រដ្ឋាភិបាលថ្នាក់តំបន់របស់ជប៉ុន ស្នើឱ្យបញ្ចប់ភាពអាសន្ន ក្រោយករណីកូវីដ-១៩ ធ្លាក់ចុះ

COVID-19

អន្តរជាតិ

រដ្ឋាភិបាលថ្នាក់តំបន់របស់ជប៉ុន ស្នើឱ្យបញ្ចប់ភាពអាសន្ន ក្រោយករណីកូវីដ-១៩ ធ្លាក់ចុះ

24, Feb 2021 , 7:59 pm

រូបភាព

រូបថត Xinhua

ដោយ: ឈួន ឈីវអុីង

រដ្ឋាភិបាលថ្នាក់តំបន់របស់ជប៉ុន បានស្នើឱ្យបញ្ចប់ការប្រកាសភាពអាសន្នដែលត្រូវបានចំពោះមុខការរីលរាលដាលជំងឺកូវីដ-១៩ កាលពីខែមករា។ នេះបើតាមការលើកឡើងរបស់មន្ត្រីជាន់ខ្ពស់រដ្ឋាភិបាលជប៉ុននៅថ្ងៃទី២៣ ខែកុម្ភៈ។ ការស្នើនេះ ធ្វើឡើងក្រោយករណីឆ្លងថ្មី ចាប់ផ្ដើមធ្លាក់ចុះ។

ការផ្ទុះឡើងករណីឆ្លងកូវីដ-១៩ យ៉ាងគំហុក បង្ខំឱ្យរដ្ឋាភិបាលជប៉ុនដាក់ខេត្ត១១ ក្រោមភាពអាសន្នកាលពីខែមករាកន្លងទៅ។ ប្រជាជនត្រូវបានស្នើឱ្យកាត់បន្ថយការដើរហើរ ឯអាជីវកម្មជាច្រើន ត្រូវកាត់បន្ថយម៉ោងរកស៊ីរបស់ពួកគេ។

នាសន្និសីទសារព័ត៌មានថ្ងៃទី២៤ ខែកុម្ភៈ ប្រធានលេខាធិការគណៈរដ្ឋមន្ត្រីជប៉ុន លោក Katsunobu Kato និយាយថា ការដាក់ប្រទេសក្នុងភាពអាសន្នអាចនឹងត្រូវបានបញ្ចប់ឆាប់ៗនេះ ហើយត្រូវធ្វើជាដំណាក់កាលៗ។ តាមផែនការ ភាពអាសន្ននៅខេត្តទាំង១១ អាចត្រូវបានលើកវិញនៅថ្ងៃទី៧ ខែមីនា។

យ៉ាងណាមិញ រដ្ឋាភិបាលខេត្តចំនួន៦ នៅភាគខាងលិច កណ្ដាល និងខាងត្បូង បានស្នើទៅកាន់រដ្ឋាភិបាលកណ្ដាលឱ្យបញ្ចប់ភាពអាសន្នមុនការកំណត់។ នេះបើតាមលោក Yasutoshi Nishimura រដ្ឋមន្ត្រីសេដ្ឋកិច្ចជប៉ុន។ ដោយឡែក ទីក្រុងតូក្យូ និងខេត្តជិតខាងនោះនឹងនៅតែស្ថិតក្នុងស្ថានភាពអាសន្នដដែល។

បើតាមទីភ្នាក់ងារពត៌មាន Reuters លោកនាយករដ្ឋមន្ត្រី ស៊ូហ្កា យូស៊ីហ៊ីដេ Yoshihide Suga នឹងជួបជាមួយបណ្ដាលនៅថ្ងៃទី២៤ ខែកុម្ភៈ ដើម្បីពិភាក្សាអំពីការបញ្ចប់ស្ថានភាពអាសន្ននៅក្នុងខេត្តទាំង៦ ។ ការសម្រេចចិត្តចុងក្រោយ អាចប្រកាសនៅថ្ងៃទី២៦ ខែកុម្ភៈ។

សូមបញ្ជាក់ថា ជប៉ុនក៏បានចាប់ផ្ដើមយុទ្ធនាការចាក់វ៉ាក់សាំងរបស់ខ្លួនហើយតាំងពីថ្ងៃទី១៧ ខែកុម្ភៈមក។ ប្រទេសនេះ បានចុះកិច្ចព្រមព្រៀងទិញវ៉ាក់សាំងសរុបចំនួន៣១៤លានដូសពីក្រុមហ៊ុន Pfizer, AstraZeneca និង Moderna ដែលគ្រប់គ្រាន់សម្រាប់ប្រជាជនទាំងអស់៕