អន្តរជាតិ
នូវែលសេឡង់ ជំរុញឱ្យលុបពន្ធលើសម្ភារប្រយុទ្ធជំងឺកូវីដ-១៩ ក្នុងចំណោមសមាជិក APEC
×![]()
ដោយ ឈួន ឈីវអ៊ីង
នូវែលសេឡង់ ជាប្រទេសរៀបចំកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកនៅឆ្នាំ២០២១ នេះ។ មន្ត្រីជាន់ខ្ពស់ពាណិជ្ជកម្មប្រទេសនេះ អះអាងថា នូវែលសេឡង់ នឹងប្រើប្រាស់វេទិកានេះដើម្បី ស្វែងរកកិច្ចព្រមព្រៀងជាសកលពាក់ព័ន្ធនឹងការលុបបំបាត់ពន្ធនាំចេញនិងនាំចូលលើទំនិញដែលចាំបាច់ ក្នុងការទប់ស្កាត់នឹងជំងឺកូវីដ-១៩។
«សាររបស់យើងគឺ ដើម្បីដោះស្រាយការរីករាលនៃជំងឺជាសាកល យើងត្រូវការការចូលរួមជាសាកលប ន្ថែមទៀត»។ អនុរដ្ឋលេខាធិការផ្នែកពាណិជ្ជកម្មនិងសេដ្ឋកិច្ចនូវែលសេឡង់លោក Vangelis Vitalis បញ្ជាក់បែបនេះក្នុងកិច្ចសម្ភាសជាមួយទីភ្នាក់ងារព័ត៌មាន Reuters ។ លោក Vitalis ជាប្រធាននៃកិច្ចប្រជុំមន្ត្រីជាន់ខ្ពស់នៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) សម្រាប់ឆ្នាំ ២០២១។
បើតាម Reuters នូវែលសេឡង់ស្នើឱ្យការដឹកជញ្ជូនឱសថ ឧបករណ៍វេជ្ជសាស្ត្រ និងគ្រឿងបរិក្ខារ វះកាត់ ក៏ដូចជាផលិតផល និងទំនិញដទៃទៀតរវាងសមាជិក APEC ទាំង២១ ដោយមិយកពន្ធគយ និងបន្ធូរបន្ថយការរឹតបន្តឹងផ្សេងទៀតលើសកម្មភាពនាំចេញនិងនាំចូលពេលឆ្លងកាត់ព្រំដែន។ លោក Vitalis បញ្ជាក់ថា សំណើនេះនឹងត្រូវព្រមព្រៀងគ្នានៅសប្តាហ៍ខាងមុខដើម្បីដាក់ឱ្យរដ្ឋមន្ត្រីពាណិជ្ជកម្ម APEC អនុម័តក្នុងកិច្ចប្រជុំខែឧសភាខាងមុខ។
កន្លងមក បណ្តាសមាជិក APEC មួយចំនួនបានប្តេជ្ញាចិត្តរក្សាខ្សែច្រវាក់ផ្គត់ផ្គង់ ផលិតផលសម្រាប់ការផលិតវ៉ាក់សាំងកូវីដ-១៩ ឱ្យនៅបើកចំហ និងលុបបំបាត់ការរឹតត្បិតពាណិជ្ជកម្មលើទំនិញចាំបាច់ ជាពិសេសការផ្គត់ផ្គង់ផ្នែកវេជ្ជសាស្ត្រ។ យ៉ាងណាមិញ មានតែនូវែលសេឡង់ និងសិង្ហបុរីប៉ុណ្ណោះ ដែលអនុវត្តបានប្រសើរជាងគេរហូតដល់លុបបំបាត់ពន្ធគយលើផលិតផលជាង១២០ ដែលចាំបាច់ក្នុងការប្រយុទ្ធប្រឆាំងនឹងកូវីដ-១៩។
ដ្បិតមានប្រទេសពីរចេញមុខចេញមាត់ខ្លាំងជាងគេបែបនេះ លោក Vitalis បង្ហាញក្ដីបារម្ភខ្លាំង និងចង់ឱ្យសមាជិក APEC ចេញបញ្ជីមួយដែលកំណត់មុខទំនិញ និងសេវាកម្មសំខាន់ៗ និងចាំបាច់។
គិតមកត្រឹមថ្ងៃទី២២ ខែកុម្ភៈ នូវែលសេងឡង់មានករណីវិជ្ជមានសល់ត្រឹមតែ ៥៤នាក់ប៉ុណ្ណោះ ខណៈមានអ្នកស្លាប់២៦នាក់។ ប្រទេសនេះបានចាប់ផ្តើមចាក់វ៉ាក់សាំង Pfizer-BioNTech ដល់កម្មករតាមព្រំដែនចាប់ពីថ្ងៃទី២០ ខែកុម្ភៈមក។ ប៉ុន្តែសម្រាប់ប្រជាជនភាគច្រើននៃប្រជាជនសរុបប្រមាណ៥លាននាក់ មិនត្រូវបានរំពឹងថា នឹងទទួលការចាក់វ៉ាក់សាំងឡើយរហូតដល់ពាក់កណ្តាលឆ្នាំនេះ៕
Tag:
នូវែលសេឡង់
APEC
© រក្សាសិទ្ធិដោយ thmeythmey.com
