អន្តរជាតិ
រដ្ឋមន្ត្រីរតនាគារអាមេរិក៖ អាមេរិកនៅតែរក្សាពន្ធនាំចូលលើទំនិញរបស់ចិនដដែល លោកស្រីJanet Yellen រដ្ឋមន្ត្រីក្រសួងរតនាគារអាមេរិក។ រូបភាព៖AFP
× រដ្ឋបាលលោកប្រធានាធិបតី ចូ បៃឌិន អនុវត្តគោលនយោបាយពាណិជ្ជកម្មដាក់ពន្ធលើទំនិញចិន ដែលដាក់ចេញដោយអតីតប្រធានាធិបតី ដូណាល់ ត្រាំ មួយរយៈសិន។ លោកស្រី Janet Yellen រដ្ឋមន្ត្រីក្រសួងរតនាគារជាតិអាមេរិក និយាយបែបនេះនៅថ្ងៃទី១៨ ខែកុម្ភៈ។ រដ្ឋបាលបៃឌិន នឹងពិនិត្យគោលនយោបាយទាំងនោះសារជាថ្មី មុននឹងត្រូវពិចារណាថានឹងត្រូវកែប្រែ ឬលុបចោល។
ជម្លោះពាណិជ្ជកម្មរវាងចិន និងអាមេរិកលើការតម្លើងពន្ធទំនិញនាំចូលពីគ្នាទៅវិញទៅមក ប្រហែលជាមិនទាន់ដល់ទីបញ្ចប់ឡើយបើទោះបីជាអាមេរិកមានប្រធានាធិបតីថ្មីក៏ដោយ។ លោក ដូណាល់ ត្រាំ បង្កើនពន្ធនាំចូលលើទំនិញចិនដោយអះអាងថាចិនរំលោភកម្មសិទ្ធិបញ្ញា និងទិញទំនិញតិចពេកពីអាមេរិក។
«នាពេលនេះ យើងនឹងរក្សាពន្ធដែលរដ្ឋបាលត្រាំបានដាក់ទៅលើចិន ហើយយើងនឹងវាយតម្លៃចំពោះសកម្មភាពណាដែលសក្តិសម»។ នេះការលើកឡើងរបស់លោកស្រី Janet Yellen ក្នុងកិច្ចសម្ភាសជាមួយទូរទស្សន៍អាមេរិក CNBC នៅថ្ងៃទី១៨ ខែកុម្ភៈ ដែលរំពឹងថា ប៉េកាំងនឹងបន្តគោរពការសន្យានាពេលចរចាពាណិជ្ជកម្ម។ ចិនសន្យាទិញទំនិញ និងសេវាកម្មបន្ថែមពីអាមេរិកក្នុងតម្លៃ២០០ពាន់លានដុល្លារ សម្រាប់រយៈពេលពីរឆ្នាំ ប៉ុន្តែចិនទិញបានតែ៦០ភាគរយនៃការសន្យាប៉ុណ្ណោះ។
នៅពេលចោទជាសំណួរថាតើ ការបង្កើនពន្ធទំនិញសម្រេចបានអ្វីខ្លះ លោកស្រី Yellen ស្ទាក់ស្ទើរផ្ដល់ចម្លើយ និងថា នឹងពិនិត្យមើលរឿងនេះ។ លោកស្រីលើកឡើងថា ក្រសួងរតនាគារកំពុងស្ថិតក្នុងដំណាក់កាលពិនិត្យលើវិធីសាស្ត្រដើម្បីទប់ទល់ជាមួយនឹងចិនដូចជាការការអនុវត្តគោលនយោបាយពាណិជ្ជកម្មមិនស្មើភាព ការផ្ទេរបច្ចេកវិទ្យាដោយបង្ខំ និងឧបត្ថម្ភធនក្នុងឧស្សាហកម្មបច្ចេកវិទ្យាកម្រិតខ្ពស់។
សេតវិមាន កាលពីខែមុនបញ្ជាក់ថា រដ្ឋបាល បៃឌិន នឹងពិនិត្យឡើងវិញលើគោលនយោបាយសន្តិសុខដែលដាក់ចេញដោយអតីតប្រធានាធិបតី ត្រាំ រួមទាំងកិច្ចព្រមព្រៀងពាណិជ្ជកម្មបណ្តោះអាសន្នដែលមានជាមួយចិន។ កិច្ចព្រមព្រៀងបណ្តោះអាសន្នបានបន្ធូរបន្ថយភាពតានតឹងរវាងមហាអំណាចសេដ្ឋកិច្ចទាំងពីរ។ ជម្លោះពាណិជ្ជកម្ម បណ្តាលឱ្យពលរដ្ឋអាមេរិកជា ២៤៥,០០០នាក់ បាត់បង់ការងារ។
របាយការណ៍នៅថ្ងៃទី១៨ កុម្ភៈ របស់ក្រសួងពាណិជ្ជកម្មអាមេរិក បង្ហាញថា ទំហំនៃការនាំចេញផលិតផលកសិកម្មកើនឡើងដល់៣១,៥ពាន់លានដុល្លារក្នុងឆ្នាំ២០២០ ដែលជាចំនួនច្រើនបំផុតមិនធ្លាប់មាន។ ចិនជាប្រទេសដែលទិញផលិតផលកសិកម្មច្រើនបំផុតពីអាមេរិករួមមានពោត និងសណ្តែកសៀងដើម្បីធ្វើជាចំណីសត្វ។ ក្នុងឆ្នាំ២០២០ តម្លៃផលិតផលកសិកម្មទាំងនោះ ឡើងថ្លៃក្នុងកម្រិតមួយមិនធ្លាប់មាន។ ចិនក៏ត្រូវបានរំពឹងថានឹង បន្តនៅជាទីផ្សាកសិកម្មធំបំផុតរបស់អាមេរិកសម្រាប់ឆ្នាំ២០២១ផងដែរ។ ក្រៅពីចិន ម៉ិកស៊ិក និងកាណាដា ជាប្រទេសដែលទិញទំនិញកសិកម្មលំដាប់ទីពីរ និងទីបី។
ក្រៅតែពីបញ្ហាពាណិជ្ជកម្ម លោកស្រី Yallen ក៏លើកឡើងផងដែរថា ប្រទេសទាំងពីរត្រូវធ្វើការជាមួយគ្នា និងសហការគ្នាលើបញ្ហាបម្រែបម្រួលអាកាសធាតុ ជំងឺឆ្លង និងការស្រោចស្រង់សេដ្ឋកិច្ចឡើងវិញ៕
© រក្សាសិទ្ធិដោយ thmeythmey.com