​ក្រុមហ៊ុន HESED និង CCONMA កំពុងតែ​ចូលរួម​ក្នុង​កម្មវិធី IBS (Inclusive Business Solution) ដែលជា​គម្រោង​មួយ ក្នុងចំណោម​គម្រោង ODA របស់ ទីភ្នាក់ងារ​សហប្រតិបត្តិ​ការ​អន្តរជាតិ​កូរ៉េ (KOICA)​។​
 

​គម្រោង IBS ផ្អែកលើ​ភាពជា​ដៃគូ​យុទ្ធសាស្ត្រ សម្រាប់​គោលដៅ​រួម ក្នុងការ​ដោះស្រាយ​បញ្ហា​ប្រឈម​ក្នុងការ​អភិវឌ្ឍ​សង្គម ដល់​ប្រជាជនមាន​ប្រាក់ចំណូល​ទាប នៅក្នុង​ប្រទេស​កំពុងអភិវឌ្ឍន៍ ដោយ​ផ្តល់ឱ្យ​ពួកគេ នូវ​ឱកាស​ការងារ​និង​អាជីវកម្ម​។​

 

​តាមរយៈ​គម្រោង IBS របស់ KOICA  ក្រុមហ៊ុន HESED បាន​ដំឡើង​ផ្ទះ​កញ្ចក់ នៅក្នុង​ភូមិ​ចំនួន ៣ ក្នុង​ខេត្តកំពង់ស្ពឺ ដែល​ត្រូវការ​ជា​ចាំបាច់ នៅក្នុង​ដំណាក់កាល​ស​ម្ងួ​ត នៃ​ការផលិត​ស្ករត្នោត​។​
 

​កាលពីមុន ស្ករត្នោត ត្រូវបាន​ផលិត​តាម​ផ្ទះ​កសិករ​នីមួយៗ ដូច្នេះ​វា​មិនសូវមាន​អនាម័យ​ទេ ពីព្រោះ​មិនមាន​កន្លែង និង​ឧបករណ៍​ត្រឹមត្រូវ ហើយ​វា​ត្រូវការ​ពេលវេលា​ច្រើន ដើម្បី​ស​ម្ងួ​ត​ស្ករត្នោត​ប្រភេទ​ម្សៅ ហើយ​ក៏មាន​ចំនួន​កំណត់​ដើម្បី​ស្ងួត​ក្នុងពេល​តែមួយ​។ ដើម្បី​កែលម្អ​បញ្ហា​នេះ ក្រុមហ៊ុន HESED ក៏បាន​សាងសង់ផ្ទះ​ស​ម្ងួ​ត​ពន្លឺព្រះអាទិត្យនេះ​ដល់​សហគមន៍​។​

 

 

​ផ្ទះ​ស​ម្ងួ​ត​ពន្លឺព្រះអាទិត្យ សហគមន៍​ស្ករត្នោត​សុ​វណ្ណៈ​

​កសិករ​ផលិត​ស្ករត្នោត មានការ​ពេញចិត្ត​យ៉ាងខ្លាំង ដោយ​រំពឹងថា ការផលិត​ស្ករត្នោត​នឹង​កើនឡើង តាមរយៈ​ផ្ទះ​ស​ម្ងួ​ត​ពន្លឺព្រះអាទិត្យនេះ​។​

 

​លោក​អុល ប្រធាន​សហគមន៍​សហ​ករ​ណ៍​ស្ករត្នោត​កំពង់ស្ពឺ  បាន​សម្តែង​ការដឹងគុណ ដោយ​ថ្លែងថា លោក​រីករាយ ដែល​បាន​រៀន​ពី​របៀប​ប្រើប្រាស់​​ផ្ទះ​ស​ម្ងួ​ត​ពន្លឺព្រះអាទិត្យ ហើយ​រីករាយ​ចូលរួម​ធ្វើ​អាជីវកម្ម​ស្ករត្នោត ជាមួយ ក្រុមហ៊ុន HESED និង KOICA ។​

 

​គួរបញ្ជាក់​ផងដែរ​ថា ក្រុមហ៊ុន HESED បាន​សហការ​ជាមួយ មន្ទី​រកសិកម្ម រុក្ខាប្រមាញ់ និង​នេសាទ បាន​បង្កើត​សហគមន៍​ផលិត​ស្ករត្នោត​នេះ គឺមាន​ពីរ​ទីតាំង​។ ទីតាំង​ទីមួយ គឺ​រោងចក្រ​ផលិត​ស្ករត្នោត ស្ថិតនៅក្នុង​ខេត្តកំពង់ឆ្នាំង និង​ទី​ពីរ​គឺ ខេត្តកំពង់ស្ពឺ​នេះ​។ ក្រុមហ៊ុន​រំពឹងថា ទីតាំង​ទាំងពីរ​នេះ នឹង​អាច​ផ្គត់ផ្គង់​គ្រប់គ្រាន់​សម្រាប់​ផ្សារ​ទំនើប​ក្នុងស្រុក នឹង​ការនាំ​ចេញទៅ​ទីផ្សារ​អន្តរជាតិ ដូចជា​ប្រទេស​កូរ៉េខាងត្បូង ចិន និង​សហរដ្ឋអាមេរិក​ជាដើម​៕

 

(​អត្ថបទ​ពាណិជ្ជកម្ម​) 

 

​