លោក Ramon Tulfo ពិធធីករវិទ្យុម្នាក់ និងជាប្រេសិតពិសេសប្រចាំចិនផងនោះ បានទម្លាយនៅថ្ងៃទី២០ ខែកុម្ភៈ ថា លោកទទួលបានការចាក់វ៉ាក់សាំងអំឡុងខែតុលា ឆ្នាំ២០២០ ។ វ៉ាក់សាំងដែលលោក Tulfo ចាក់នេះ ត្រូវប្រើលើអង្គរក្សប្រធានាធិបតី រ៉ូឌ្រីហ្គោ ឌូទើតេ ផ្ទាល់។ ព័ត៌មាននេះ នាំឱ្យរដ្ឋាភិបាលលោក ឌូទើតេ រងការរិះគន់ខ្លាំងអំពីអភ័យឯកសិទ្ធិពិសេស និងការមិនគោរពតាមនីតិវិធី។ 

 

ទាក់ទងវ៉ាក់សាំងវិញ រដ្ឋបាលចំណីអាហារនិងឱសថ (FDA) របស់ហ្វីលីពីន មិនបានអនុម័តឱ្យប្រើប្រាស់វ៉ាក់សាំង Sinopharm ជាបន្ទាន់នៅក្នុងប្រទេសឡើយ ឯ Sinopharm ក៏មិនបានស្វែងរកការអនុញ្ញាតឱ្យប្រើប្រាស់ជាបន្ទាន់នៅហ្វីលីពីនដែរ។ ដូចនេះ វាក៏ធ្វើឱ្យមានការនាំចូល និងចែកចាយវ៉ាក់សាំងខុសច្បាប់នៅក្នុងទីផ្សារងងឹត។

 

លោក Rolando Enrique Domingo ប្រធាន FDA អះអាងថា អង្គភាពរបស់លោក កំពុងស៊ើបអង្កេតព្រោះវាមិនមែនជារឿងល្អឡើយដែលមានដំណឹងទាក់ទងការចាក់វ៉ាក់សាំងដែលមិនឆ្លងនីតិវិធីត្រឹមត្រូវ។ ចំណែករដ្ឋលេខាធិការក្រសួងសុខាភិបាលហ្វីលីពីន លោក Rosario Vergeire លើកឡើងថា អ្នកទទួលវ៉ាក់សាំងគ្មានការអនុញ្ញាត ក៏ត្រូវទទួលខុសត្រូវដែរ។ នេះបើតាមការផ្សាយរបស់ទីភ្នាក់ងារព័ត៌មាន Reuters ។

 

គួរបញ្ជាក់ថា ហ្វីលីពីន មិនទាន់ចាប់ផ្តើមការចាក់វ៉ាក់សាំងជូនប្រជាជននោះទេ បើទោះបីជាមានករណីវិជ្ជមាន និងបាត់បង់ជីវិតច្រើនជាងគេនៅអាស៊ីក៏ដោយ។ កន្លងមក ហ្វីលីពីនបានអនុញ្ញាតឱ្យប្រើប្រាស់វ៉ាក់សាំងបន្ទាន់ពីក្រុមហ៊ុន Pfizer-BioNTech និង AstraZeneca ។