COVID-19
ជាតិ
អ្នកឆ្លង COVID-19 ចំនួន៣៥នាក់ទៀតនៅកម្ពុជា ដោយ៣១នាក់ពាក់ព័ន្ធព្រឹត្តិការណ៍២០កុម្ភៈ ក្រុមការងារចាក់វ៉ាក់សាំងកូវីដ-១៩
× ក្រសួងសុខាភិបាលនាព្រឹកនេះ បានប្រកាសពីករណីឆ្លងកូវីដ-១៩ ចំនួន៣៥នាក់ទៀត ដោយ៣១នាក់ពាក់ព័ន្ធនឹងព្រឹត្តិការណ៍សហគមន៍២០កុម្ភៈ និង៤នាក់ជាអ្នកដំណើរពីបរទេស។
ករណីសហគមន៍៣១នាក់ មានបុរសជនជាតិខ្មែរ៥នាក់ កុមារាអាយុ១១ឆ្នាំ ១នាក់ ស្ត្រីខ្មែរ៥នាក់ បុរសចិន៧នាក់ ស្ត្រីចិន១២នាក់ និងបុរសកូរ៉េខាងត្បូង១នាក់។ អ្នកទាំងនោះ ភាគច្រើនមានអាសយដ្ឋានក្នុងរាជធានីភ្នំពេញ លើកលែងបុរសខ្មែរអាយុ៤៧ឆ្នាំម្នាក់ មានអាសយដ្ឋានក្រុងតាខ្មៅ ខេត្តកណ្តាល។
ក្នុងចំណោមនោះ ១៧នាក់ ត្រូវបានដាក់សម្រាកឲ្យព្យាបាលនៅមជ្ឈមណ្ឌលជាតិកំចាត់រោគរបេង និងហង់សិន ១៣នាក់នៅពេទ្យមិត្តភាពខ្មែរសូវៀត និង១នាក់នៅមណ្ឌលសុខភាពចាក់អង្រែ។
រីឯ៤ករណីទៀត ជាករណីនាំចូល ដែលមានបុរសជនជាតិខ្មែរអាយុ៤៣ឆ្នាំ ដែលមកពីហ្គាណា, បុរសចិនអាយុ៣៨ឆ្នាំ, ៤០ឆ្នាំ និងស្ត្រីចិនអាយុ២៩ឆ្នាំ ដែលមកពីប្រទេសរបស់ខ្លួន ហើយមកដល់កម្ពុជានៅថ្ងៃទី១១ ខែកុម្ភៈ។
ជាមួយគ្នា អ្នកជំងឺ២នាក់ទៀតបានជាសះស្បើយ ដែលក្នុងនោះមានបុរសឥណ្ឌាអាយុ២៨ឆ្នាំ និងស្ត្រីឥណ្ឌាអាយុ២២ឆ្នាំ។
គិតមកដល់ពេលនេះ កម្ពុជាមានអ្នកឆ្លងកូវីដ-១៩ សរុប៥៦៨នាក់ ដោយ៤៧៥នាក់បានជាសះស្បើយ។ អ្នកឆ្លងក្នុងព្រឹត្តិការណ៍សហគមន៍២០កុម្ភៈ ឡើងដល់៧៦នាក់ហើយ៕
© រក្សាសិទ្ធិដោយ thmeythmey.com