ជាតិ
«ទួលព័ន្ធតាឡី-បឹងស្នេហ៍» ដ៏ទាក់ទាញនៅព្រៃវែង ក្លាយជាតំបន់ការពារធម្មជាតិ
× រាជរដ្ឋាភិបាល បានសម្រេចបង្កើតតំបន់ទួលព័ន្ធតាឡី បឹងស្នេហ៍ ជាតំបន់ការពារធម្មជាតិ។ តំបន់ប្រើប្រាស់ច្រើនយ៉ាងនេះមានទំហំ ៣ ៥៥៧ហិកតា លាតសន្ធឹងលើភូមិសាស្ត្រក្រុងព្រៃវែង ស្រុកស្វាយអន្ទរ ស្រុកពាមរក៍ និងស្រុកបាភ្នំ ខេត្តព្រៃវែង។ នេះបើតាមអនុក្រឹត្យរបស់រាជរដ្ឋាភិបាល ចុះថ្ងៃទី៥ ខែកុម្ភៈ ឆ្នាំ២០២១។
តំបន់ប្រើប្រាស់ច្រើនយ៉ាងទួលព័ន្ធតាឡី បឹងស្នេហ៍ ត្រូវបានបង្កើតជាតំបន់ការពារធម្មជាតិ ក្នុងបំណងធានាការថែរក្សា និងការការពារសោភណភាពធម្មជាតិ ប្រព័ន្ធអេកូឡូស៊ី ជីវៈចម្រុះ និងវប្បធម៌ ព្រមទាំងជួយផ្ដល់ផលិតផល និងសេវាកម្មធម្មជាតិ សម្រាប់ការប្រើប្រាស់ប្រកបដោយនិរន្តរភាព ក៏ដូចជាការរក្សាលំនឹងបរិស្ថាន ការពារ និងអភិរក្សធនធានធម្មជាតិ។
រូបភាពពីក្រសួងបរិស្ថាន
តំបន់ទួលព័ន្ធតាឡី បឹងស្នេហ៍ ក៏ជាផ្នែកមួយជួយលើកកម្ពស់ការចូលរួមរបស់សហគមន៍មូលដ្ឋាន ក៏ដូចជាសាធារណជន ក្នុងការគ្រប់គ្រង ការពារ និងអភិរក្សជីវៈចម្រុះ និងធនធានធម្មជាតិផងដែរ។
យោងតាមអនុក្រឹត្យខាងលើព្រំប្រទល់និងផ្ទៃក្រឡាតំបន់ប្រើប្រាស់ច្រើនយ៉ាងទួលព័ន្ធតាឡី បឹងស្នេហ៍ នឹងត្រូវធ្វើបច្ចុប្បន្នភាព និងកែសម្រួលតាមរយៈការសិក្សាស្រាវជ្រាវនិងប្រមូលទិន្នន័យដោយផ្នែកលើមូលដ្ឋានវិទ្យាសាស្ត្រ ដើម្បីធានាតម្លៃនិងប្រយោជន៍ធនធានជីវៈចម្រុះ សេដ្ឋកិច្ច សង្គម និងវប្បធម៌។
តំបន់ទួលព័ន្ធតាឡី បឹងស្នេហ៍ គឺជាជម្រកនៃប្រភេទសត្វស្លាបច្រើនប្រភេទ ក្នុងនោះក៏មានប្រភេទសត្វស្លាប់ដែលជិតផុតពូជ និងកំពុងរងការគំរាមកំហែងនៅលើពិភពលោក ផងដែរ។ មិនតែប៉ុណ្ណោះ តំបន់នេះ ក៏មានសក្តានុពលធម្មជាតិដ៏សម្បូរបែបទៀតផង៕
រូបភាពពីក្រសួងបរិស្ថាន
Tag:
ទួលព័ន្ធតាឡី បឹងស្នេហ៍
ព្រៃវែង
បរិស្ថាន
ទេសចរណ៍
សត្វស្លាប
© រក្សាសិទ្ធិដោយ thmeythmey.com