ជាតិ
សោកស្តាយ! ទន្សោងមួយក្បាលទម្ងន់ជិត១តោន ងាប់ដោយសារជាប់អន្ទាក់ព្រាននៅព្រៃព្រះរកា
នេះជាទន្សោងដែលឧទ្យានុរក្សប្រទះឃើញងាប់នៅដែនជម្រកសត្វព្រៃរកា កាលពីថ្ងៃទី១៩កុម្ភៈ ឆ្នាំ២០២១។ រូបថត៖ លោក នេត្រ ភក្ត្រា រដ្ឋាលេខាធិការក្រសួងបរិស្ថាន
×![]()
ភ្នំពេញ៖ សត្វទន្សោងឈ្មោលមួយក្បាលមានទម្ងន់រហូតជិត១តោន ត្រូវបានមន្ត្រីឧទ្យានុរក្សរបស់ក្រសួងបរិស្ថាន ឃើញងាប់នៅដែនជម្រកសត្វព្រៃព្រះរកា ក្នុងខេត្តព្រះវិហារ។ លោក នេត្រ ភក្ត្រា រដ្ឋាលេខាធិការក្រសួងបរិស្ថាន បញ្ជាក់ថា ការបាត់បង់ជីវិតរបស់ទន្សោងនេះ គឺដោយសារតែជាប់អន្ទាក់ប្រភេទខ្សែកាបនិងការបាញ់សម្លាប់របស់ព្រានព្រៃ។ 
បើតាមលោកនេត្រ ភក្ត្រា ទន្សោងនេះបានងាប់ កាលពីថ្ងៃទី១៨កុម្ភៈ ឆ្នាំ២០២១ ក្រោយមកបានមន្ត្រីឧទ្យានុរក្ស ប្រទះឃើញសាកសព នាថ្ងៃទី១៩កុម្ភៈ។ បច្ចុប្បន្ន សពរបស់ទន្សោងនេះ បានយកបញ្ចុះតាមបែបបប្រពៃណី នៅស្នាក់ការបរិស្ថានក្នុងបរិស្ថានចុងភូមិអូរកក់ ឃុំពោធិ៍ ស្រុកត្បែងមានជ័យ ខេត្តព្រះវិហារ។
ការបាត់បង់ជីវិតរបស់សត្វកម្រមួយក្បាលនេះ គឺជាការសោកស្តាយយ៉ាងខ្លាំងសម្រាប់ក្រសួងបរិស្ថាន ក៏ដូចពលរដ្ឋកម្ពុជាផងដែរ។ លោកនេត្រ ភក្ត្រា បានលើកឡើងថា នៅកម្ពុជាមានសត្វទន្សោងចន្លោះពី២,៧០០ទៅ៥,៧០០ក្បាល កំពុងរស់នៅក្នុងដែនជម្រកនិងតំបន់ការពារនានា។ រដ្ឋលេខាធិការ និងជាអ្នកនាំពាក្យរូបនេះ បានបញ្ជាក់ប្រាប់សារព័ត៌មានថ្មីៗតាមទូរសព្ទ នារសៀសថ្ងៃទី២០កុម្ភៈ ថា ចំនួននេះ បានធ្វើឱ្យកម្ពុជា ជាកន្លែងដែលមានវត្តមានសត្វទន្សោងច្រើនជាងគេនៅលើពិភពលោក ខណៈនៅលើពិភពលោក ត្រូវបានគេប៉ានស្មានមានចន្លោះពី៥,៩០០ ទៅ១១,០០០ក្បាល ប៉ុណ្ណោះ។
ថ្វីដ្បិតកម្ពុជាមានសត្វទន្សោងរស់នៅច្រើនជាគេនៅពិភពលោក ប៉ុន្តែការបាត់បង់ជីវិតរបស់ប្រភេទសត្វនេះ ដោយសារតែអន្ទាក់ និងការបាញ់សម្លាប់របស់ព្រានព្រៃនៅតាមដែនជម្រកសត្វព្រៃ ក៏មានទំហំច្រើនផងដែរ។ កាលឆ្នាំ២០២០ មានសត្វទន្សោង និងខ្ទីងជាង១០ក្បាល បានងាប់ដោយសារអន្ទាក់ និងការបរបាញ់។ លោកនេត្រ ភក្ត្រា បញ្ជាក់ថា៖«ចំនួននេះ គឺយើងបានរាប់តែករណីដែលក្រុមការងារយើង[ឧទ្យានុរក្ស] រកឃើញប៉ុណ្ណោះ»។ ក្នុងឆ្នាំ២០២០ដដែល មន្ត្រីឧទ្យានុរក្សនៃដោះអន្ទាក់របស់ព្រានព្រៃបានរហូតជិត៥ម៉ឺនអន្ទាក់។ អន្ទាក់គឺជាឃាតករលាក់មុខ ដែលមាននិន្នាការកើនឡើង ទាំងប្រភេទអន្ទាក់ខ្សែគោ, ខ្សែកាប និងខ្សែឆក់ជាដើម។ លោកនេត្រ ភក្ត្រា បន្តនិយាយដូច្នេះ៕
Tag:
ទន្សោង
លោក នេត្រ ភក្ត្រា
© រក្សាសិទ្ធិដោយ thmeythmey.com
