ជាតិ
បទសម្ភាសន៍
វីដេអូ
លោក ញឹក សិរីរតនា ប្តេជ្ញាបណ្ដុះបណ្ដាលយុវជន ដើម្បីរក្សាតម្លៃសិល្បៈចម្លាក់ស្បែក
×
ដោយ ៖ ឡុង តូន
សៀមរាប៖ ផ្ដើមចេញពីស្ថានភាពជាក្មេងកំព្រាឳពុកម្ដាយ លោក ញឹក សិរីរតនា បានតស៊ូរៀនសូត្រអស់រយៈពេល៤ឆ្នាំលើជំនាញផលិត គូរ និងដាប់ឆ្លាក់វត្ថុសិល្បៈ ដែលផលិតអំពីស្បែកសត្វ (គោ ក្របី) នៅក្នុងខេត្តសៀមរាប។ មានបទពិសោធជាង៥ឆ្នាំ លោក សិរីរតនា បានសម្រេចចិត្តបើកសិប្បកម្មផ្ទាល់ខ្លួននៅចុងឆ្នាំ២០០១។ បច្ចុប្បន្ន លោក សិរីរតនា កំពុងបន្តអាជីពចម្លាក់ស្បែកនេះ សម្រាប់លក់ និងតាំងបង្ហាញជូនភ្ញៀវទេសចរ។
ដើម្បីជ្រាបច្បាស់សូមអញ្ជើញលោក-អ្នកនាងទស្សនាវីដអូ ដូចតទៅ៖
«ថ្នាំដែលប្រើប្រាស់លើស្បែក គឺជាថ្នាំធម្មជាតិ យកចេញពីសំបកឈើ។ សំបកឈើ ត្រូវដំឲ្យទក់ រួចយកមកស្ងោរឲ្យបានជាទឹកថ្នាំ ដើម្បីយកមកលាប»។ នេះជាការបញ្ជាក់របស់លោក សិរីរតនា ដោយបន្ថែមថា លោក ត្រូវសម្អាតស្បែកសត្វទាំងនោះឲ្យស្អាត ព្រមទាំងបំបាត់ក្លិនស្បែកទាំងអស់ មុននឹងលោកយកមកលាបថ្នាំ។ ជាមួយគ្នានេះ ស្បែកសត្វដែលបានសម្អាតរួចត្រូវរក្សាទុករយៈពេល៣ខែ មុននឹងយកស្បែកទាំងនោះមកគូរជារូបចម្លាក់។
ត្បិតថា ការធ្វើសិប្បកម្មចម្លាក់នេះ មានរយៈពេលយូរ តែលោក សិរីរតនា នៅតែបន្តការងារនេះ ព្រមទាំងបណ្ដុះបណ្ដាលយុវជនជាច្រើនទៀត ដើម្បីមានជំនាញច្បាស់លាស់ និងរក្សាតម្លៃសិល្បៈចម្លាក់ស្បែក។ នៅក្នុងសិប្បកម្មចម្លាក់ស្បែករបស់លោក សិរីរតនា ផ្តោតសំខាន់លើវត្ថុសិល្បៈជាអាទិភាពសម្រាប់តាំងលម្អ ព្រោះការផលិតវត្ថុសិល្បៈសម្រាប់សម្ដែងពុំសូវមានទីផ្សារ។
អ្នកជំនាញសិល្បៈស្បែករូបនេះ អះអាងថា ការបើកកន្លែងបណ្ដុះបណ្ដាលជំនាញផលិតចម្លាក់ស្បែកនេះ ដើម្បីបន្សល់ទុកស្នាដៃនៃមរតកវប្បធម៌មួយនេះ ដល់មនុស្សជំនាន់ក្រោយ។ លោក សិរីរតនា បានសម្រេចចិត្តបណ្ដុះបណ្ដាលដល់យុវជន៥នាក់ដំបូង ដែលពួកគាត់ទាំងនោះមកពីគ្រួសារក្រីក្រ។ រយៈពេល ៣ឆ្នាំ ក្រោយ សិប្បកម្មនេះ បានបណ្ដុះបណ្ដាលយុវជនចំនួន ២៥នាក់ និងកំពុងបណ្ដុះបណ្ដាលយុវជនបន្ថែមទៀត៕
Tag:
សិល្បៈ
ចម្លាក់ស្បែក
សៀមរាប
© រក្សាសិទ្ធិដោយ thmeythmey.com