ទិដ្ឋភាពប្រាសាទឯកភ្នំដ៏ស្ងាត់ជ្រងំ ក្នុងវិបត្តិកូវីដ-១៩

ជាតិ

ទិដ្ឋភាពប្រាសាទឯកភ្នំដ៏ស្ងាត់ជ្រងំ ក្នុងវិបត្តិកូវីដ-១៩

25, Feb 2021 , 10:59 pm

រូបភាព

ដោយ:

ឯកភ្នំ ជាប្រាសាទបុរាណមួយ មានទីតាំងស្ថិតនៅ ភូមិថ្កូវ ឃុំក្ដុលដូនទាវ ស្រុកឯកភ្នំ និងមានចម្ងាយប្រមាណ ១២គីឡូម៉ែត្រ ពីក្រុងបាត់ដំបង។ ប្រាសាទឯកភ្នំ ជាទីតាំងទេសចរណ៍វប្បធម៌ប្រវត្តិសាស្ត្រមួយ តែងទាក់ទាញភ្ញៀវទេសចរ អន្តរជាតិ ក្នុងខេត្តបាត់ដំបង។ ក្រោយមានវិបត្តិកូវីដ-១៩ ប្រាសាទឯកភ្នំ ចាប់ផ្ដើមខ្សត់ភ្ញៀវទេសចរ ព្រោះលែងមានវត្តមានភ្ញៀវទេសចរអន្តរជាតិទៅកម្សាន្តនៅប្រាសាទមានវ័យចំណាស់មួយនេះ។

ប្រាសាទឯកភ្នំ ត្រូវបានកសាងឡើងក្នុងសតវត្ស ទី១១ ក្នុងរាជកាលព្រះបាទសូរ្យវរ្ម័នទី១ នាសម័យមហានគរ ដើម្បីឧទ្ទិសថ្វាយអាទិទេពនៃព្រហ្មញ្ញសាសនា។ ក្រៅពីជាទីតាំងវប្បធម៌ និងប្រវត្តិសាស្ត្រ ប្រាសាទឯកភ្នំក៏ជាទីតាំងទេសចរណ៍ ដ៏ទាក់ទាញមួយផងដែរ។ នេះបើតាមទំព័រហ្វេសប៊ុកមន្ទីរទេសចរណ៍ខេត្តបាត់ដំបង។

បើតាមលោក នី រស្មី ប្រធានការិយាល័យអប់រំបណ្តុះបណ្តាល នៃមន្ទីរទេសចរណ៍ខេត្តបាត់ដំបង ប្រាសាទឯកភ្នំ មិនសូវមានទេសចរទៅកម្សាន្តនោះទេក្នុងវិបត្តិកូវីដ-១៩។ លោក នី រស្មី បញ្ជាក់ដូច្នេះថា៖ « ដោយសារបញ្ហាជំងឺកូវីដ-១៩ បានធ្វើឱ្យអត្រាភ្ញៀវទេសចរអន្តរជាតិមានការធ្លាក់ចុះ ដូចនេះបច្ចុប្បន្នរមណីយដ្ឋានប្រាសាទឯកភ្នំមិនសូវមានភ្ញៀវទេសចរច្រើនទេ ដោយសាររមណីយដ្ឋានប្រវត្តិសាស្ត្រមួយនេះភាគច្រើនទាក់ទាញភ្ញៀវទេសចរអន្តរជាតិ»។

លោកបានបន្ថែមទៀតថា ក្រៅពីប្រាសាទឯកភ្នំ ខេត្តបាត់ដំបង ក៏មានតំបន់ទេសចរណ៍វប្បធម៌ប្រវត្តិសាស្ត្រ ដែលទាក់ទាញភ្ញៀវទេសចរខ្លាំង ២ផ្សេងទៀតគឺ រមណីយដ្ឋានប្រាសាទបាណន់ និងរមណីយដ្ឋានភ្នំសំពៅ៕

សូមអញ្ជើញ លោក អ្នកនាង ទស្សនារូបភាព ប្រាសាទឯកភ្នំ ដែលផ្ដិតដោយសហការី សារព័ត៌មានThmeyThmey25 ដូចតទៅ៖