អន្តរជាតិ
ទិដ្ឋភាពមិនធ្លាប់ឃើញនៅភពព្រះអង្គារ ដែលផ្តិតដោយយានណាសា Perseverance
× Perseverance ដែលមានរហស្សនាមថា Percy ជាយានរុករកភពអង្គារ (Mars rover) ដែលចាប់ដំណើរការពីថ្ងៃទី៣០ខែកក្កដា ឆ្នាំ២០២០ មក។ កាលពីថ្ងៃទី១៨ ខែកុម្ភៈ យានរបស់ទីភ្នាក់ងារអវកាសណាសាមួយនេះ បានចុះចតដោយជោគជ័យនៅភពព្រះអង្គារ ហើយបានបញ្ជូនរូបភាពដ៏ទាក់ទាញ និងមិនធ្លាប់ឃើញពីមុនជាបន្តបន្ទាប់។
ក្រោយចំណាយពេល២០៣ថ្ងៃ លើចម្ងាយផ្លូវ ៤៧២លានគីឡូម៉ែត្រ យាន Perseverance បានទៅភពព្រះអង្គារដែលគោលដៅរបស់ខ្លួន។ បេសកកម្ម Mars 2020 ដ៏ជោគជ័យជាប្រវត្តិសាស្ត្រនេះ ត្រូវអះអាងដោយអង្គភាព Jet Propulsion Laboratory របស់ណាសា ដែលស្ថិតនៅរដ្ឋ Southern California សហរដ្ឋអាមេរិក។
«៧នាទីពោរពេញដោយក្តីរន្ធត់» (Seven Minutes of Terror) ជាពេលវេលាដ៏ញាប់ញ័របំផុត ដោយសារតែយាន Perserverance ត្រូវចុះចតដោយខ្លួនឯងនៅភពអង្គារ ឬផែនដីក្រហម (Red Plantet) ដោយគ្មានជំនួញអន្តរាគមន៍បច្ចេកទេសពីណាសានៅភពផែនដី។
ទីបំផុត Perseverance បានចុះចតប្រកបដោយជោគជ័យ ហើយទីភ្នាក់ងារណាសា បានបង្ហាញរូបភាពអបអរសាទរ ប្រកបដោយក្តីរំភើប។ «ខ្ញុំបានមកពីចម្ងាយជិត៣០០លានម៉ាយល៍ ហើយខ្ញុំទើបតែចាប់ផ្តើម»។ គណនី Twitter ផ្លូវការ Nasa’s Perseverance Mars Rover បានសរសេរយ៉ាងដូច្នេះ ហើយបន្តបង្ហោះរូបភាពជាបន្តបន្ទាប់។
Perseverance បានចុះចតនៅទីតាំងដែលណាសាដាក់ឈ្មោះ Jezero Crater (ជាភាសាស្លាវិក មានន័យថា បឹង)។ ទីតាំងនោះ ត្រូវបានអ្នកវិទ្យាសាស្ត្រអះអាងថា ធ្លាប់ជាបឹងកាលប្រមាណពី៣ ទៅ៤ពាន់លានឆ្នាំមុន។
លោកប្រធានាធិបតីអាមេរិក ចូ បៃឌិន បានតាមដានយ៉ាងយកចិត្តទុកដាក់ចំពោះដំណើររបស់ Perseverance ទៅកាន់ភពព្រះអង្គារ រហូតដល់ចុះចតដោយជោគជ័យ។ លោកបានកោតសរសើរការប្រឹងប្រែងតស៊ូយ៉ាងខ្លាំងក្លារបស់ក្រុមការងារអង្គការណាសា៕
Tag:
អវកាស
ណាសា
ភពព្រះអង្គារ
© រក្សាសិទ្ធិដោយ thmeythmey.com