មិនបិទសាលា! ប៉ុន្តែក្រសួងអប់រំ រឹតបន្តឹងវិធានសុខាភិបាល និងហាមសកម្មភាពកីឡាលើស២០នាក់

COVID-19

ជាតិ

មិនបិទសាលា! ប៉ុន្តែក្រសួងអប់រំ រឹតបន្តឹងវិធានសុខាភិបាល និងហាមសកម្មភាពកីឡាលើស២០នាក់

20, Feb 2021 , 7:59 pm

រូបភាព

ដោយ:

ភ្នំពេញ៖ ទោះមានករណីវិជ្ជមាន៣២នាក់ក្នុងព្រឹត្តិការណ៍សហគមន៍២០កុម្ភៈ សម្តេចនាយករដ្ឋមន្ត្រី ហ៊ុន សែន នៅតែអនុញ្ញាតឱ្យ គ្រឹះស្ថានអប់រំទាំងអស់ បន្តដំណើរការ ប៉ុន្តែត្រូវអនុវត្តវិធានសុខាភិបាលជាចាំបាច់។ ជាមួយគ្នា ក្រសួងអប់រំ យុវជន និងកីឡា ក៏បានចេញសេចក្ដីណែនាំ និង ជូនដំណឹង ពីការរឹតបន្តឹង ការអនុវត្តវិធានសុវត្ថិភាព ការអនុញ្ញាតឱ្យមន្ត្រីអប់រំ ធ្វើការពីផ្ទះ និងមិនអនុញ្ញាតឱ្យលេងកីឡាលើសពី ២០នាក់។

នៅថ្ងៃទី២០ កុម្ភៈ ឆ្នាំ២០២១ ក្រសួងអប់រំ យុវជន និងកីឡា បានចេញសេចក្ដីណែនាំ និងសេចក្តីជូនដំណឹង ពីការរឹតបន្តឹងការអនុវត្តវិធានសុវត្ថិភាព នៅតាមគ្រឹះស្ថានសិក្សា ដើម្បីទប់ស្កាត់ ការរីករាលដាលព្រឹត្តិការណ៍២០កុម្ភៈ។

ក្នុងសេចក្ដីជូនដំណឹង រដ្ឋមន្ត្រីក្រសួងអប់រំ លោក ហង់ ជួន ណារ៉ុន បានលើកឡើងពីការផ្អាកការជួបជុំ និងសកម្មភាពកីឡា ដែលមានអ្នកចូលរួមលើសពី២០នាក់។ គណៈគ្រប់គ្រង និងបុគ្គលិកគ្រឹះស្ថានអប់រំ ដែលមានពាក់ព័ន្ធ នឹងព្រឹត្តិការណ៍២០កុម្ភៈ ត្រូវរាយការណ៍ជាបន្ទាប់។

ដោយឡែកក្នុងសេចក្ដីណែនាំ មួយផ្សេងទៀត លោករដ្ឋមន្ត្រីបានណែនាំឱ្យ មន្ត្រីអប់រំ និងបុគ្គលិកទាំងអស់ ត្រូវឆ្លងឯកសារនានា តាមប្រព័ន្ធអនឡាញ ដូចជាការប្រើប្រាស់ Telegram, Whatsapp និងប្រព័ន្ធឌីជីថលផ្សេងៗ ជំនួសវិញ ។

គ្រប់គ្រឹះស្ថានទាំងអស់ត្រូវបែងចែកវេន សម្រាប់អនុវត្តការងារ ជៀសវាង ការកកស្ទះការងារក្នុងស្ថាប័ន។ មន្ត្រីអប់រំ បុគ្គលិក និងសិស្សនិស្សិត ទាំងអស់ត្រូវអនុវត្តវិធានសុវត្ថិភាព យ៉ាងតឹងរ៉ឹងបំផុត ដោយជាការពាក់ម៉ាស់ ការលាងដៃ និងការវាស់កម្ដៅរាល់ពេលចេញចូល។

សូមជម្រាបផងដែរថា ក្នុងព្រឹត្តិការណ៍២០កុម្ភះ មានអ្នកឆ្លងជំងឺកូវីដ-១៩ ចំនួន ៣២នាក់ ដែលធ្វើឱ្យករណីឆ្លងជំងឺកូវីដ-១៩ ក្នុងប្រទេសកម្ពុជា កើនដល់ ៥១៦នាក់៕