ជាតិ
សង្គមជាតិ
អូស្ត្រាលី នឹងផ្តល់ថវិកា១,៥លានដុល្លារដល់កម្ពុជា សម្រាប់ដំណើរការផ្លូវច្បាប់សាលាក្តីខ្មែរក្រហម
រូបថត៖ ECCC
×![]()
ភ្នំពេញ៖ រដ្ឋាភិបាលប្រទេសអូស្ត្រាលី នឹងបន្តផ្តល់ថវិកាចំនួន២លានដុល្លារអូស្ត្រាលី (ប្រមាណ១,៥ដុល្លារអាមេរិក) ដល់កម្ពុជា ដើម្បីជួយបញ្ចប់ដំណើរការនីតិវិធីច្បាប់របស់សាលាក្តីខ្មែរក្រហម។ បើតាមចុះផ្សាយរបស់ស្ថានទូតអូស្រា្តលីប្រចាំកម្ពុជានាថ្ងៃទី១៩កុម្ភៈ ថវិកានេះនឹងផ្តល់ឱ្យកម្ពុជា ក្នុងរយៈពេល២ឆ្នាំ តាមរយៈអង្គការសហប្រជាជាតិ(UN)។
សម្រាប់ថវិកាជំនួយរបស់ប្រទេសអូស្រា្តលីនេះ ក៏ដើម្បីគាំទ្រដល់បណ្ណសារនិងយន្តការផ្សព្វផ្សាយរបស់សហគមន៍ ផងដែរ។ ស្ថានទូតអូស្ត្រាលីបានអះអាងដូច្នេះ៖ «ការគាំទ្ររបស់អូស្ត្រាលីចំពោះសាលាក្តីខ្មែរក្រហម ឆ្លុះបញ្ចាំងពីការប្តេជ្ញាចិត្តដ៏មុតមាំរបស់យើងលើយុត្តិធម៌ព្រហ្មទណ្ឌអន្តរជាតិ និងភាពជឿជាក់របស់យើង ថាតាមរយៈការយល់ដឹងនិងការទទួលខុសត្រូវលើអំពើដ៏អាក្រក់នៅអតីតកាល។ យើងអាចធ្វើការជាមួយប្រទេសកម្ពុជា និងតំបន់របស់យើង ដើម្បីធានាថារឿងទាំងនេះនឹងមិនកើតមានម្តងទៀតឡើយ»។
ចាប់តាំងពីឆ្នាំ២០០៥មក ប្រទេសអូស្ត្រាលី បានបរិច្ចាកថវិកាជាង៣១លានដុល្លារ ដល់សាលាក្តីខ្មែរក្រហម ហើយប្រទេសនេះបានក្លាយជាម្ចាស់ជំនួយអន្តរជាតិធំជាងគេលំដាប់លេខបីសម្រាប់កម្ពុជា។
អូស្ត្រាលី គឺជាប្រទេសគាំទ្រដ៏សំខាន់នៃសាលាក្តីខ្មែរក្រហម ដែលកំពុងជួយធានារកយុត្តិធម៌ជូនជនរងគ្រោះជាច្រើននៃរបបខ្មែរក្រហម ព្រមទាំងក្រុមគ្រួសាររបស់ពួកគេ៕
Tag:
សាលាក្តីខ្មែរក្រហម
© រក្សាសិទ្ធិដោយ thmeythmey.com
