អន្តរជាតិ
លោក Jorge Arreaza រដ្ឋមន្ត្រីការបរទេសវ៉េណេស៊ុយអេឡា និងលោកស្រី Isabel Brilhante Pedrosa ទូតសហភាពអឺរ៉ុប។ រូបថត AFP
×![]()
វ៉េណេស៊ុយអេឡាបានចេញសេចក្តីប្រកាសបណ្តេញឯកអគ្គរដ្ឋទូតសហភាពអឺរ៉ុបជាការឆ្លើយតបទៅនឹងទណ្ឌកម្មបន្ថែមដែលសហភាពអឺរ៉ុប (EU) លើមន្ត្រីជាន់ខ្ពស់ចំនួន១៩រូប ។ អគ្គរដ្ឋទូតសហភាពអឺរ៉ុបមានរយៈពេល៧២ម៉ោងដើម្បីចាកចេញពីទឹកដីវ៉េណេស៊ុយអេឡា។ នេះជាលើកទីពីរហើយដែលវ៉េណេស៊ុយអេឡាបណ្តេញទូតសហភាពអឺរ៉ុប។
លោក Jorge Arreaza រដ្ឋមន្ត្រីការបរទេសវ៉េណេស៊ុយអេឡា និយាយថា ការបណ្តេញលោកស្រីIsabel Brilhante Pedrosa ឯកអគ្គរដ្ឋទូតសហភាពអឺរ៉ុប សញ្ជាតិព័រទុយហ្កាល ធ្វើឡើងបន្ទាប់ពីរដ្ឋមន្ត្រីការបរទេសនៃសហភាពអឺរ៉ុបដាក់ទណ្ឌកម្មបន្ថែមលើមន្ត្រីវ៉េណេស៊ុយអេឡា១៩រូបដែលមានយោធា ចៅក្រមតុលាការកំពូល និងអ្នកនយោបាយជាន់ខ្ពស់ជាដើម។ ទណ្ឌកម្មនេះរួមការការដកហូតទិដ្ឋាការ និងបង្កកទ្រព្យសម្បត្តិ។
«យោងតាមសេចក្តីសម្រេចរបស់ប្រធានាធិបតី យើងសូមប្រគល់ជូននូវសេចក្តីប្រកាសដែលលោកស្រី Isabel Brilhante Pedrosa ត្រូវចាត់ទុកជាបុគ្គលលែងស្វាគមន៍»។ នេះជាការថ្លែងរបស់លោក Arreaza ក្នុងសន្និសីទសារព័ត៌មាននៅថ្ងៃទី២៤ ខែកុម្ភៈ។ លោកថា ការបណ្តេញអ្នកការទូតនេះធ្វើឡើង ដោយសារតែស្ថានការណ៍តម្រូវ ហើយ EU ពុំមានអំណាចច្បាប់ ឬសីលធម៌មកដាក់ទោសអ្នកណាឡើយ។
ការបណ្តេញអ្នកការទូតអឺរ៉ុប ធ្វើឡើងបន្ទាប់ពីសភាវ៉េណេស៊ុយអេឡាដែលគ្រប់គ្រងដោយបក្សរបស់លោកប្រធានាធិបតី នីកូឡាស់ ម៉ាឌុយរ៉ូ អនុម័តសេចក្តីសម្រេចនៅថ្ងៃទី២៣ ខែកុម្ភៈ ទាមទារឱ្យរដ្ឋាភិបាលបណ្តេញទូតអឺរ៉ុបចេញពីប្រទេសនេះបន្ទាប់ពីរងទណ្ឌកម្មបន្ថែមនៅថ្ងៃទី២២ ខែកុម្ភៈ។ គិតត្រឹមទណ្ឌកម្មចុងក្រោយ អឺរ៉ុបបានដាក់ទណ្ឌកម្មលើមន្ត្រីវ៉េណេស៊ុយអេឡា៥៥នាក់ហើយ។
ចំពោះការបណ្តេញអ្នកការទូតខ្លួននេះ EU បង្ហាញការខកចិត្ត និងទាមទារឱ្យវ៉េណេស៊ុយអេឡាលុបចោលការសម្រេចចិត្តរបស់ខ្លួន។ វ៉េណេស៊ុយអេឡាធ្លាប់លុបចោលសេចក្តីសម្រេចបណ្តេញអ្នកការទូតអឺរ៉ុបរូបនេះកាលពីខែមិថុនា ឆ្នាំ២០២០ ម្ដងហើយ។ នេះបើតាមលោកស្រី Nabila Massrali អ្នកនាំពាក្យផ្នែកគោលនយោបាយការបរទេសអឺរ៉ុប។ លោកស្រី Massrali រំឭករដ្ឋាភិបាលវ៉េណេស៊ុយអេឡាថា ប្រទេសនេះអាចឆ្លងកាត់វិបត្តិនយោបាយតាមរយៈការសន្ទនា និងចរចាតែប៉ុណ្ណោះ។
បន្ទាប់ពីជួបវិបត្តិនយោបាយ និងការមិនទទួលស្គាល់លទ្ធផលបោះឆ្នោតប្រធានាធិបតីក្នុងឆ្នាំ២០១៨ លោក ហ័ន កៃដូ មេដឹកនាំបក្សប្រឆាំង បានប្រកាសខ្លួនជាប្រធានាធិបតីស្តីទី ដោយយោងតាមរដ្ឋធម្មនុញ្ញដែលផ្តល់អំណាចឱ្យប្រធានសភាទទួលតំណែងជាប្រធានាធិបតីស្តីទី នៅពេលប្រទេសគ្មានប្រធានាធិបតី។
អាមេរិក នៅបន្តទទួលស្គាល់លោក កៃដូ តែសហភាពអឺរ៉ុបបញ្ជាក់ថា ខ្លួនលែងទទួលស្គាល់លោក ក្វៃដូ ជាប្រធានាធិបតីស្តីទីទៀតហើយ។ នេះក៏ដោយសារតែលោក ក្វៃដូ បាត់បង់តំណែងជាប្រធានរដ្ឋសភា ក្រោយការបោះឆ្នោតរដ្ឋសភានីតិកាលថ្មី នៅចុងឆ្នាំ២០២០ ដែលក្រុមបក្សប្រឆាំងពហិការ។ សហភាពអឺរ៉ុប និងអាមេរិក ក៏ពុំទទួលស្គាល់ការបោះឆ្នោតរដ្ឋសភាឆ្នាំ២០២០ នេះដែរ៕
Tag:
វ៉េណេស៊ុយអេឡា
EU
© រក្សាសិទ្ធិដោយ thmeythmey.com
