COVID-19
ជាតិ
តុលាការភ្នំពេញ ផ្អាកបើកសវនាការមួយរយៈ រូបពី AFP
× ដោយសារបារម្ភនឹងជំងឺកូវីដ-១៩ ដែលកំពុងឆ្លងចូលសហគមន៍នៅកម្ពុជា តុលាការរាជធានីភ្នំពេញ បានប្រកាសផ្អាកបើកសវនាការ ចាប់ពីថ្ងៃទី២៤ ខែកុម្ភៈ រហូតដល់ថ្ងៃទី១២ ខែមីនា ឆ្នាំ២០២១។ តុលាការរាជធានីភ្នំពេញ បញ្ជាក់ថា រាល់សំណុំរឿង ដែលគ្រោងនឹងបើកសវនាការ ក្នុងចន្លោះពីថ្ងៃទី២៤ ខែកុម្ភៈ ដល់ថ្ងៃទី១២ ខែមីនា ឆ្នាំ២០២១ ត្រូវលើកទៅពេលក្រោយវិញ។
តាមរយៈសេចក្តីជូនដំណឹង នៅថ្ងៃទី២៣ ខែកុម្ភៈនេះ តុលាការរាជធានីភ្នំពេញ អះអាងថា នឹងបើកសវនាការឡើងវិញ នៅក្រោយស្ថានភាពជំងឺកូវីដ-១៩ បានធូរស្រាល។ លោក អ៊ីន រិន្ទ ប្រធានលេខាធិការដ្ឋានរដ្ឋបាលតុលាការរាជធានីភ្នំពេញ ប្រាប់សារព័ត៌មានថ្មីៗ តាមទូរស័ព្ទថា ក្រោយថ្ងៃទី១២ ខែមីនា បើស្ថានភាពជំងឺកូវីដ-១៩ ធូរស្រាល តុលាការរាជធានីភ្នំពេញ អាចនឹងរៀបកម្មវិធីបើកសវនាការឡើងវិ តែបើមិនទាន់ធូរស្រាលទេ ការផ្អាកសវនាការ អាចនឹងនៅតែបន្ត។
លោក លើកឡើងថា មានករណីពិសេសខ្លះ តុលាការ អាចនឹងបើកសវនាការ ក្នុងអំឡុងពេលនៃការផ្អាកនេះ។ ករណីពិសេស ដែលលោក លើកឡើងនោះ ដូចជា សំណុំរឿងរបស់ជនជាប់ចោទ ដែលនឹងត្រូវជាប់ឃុំហួសកាលកំណត់ បើបន្តឃុំជនជាប់ចោទនោះ ដោយមិនបើកសវនាការ។ ករណីពិសេសមួយទៀត គឺជនជាប់ចោទ ត្រូវបានបញ្ជូនទៅកាត់ក្តីភ្លាមៗ ហើយតម្រូវឲ្យបើកសវនាការជាបន្ទាន់ នោះក៏តុលាការ អាចនឹងបើកសវនាការក្នុងអំឡុងពេលផ្អាកនេះដែរ។
លោក មានប្រសាសន៍ថា៖«ករណីហ្នឹង មិនសូវមានទេ តែបើមាន យើង ត្រូវតែបើកសវនាការហើយ»។
ក្នុងរយៈពេលតែ៣-៤ថ្ងៃប៉ុណ្ណោះ អាជ្ញាធរកម្ពុជា រកឃើញមនុស្សជិត១០០នាក់ ដែលឆ្លងជំងឺកូវីដ-១៩ ក្នុងសហគមន៍។ ការឆ្លងជំងឺកូវីដ-១៩ ចូលសហគមន៍លើកនេះ ត្រូវរដ្ឋាភិបាល សន្មតហៅថា ព្រឹត្តិករណ៍២០កុម្ភៈ។
មានទីតាំងជិត៥០កន្លែងហើយ ដែលរកឃើញថា ពាក់ព័ន្ធនឹងព្រឹត្តិការណ៍២០កុម្ភៈ ហើយភាគច្រើននៃទីតាំងទាំងនោះ ត្រូវបានបិទជាបណ្ណោះអាសន្ន។ ជាមួយគ្នានេះ រដ្ឋាភិបាល បានបិទសាលារៀននៅរាជធានីភ្នំពេញ និងខេត្តកណ្តាលរយៈពេល២សប្តាហ៍ ខណៈ អាជីវកម្មផ្សេៗទៀត ដូចជា ខេធីវី ជាដើម ក៏ត្រូវបិទជាបណ្តោះអាសន្ន៕
Tag:
COVID-19
តុលាការភ្នំពេញ
ផ្អាកសវនាការ
© រក្សាសិទ្ធិដោយ thmeythmey.com