់វ៉ាក់សាំងឱ្យបុគ្គលិកសុខាភបាលជាង៣,៧លាននាក់ទៀត មុននឹងចាក់ឱ្យប្រជាជនគោលដៅចំនួន៣៦លាននាក់ដែលមានអាយុចាប់ពី៦៥ឆ្នាំឡើង។
«នេះជាជំហានដ៏សំខាន់ក្នុងការបញ្ចប់វិបត្តិ។» អនុរដ្ឋមន្ត្រីសុខាភិបាលជប៉ុន ហ៊ីរ៉ូស៊ី យ៉ាម៉ាម៉ូតុ ប្រាប់អ្នកសារព័ត៌មានបែបនេះនៅមជ្ឈមណ្ឌលវេជ្ជសាស្ត្រតូក្យូ។
សម្រាប់ការចាក់វ៉ាក់សាំងលើប្រជាជនទាំងអស់ រដ្ឋាភិបាលជប៉ុនរំពឹងថា នឹងធានាឱ្យបានវ៉ាក់សាំងសម្រាប់ប្រជាជនទាំងជាង១២៦លាននាក់នៅពាក់កណ្ដាលឆ្នាំ២០២១ ។ លោក តារ៉ូ កូណូ រដ្ឋមន្ត្រីទទួលបន្ទុកកម្មវិធីវ៉ាក់សាំងនិយាយថា ការចាក់វ៉ាក់សាំងអាចចំណាយពេលមួយឆ្នាំ។ ការចាក់វ៉ាក់សាំងនេះ ក៏ជាកត្តាសំខាន់ផងដែរសម្រាប់ជប៉ុនដែលត្រូវរៀបចំកីឡាអូឡាំពិកក្រុងតូក្យូនៅខែកក្កដាខាងមុខ។
ស្របពេលគ្នានេះ ក្ដីបារម្ភក៏នៅតែមានទាក់ទងប្រសិទ្ធភាពរបស់វ៉ាក់សាំង Pfizer ដែលទំនងជាត្រូវស្តុកយូរ ព្រោះជប៉ុនកំពុងជួបការខ្វះខាតសឺរ៉ាំងដើម្បីចាក់វ៉ាក់សាំង។ មជ្ឈមណ្ឌវេជ្ជសាស្ត្រតូក្យូអះអាងថា ខ្លួនមានសឺរ៉ាំងគ្រប់គ្រាន់ដើម្បីបូមវ៉ាក់សាំង៦ដូសពីបំពង់ផ្ទុកវ៉ាក់សាំងនីមួយៗ។ នេះបើតាមការផ្សាយទីភ្នាក់ងារព័ត៌មាន Reuters ។
ជប៉ុន បានចុះកិច្ចព្រមព្រៀងទិញវ៉ាក់សាំងសរុបចំនួន៣១៤លានដូសពីក្រុមហ៊ុន Pfizer, AstraZeneca និង Moderna ដែលគ្រប់គ្រាន់សម្រាប់ប្រជាជនទាំងអស់៕
Tag:
ជប៉ុន
កូវីដ-១៩
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
