នៅក្នុងពូល A មន្ទីរអយក ខេត្តកំពង់ស្ពឺ បានទទួលជ័យជម្នះ ២-១ លើមន្ទីរអយក ខេត្តកំពង់ឆ្នាំង នៅទីលានវិទ្យាល័យខេត្តកំពង់ស្ពឺ។ លទ្ធផលនេះ នាំឲ្យកំពង់ស្ពឺឡើងឈរលើកំពូលតារាងបណ្តោះអាសន្ន ដោយមាន៣ពិន្ទុ ខណៈកំពង់ឆ្នាំងរក្សា៣ពិន្ទុដដែល។

 

សម្រាប់ការប្រកួតនៅទីលានវិទ្យាល័យនេត យ៉ង់ ស.ស.យ.ក ខេត្តបាត់ដំបង បន្តទទួលបានជ័យជម្នះយ៉ាងធំធេងម្តងទៀតនៅក្នុងពូល B ដោយបានយកឈ្នះ ស.ស.យ.ក ខេត្តពោធិ៍សាត់ដល់ទៅ ៨-១។ ជាជ័យជម្នះ២លើកជាប់គ្នាសម្រាប់បាត់ដំបង តែជាបរាជ័យ២លើកជាប់គ្នាផងដែរសម្រាប់ពោធិ៍សាត់។

 

នៅពូល C ម្ចាស់ផ្ទះសៀមរាប អេហ្វស៊ី បានបើកឆាកនៅកីឡដ្ឋានស្វាយធំ ជាមួយនឹងការខកចិត្ត ដោយចាញ់កងរាជអាវុធហត្ថកំពង់ធំ ១-០។ នេះជាការស្តារមុខមាត់ឡើងវិញសម្រាប់កំពង់ធំ ក្រោយបើកឆាក ចាញ់ឧត្តរមានជ័យ ២-១ នៅទឹកដីខ្លួនឯង។

 

រីឯនៅពូល E មន្ទីរអយក ខេត្តកែប ឡើងទៅឈរកំពូលតារាងបណ្តោះអាសន្ន ដោយមាន៤ពិន្ទុ ក្រោយឈ្នះភ្ញៀវកំពត ៥-២ នៅទីលានខេត្តកែបផ្ទាល់។ កំពតបានរងបរាជ័យពីរប្រកួតជាប់គ្នា បន្ទាប់ពីរងគ្រោះដោយសារខេត្តព្រះសីហនុ ១-០ នៅទឹកដីខ្លួន។

 

ដោយឡែកជំនួបពូល F ឯណោះវិញ មន្ទីរអយក ខេត្តត្បូងឃ្មុំ បានធ្វើឲ្យម្ចាស់ផ្ទះ ខេត្តព្រះវិហារ បើកឆាកជាមួយនឹងបរាជ័យ ៤-២។ ត្បូងឃ្មុំ បាន៦ពិន្ទុពេញ ពីការប្រកួត២លើក ខណៈព្រះវិហារ និងរតនគិរី មិនទាន់មានពិន្ទុរាប់៕